ESTER 4 - Maung a Balita Biblia (PnPV)(PnPV)

Kinerew nen Mardokeo so Tulong nen Ester

1Nen akabatan nen Mardokeo iray amin ya agawa pinipilat toy kawes to lapud mapalalon ermen to. Insan nankawes na sako, ininan to na dapul so olo to, tan nanakar-akar ed siudad a manogagaog tan mannangnangis na ampaipait,

2ya anggad akasabi ed lolooban na palasio. Ag linmoob ed palasio lapud ag nayarid dalem so toon akakawes na sako.

3Walay panogaog tan ermen ed saray Judio diad amin a luyag a pangibawagan na samay ganggan na ari. Nanayuno ra, nanakis ira, nanogaog ira, tan karaklan ed sikara so nankakawes na sako tan dinmodokul ed dapul.

4Nen imbagad kinen Ester na saray aripen ton bibii tan saray yunuko so gagawaen nen Mardokeo, mapalaloy inkagunigon to. Angipatolur ed kinen Mardokeo na kawes ya isalat tod samay sako, balet ag inawat nen Mardokeo.

5Insan tinawag nen Ester si Hatac, ya aripen to a sakey ed saray yunukon tinoro na ari, tan pinaonla tod kinen Mardokeo ta amtaen to no antoy nagagawa tan no akin.

6Linmay Hatac ed kinen Mardokeo diad plasa na siudad, diad lolooban na palasio.

7Imbagad sikato nen Mardokeo iray amin ya agawad sikato, tan no kaonungay insipan nen Haman a mangyan na kuarta ed panagsinupan na kayamanan na palasio no napatey ya amin iray Judio.

8Initdan nen Mardokeo si Hatac na kopia na samay ganggan a nipaakseb ed Susa ya ibabaga toy pakapatey na saray Judio. Kinerew nen Mardokeo ed sikato ya iter tod kinen Ester imay kopia na ganggan, tan ipaliwawa tod sikato so kipapasen da ray Judio. Kinerew to met ya ibaga tod kinen Ester ya onlan mikasid ari ya abageyen to ray totoo nen Ester.

9Ginawa ya nen Hatac,

10tan saya so imbilin nen Ester ed sikato ya ipawil tod kinen Mardokeo,

11No walay siopaman, laki may bii, ya onlad patio ed dalem tan miarapan ed ari anggaman ya ag tinawag, nepeg a pateyen itan a too. Sikato yay ganggan; kabat ya na balang sakey, manlapud saray sumisimbawa na ari ya anggad saray totoo na luyag. Anggapoy makapaliis ed sayan ganggan, likud no say ari et itoro tod siopaman so balituk a sitro to; ag napatey ed satan. Balet sakey bulan lan ag ak ni tinawag na ari.

12Nen nadngel nen Mardokeo imay impaibaga nen Ester,

13impawit to yan pasakbay: Abaloan mo amon bukor moy Judion ag napatey lapu labat a wala kad palasio.

14No anggapoy walad sika so panaon a singa saya, manlapud tawen so tulong ed saray Judio et nilaban ira, balet ompatey ka tan mansamput lay pamilya nen amam. Balet antoy amtam no say makasengeg na impagmaliw mon riyna et lapud panaon a singa saya!

15Saya so inyebat nen Ester ed kinen Mardokeo:

16Laka, ta pantitipon mo ray amin a Judion walad Susa; manayuno kayo tan mampikasi kayon para siak. Ag kayo mamangan odino oniinom na antokaman ed loob na taloy agew tan taloy labi. Onya met so gawaen ko tan saray bibiin managlingkur ed siak. Kayari na sayan gawaen tayo, onla ak ed ari, anggaman a sumlang ed ganggan. No nepeg ya ompatey ak, sipaparaan ak ya ompatey.

17Tinmaynan la sirin si Mardokeo, tan ginawa toy amin ya imbaga nen Ester ed sikato.