1Nen anengneng ko ya, tinmikleb ak ed dalin. Insan ko nadngel so bosis a kuanto, Sika a toon ompatey, alagey ka. Labay koy mitongtong ed sika.
2Nen mansasalita may bosis, linmoob ed siak so ispiritu na Dios tan impaalagey to ak, insan ko nadngel nin nansalita imay bosis,
3Sika a toon ompatey, ibaki ta ka ed saray totood Israel. Linmaban irad siak tan sinumpa ra ak tan itutuloy day onlaban ed siak, a singa ginawa na saray lalaki ra.
4Anawet so olo ra tan ag da ak gagalangen, kanyan ibabaki ta kan mangibagad sikara na labay kon ibagad sikara, siak a Katawan a Dios.
5Dengelen ka man o andi na saraman a totoon mananumpa ed siak, naamtaan da a sakey a propita so nibakid sikara.
6Balet sika a toon ompatey, ag mo ra tatakotan odino saray ibabaga ra. Sumpaen da ka tan pabaingan da ka; singa kad satan mimiamung ed saray alakdan. Ag mo tatakotan ira man a totoon mananumpa odino saray ibabaga ra.
7Ibagam ed sikaray amin a salitaen mo, dengelen da ka man odino andi. Nudnunot mon ontan lay isusumpa rad siak.
8Sika a toon ompatey, dengel moy ibabagak ed sika. Ag ka onsusumpan singa sikara. Sangi ka tan akan moy iter kod sika.
9Anengneng koy liman onaarap ed siak, tan sankabembenan toy nilokut a babasaen.
10Inlokas na samay lima imay babasaen, et anengneng ko a walay sulat ed nantopag. Nisulat diman iray akis na ermen, dageyem, tan sinagem.
Who We AreWhat We EelieveWhat We Do
2025 by iamachristian.org,Inc All rights reserved.
