LEVITICO 25 - Maung a Balita Biblia (PnPV)(PnPV)

Say Kumapiton Taon(Deut. 15:1-11)

1Say Katawan akisalitad kinen Moises diad tagey na Palandey na Sinai tan ingganggan to

2ya iter tod saray Israelita iray onggendan a totontonen. No makaloob kayo lad dalin ya iter ed sikayo na Katawan, nepeg yon igalang so Katawan diad ag yo pantanem ed dalin kapag kumapiton taon.

3Taneman yon anem taon iray kaalogan yo, potutan yoy wakawakal na saray kaubasan yo, tan ani yoy bunga na saray tanaman yo.

4Balet say kumapiton taon, sikatoy taon a pampainawan sigput na dalin, say taon a nisaklang ed Katawan. Ag yo tataneman iray kaalogan yo odino popotutan so wakawakal na saray kaubasan yo.

5Ag yo anggan aanien iray trigon tinmubon bukor, tan ag yo boborboren so bunga na saray kaubasan ya ag yo pinotutan so wakawakal da; sikatoy taon a pampainawan sigput na dalin.

6Anggaman ya ag adalusan so dalin ed satan a taon, itdan to kayo na kanen yo, saray aripen yo, saray uupaan yon totoo, saray sangkailin manaayam ed sikato,

7saray amon ayayep yo, tan saray atap ya ayayep a wala rad kaalogan yo. Amin a bungan iter na dalin et nayarin pantagano.

Say Taon na Panangipawil

8Mambilang kayoy pitoran sampipiton taon, kanyan magmaliw ya apataplo tan siam a taon ya amin.

9Insan diad kumaplon agew na kumapiton bulan, say Agew na Pangekal na Kasalanan, mangibaki kayo na sakey a lakin mamaknul na trumpita ed intiron bansa.

10Onyay pangibiig yod kumalimamplon taon tan pangibawag yoy kawayangan ed amin a manaayam ed dalin. Legan na sayan taon amin a kayaryan ya inlako nepeg ya ipawil ira ed gendat ya akankayaryan, odino diad saray kabyangay boleg to; tan balang toon inlakon aripen nepeg ya ompawil ed pamilya to.

11Ag yo nepeg a taneman iray kaalogan yo odino anien iray trigon tinmotubun bukor; ag yo met boborboren so bunga na saray kaubasan ya ag yo pinotutan so wakawakal da.

12Nepeg ya ipasen yon masanto so intiron taon; kanen yo labat iray bungan iter na dalin.

13Diad sayan taon amin a kayaryan ya inlako nepeg ya ipawil ira ed gendat ya akankayaryan.

14Kanyan no mangilako kayoy dalin ed kapara yon Israelita odino manaliw kayod sikato, ag yo sasaolen.

15Say bili na dalin et nepeg ya itukoy ed karakel na taon a pakapambunga to kasakbayan na ontombuk a Taon na Panangipawil.

16No dakel niy taon, paatageyan yoy bili to; balet no daiset lay taon, paabebaan yoy bili, lapud say ilalako et say karakel na bungan iter na dalin.

17Ag yo sasaolen so kapara yon Israelita, no ag ingen takotan yo so Katawan a Dios yo.

Say Pambilay no Kumapiton Taon

18Onur yoy amin a ganggan tan bilin na Katawan, pian mambilay kayon arawid kaatapan ed dalin a panayaman yo.

19Say dalin mangiter na bunga to tan nawalaan kayo na amin a labay yon kanen tan mambilay kayod man ya arawid kaatapan.

20Nayarin walay mantepet no antoy pambilay yo legan na kumapiton taon, ag taneman iray kaalogan tan ag borboren iray bungay tanaman.

21Say Katawan bindisionan toy dalin diad kumanem a taon pian magenap a pambilay a duay taon so iter ton tagano.

22No mantanem kayod kaalogan yo no kumawalon taon, say pambibilay yo nid satan say naani yo ed kumanem a taon tan duga nin pambilay yo ya anggad pakaani yo lad intanem yo.

Say Panangipawil na Kayaryan

23Say dalin ag nepeg ya ilakon anggad angga lapud ag yo kayaryan; say Dios so akankayaryan, tan singa kayo sangkailin naabuloyan a mangikana ed dalin.

24No alako so dalin, nepeg a birbiren so kanepegan na gendat ya akankayaryan a manondon.

25No mairap so bilay na sakey ya Israelita tan apilitan ya angilako na dalin to, say sankaasinggeran a kanayon to so manondon.

26Say toon anggapoy kanayon ton manondon nayarin onaliguas ed arapen a panaon tan nayarian to lan dondonen.

27No onyay nagawa nepeg ton iter ed toon analiw na dalin to so bili a kapetekan na saray taon a nakdaan a kasakbayan ya onsabiy Taon na Panangipawil, ta diad satan a taon et nipawil lamlamang ed sikato may dalin to.

