JOB 41 - Maung a Balita Biblia (PnPV)(PnPV)

1Naerel moy Libiatan diad panamegley na banwit,

odino nasinger moy dilo to na lobir?

2Nadeyeng mo na lobir so eleng to odino natagam so sangi to?

3Kerewen tod sika ya ibolus mo?

Kerewen tod sikan kasian mo?

4Misipanan ed sika

tan isipan tod sikan panlingkuran to ka ya anggad angga?

5Singeren mon singa sakey a manok ed tagey a kokomponien mo,

singa sakey a bengatlan panliketan na saray aripen mon bibii?

6Tawalan na saray sumisigay?

Tegtegtegen na saray nigosianti ta ilako ra?

7Napanum na saray doyuk so baog to,

odino nasegkal mo na pika so olo to?

8Diwit mon maminsan et ag mo labay ya oliten;

ag mon balut nalingwanan so laban!

9Siopamay makanengneng ed Libiatan,

naekalay biskeg na linawa tan natumbad dalin.

10Masebesebeg no sikatoy nasigensigen;

anggapoy ompangayan miarapan ed sikato.

11Siopay ondogpad sikato ya ag narisgo?

Anggapoy anggan sakey diad intiron mundo.

12Ibagak pad sika so nipaakar ed saray sali na Libiatan;

salitaen ko met so kabaleg tan kabiskeg to.

13Anggapoy makaekal na walad tapew a kawes to;

anggapo met so makatorok ed kawes a para bakal ya akasolung ed sikato.

14Siopay makalengat na sangi to,

anta arasdasig iray makapataktakot a ngipen to?

15Nansasaip a samper so beneg to,

nampepeketan ira tan singa batoy awet da.

16Diad elet na impansasaip da,

ag makadalan so dagem ed naleleetan da.

17Ontan lay abig na inkipeket dan amin,

kanyan ag iran balut naaknit.

18Onkidiam so liwawa no ombasis

marmarlang so mata to a singa ompapaway ya agew.

19Ompapaway ed sangi to so manliub ya apoy,

tan mantikyab iray talagsik ya amayamay.

20Ompapaway ed eleng to so asewek,

singa asewek na mandarlang a dikad silong na banga.

21Say ingas to dadangatan toy abunton ya oring;

ompapaway ed sangi to so apoy.

22Mabisbiskeg so beklew to,

kanyan natataktakot iray amin a makabet ed sikato.

23Anggapoy makapoy a pasen ed baog to;

anawet tan ag napikon singa balatyang.

24Anggapoy takot so binmaton puso to,

ag napatoluk tan anawet a singa gilingan.

25No ombalikwat natatakot iray anggan makapanyari;

natalagnaw irad takot da.

26Anggapoy ispadan makasugat ed sikato;

anggapoy pika, o pana, o doyuk a makapasakit ed sikato.

27Para sikato say balatyang et singa labat dayami,

tan say gansa et singa labat aboluk a kiew.

28Anggapoy panan makapabatik ed sikato;

singa labat osang iray baton nitupak ed sikato.

29Para sikato singa labat dayami so pekpek,

tan elekan to labat iray totoon mamikad sikato.

30Singa nabnabtag a banga so eges to;

singa sasagaren so mapitek a dalin a dadalanen to.

31Kikimbogen ton singa manlelwag a danum so dayat,

tan papaboraen toy dayat a singa larak ed banga.

32Onsisilong so dinalan to;

pagmamaliwen ton singa bora so dayat.

33Anggapoy kapara to diad tapew na dalin;

sikatoy pinalsa ya anggapoy takot.

34Melagmelagen to ray anggan atagtagey so kipapasen dan ayayep;

sikatoy ari da ray amin ya ayayep ed katakelan.