1Manliket so kalawakan, tan ombuskag iray rosas diman.
2Mankanta tan maneyag ed liket so kalawakan;
magmaliw a marakep a singa Saray Palandey na Libano tan mataba a singa saray kaalogan na Carmelo tan Saron.
Nanengneng na balang sakey a too so kagalangan na Katawan,
say inkatalonggaring to tan say pakapanyari to.
3Itdan yo na biskeg iray naksawan a lima
tan saray pueg a mankalog ed kapoy da.
4Ibaga yod balang sakey a toon nakalay biskeg na linawa,
Mampabiskeg kayo tan ag kayo natatakot!
Onsasabiy Dios a mangyagel ed sikayo;
onsasabin manusad saray kalaban yo.
5Diad satan, makanengneng iray bulag,
tan makadngel iray telek.
6Manlukson singa ulsa iray piley,
tan mankantad liket iray emel.
Onagos iray kolus ed kalawakan;
7magmaliw ya ilog so makasinit a kabueran,
tan nawalaan na saray sobul so amaga-magan dalin.
Ontubo ray tanobung tan saray talaib
ed pasen a panaayaman a gendat na saray asod katakelan.
8Niwalad satan so sakey a maawang a dalan
a tatawagey, Say Dalan na Inkasanto.
Anggapoy makasalanan a manakar ed saman a dalan;
anggapo rad may makulang-kulang a mangibalang ed saray ondalan.
9Anggapo rad may niwalan lion;
anggapoy ondalan diman a masebeg ya ayep.
Diad ipawil na saray totoon inyagel na Katawan
ondalan irad saman a dalan.
10Magayaga ran makasabid Jerusalem,
mangankanta tan maneyag-eyag irad liket da.
Manliket iran ando lan ando, naandi lan anggad angga so ermen tan dageyem.
Who We AreWhat We EelieveWhat We Do
2025 by iamachristian.org,Inc All rights reserved.