28Balet no anggapoy kuarta ton panondon ed dalin to, say dalin mansiansian kayaryan na analiw ya anggad onsabiy Taon na Panangipawil. Diad satan a taon say dalin nipawil ed gendat a makankayaryan.

29No say sakey a too et mangilako na abung a walad dalem na pinadir a siudad, walay kanepegan ton manondon ed legay sakey taon manlapud agew na impangilako to.

30Balet no ag to narondon legan na sakey taon, naandid sikatoy kanepegan a manondon, tan say abung magmaliw lan kayaryan ya anggad angga na analiw tan saray kabyangay boleg to; ag ipawil so abung ya anggan Taon na Panangipawil.

31Balet saray abung ed saray barion ag pinaliberay padir et ipasen ira a singa alog; say gendat ya akankayaryan walay kanepegan ton manondon, tan saray abung nepeg ya ipawil ira no Taon na Panangipawil.

32Balet saray Levita walay kanepegan dan manondon, anggan kapigan, ed kayaryan da a walad dalem na saray siudad a nipabetang ed sikara.

33No say sakey ya abung ed sarayan siudad et inlako na sakey a Levita tan ag arondon, nepeg ya ipawil no Taon na Panangipawil, lapud saray abung a kayaryan na saray Levita ed saray siudad da et kayaryan da ran anggad angga ed dalin na Israel.

34Balet say dalin a panagpastolan ed kaliber-liber da ray siudad na Levita et nepeg ya ag balut ilako; kayaryan dan anggad angga.

Say Pautang ed saray Mairap-bilay

35No nagmaliw a mairap so bilay na kapara yon Israelita a kaabay yo tan ag to nayarian a bilayen so sikaton dili, nepeg yon itdan na pantagano to a singa pangiter yod toon uupaan yon mankimey, pian nayarian toy mansiansian manayam ed abay yo.

36Ag yo pangaabangen; ingen toluk yoy Dios tan abuloyan yon manayam ed abay yo so kapara yon Israelita.

37Ag yo pangaabangen ed kuartan ipabayes yod sikato, tan ag yo panotoboan ed kakanen ya ilako yod sikato.

38Sikato yay ganggan na Katawan a Dios yo ya angipaway ed sikayo manlapud Egipto ta iter tod sikayoy dalin na Canaan tan magmaliw a Dios yo.

Say Pangibolus ed saray Aripen

39No magmaliw a mairap so bilay na kapara yon Israelita a kaabay yo tan ilako tod sikayo so sikaton dili ya aripen, ag yo pankikimeyen a singa sakey ya aripen.

40Manayam ed sikayo a sakey a kumikimey a miuupa tan panlingkuran to kayo ya anggad Taon na Panangipawil.

41Diad satan a taon sikato tan saray anak to et taynan da kayo tan ompawil lad pamilya to tan diad kayaryan na saray lalaki to.

42Saray Israelita et aripen ira na Katawan, tan impaway to ra manlapud Egipto; ag ira nepeg ya ilakon aripen.

43Ag yo ra papairapen, no ag ingen toluk yo so Dios yo.

44No nakaukolay yoy aripen manaliw kayo lad saray kaliber-liber a bansa.

45Nayarin saliwen yo met iray anak na saray sangkailin manaayam ed dalin yo. Saratan ya anak a nianak ira ed dalin yo et nayarin magmaliw iran kayaryan yo,

46tan nayarin ipatawir yo ra ed saray lalakin anak yo, a panlingkuran da ra legan dan mambilay. Balet ag yo nepeg a pairapen so siopaman a kapara yon Israelita ya agi yo.

47No bilang ta minmayaman so sakey a sangkailin manaayam ed dalin yo, balet nagmaliw a mairap so bilay na sakey a Israelita tan ilako toy sikaton dili ya aripen ed sayan sangkaili odino diad sakey a kabyangay pamilya to,

48no alako la, wala niy kanepegan ton narondon. Say sakey ed saray agagi ton lalaki

49odino say pangamaen to odino say kapinsan to odino say sakey ed saray asingger a kanayon to so nayarin manondon ed sikato; odino no bilang ta akalmoy malaem, nayarin saliwen ton dili so kawayangan to.

50Nepeg a mikuintaan ed angaliw ed sikato, tan bilangen da so karakel na taon a manlapud samay impangilako tod sikaton dili ya anggad arapen a Taon na Panangipawil; say bili na pakabolus to nepeg ya ipara ra ed upa na toon miuupa.

51-52Nepeg ya ipawil toy parti na impanaliw ed sikato onung ed bilang na saray nakdaan a taon,

53a singa sikatoy tinaon ya inupaan. Nepeg ya ag pairapen na amo to.

54No ag narondon ed sayan polaing, sikato tan saray anak to et nibolus ed arapen a Taon na Panangipawil.

55Ag nayarin naaripen ya anggad angga so sakey ya Israelita lapud saray totood Israel et aripen ira na Katawan. Impaway to ra manlapud Egipto; sikato so Katawan a Dios da.