SAY KAKABATAN NEN SOLOMON 14 - Maung a Balita Biblia (PnPV)(PnPV)

Say Kiew a Baloto nen Noe tan saray Kiew a Talintaoy Diriyos

1Ontan met, say sakey a toon mampaparaan a mambiahid madaluyon a dayat et onkerew na tulong ed sakey a poter na kiew ya aliwan mabiskeg a singa say bapor a magano to lan loganan.

2Walay toon namplano no panoy pakagawa na samay bapor, lapud pilalek ton pakalmoay kuarta, tan balibaliy impanggawa na sakey a toon marunong.

3Balet say panangasikasom, O Ama, so mangiwawanwan ed samay bapor; iitdan mo na dalan ya arawid kaatapan diad ibaliw tod saray daluyon na dayat.

4Nayarin onlad dayat iray totoo anggan anggapoy dunong dan mambaroy, lapud nayarian mo ran ilaban ed antokaman a kaatapan.

5Linawam a nepeg ya ikana iray bengatlan ginawam diad panamegley na kakabatan mo. Kanyan nayarin baliwen na saray totoo so dayat diad panamegley na sakey a baloto tan onsakbit iran anggapoy agawa, lapud imamatalek day bilay da ed samay melag a kiew.

6Onyay agawa nen saman a panaon, nen nanaandi so mapasirayew a poli na saray alan. Akabatik so toon ilalo na mundo diad panamegley na ontan a baloto diad panangiwanwan mo tan intilakan toy mundo na balon kailalakan a mangituloy na poliy katoowan.

7Walay sakey a bindision ed samay kiew a baloto nen Noe ya angyabuloy a mansiansia so inkatonung,

8balet walay sakey a samba ed talintaon ginawa na limay too. Wala met so sakey a samba ed samay manggagawa, lapud kikimeyen to yan manganggan bengatla, insan to tinawag a sakey a dios.

9Namparan kabosul na Dios iray totoon maoges tan sarayan maoges a bengatla.

10Dusaen na Dios iray bengatlan agawa tan saray totoon nanggawa.

11Kanyan ompelag ed saray paganon talintaoy diriyos so sintinsia na Dios, lapud anggaman ya agawa rad bengatlan pinalsa na Dios, nagmaliw iran makapataktakot a bengatlan mang kalut na saray kamarerwa da ray makulang-kulang a totoo.

Say Gapowan na Panangigalang ed saray Talintaoy Diriyos

12Ginmapo so inmoralidad nen agawa iray talintaloy diriyos. Dineral day bilay na too, nanlapu lad samay inmonan inkagawa ra.

13Aliwan wala lawas iray talintaoy diriyos, tan ag ira mansiansian anggad angga.

14Say panagpaatagey na too so makasengeg na inkiwala ra diad mundo, kanyan niplano so masiglat a pansamput da.

15Aminsan, walay sakey ya ama a mapalaloy inkaermenan to lapud ag inilaloan ya impatey na anak to, kanyan inggawaan to na talintao imay ogaw a biglan naandid sikato. Insan pinagalangan to a sakey a dios so sakey ya inatey a too, tan imbangat tod saray walad silong na pakaoley to iray maamut a sirimonya.

16Diad panaakar na panaon, nagmaliw a lalon malet yan maoges a kaogaliyan. Diad kaonuran, nagmaliw a ganggan tan nigagalang iray talintaoy diriyos, lapud ganggan da ray makapanyarin manoley.

17No manaayam ed arawdawin pasen iray totoo, et ag da nayarian a pagalangan so sakey ya ari ed arap to, balet et labay dan pagalangan, nudnunoten day nipaakar ed indengan to, insan da igawaan na talintaon isisipan dan kaparpara to.

18Saray atagey so pilalek dan managkorti a nanggawad sarayan talintao et sikaray angikayat na sayan panangigalang, anggan diad saray totoon ag da amta imay ari.

19Nayarin labay na sakey a managkorti a paliketen so sakey ya ari, kanyan ikana toy karunongan to a manggawa na talintaon maung niy nengneng to nen say samay dilin too.

20Insan mapalaloy kaayat na saray totoo ed kimey na samay managkorti, kanyan samay pinagalangan dan too nen saman et nagmaliw a diodiosen da natan.

21Nagmaliw ya makapatey a patit, lapud saray totoon maneermen, odino walad silong na pakaoley na ari, et mangala ra na saray bengatlan bato odino kiew, insan da itday galang a para labat samay Sakey a Dios.

Say Pansumpalan na Panangigalang ed saray Talintaoy Diriyos

22Anggapoy tonda na sayan inkagawa. Kulang so inkalingo ray totoo nipaakar ed pakaamtad Dios. Nambilay irad andi-tondan maoges a bakal, balet diad ag da impangikanay olo ra, tinawag dan kareenan.

23Pinapatey da ray ogogaw no wala ray awaten dan balon kabyangan na panangigalang da, nansisilibra ra na saray maamut a mistirio, tan nanggagawa ray sirimonyan katekep toy magolon panliliketan tan kagagawan sumpad inkatoo.

24Dinodotakan day bilay da tan say kasal da. Nayarin pateyen na sakey a laki so sananey a laki diad liputan odino paermenen to diad pikalugoran tod asawa na samay sananey a laki.

25Diad inerman a pasen, walay pateyan, takewan, palikdowan, deralan, traidoran, golowan, tilaan,

26panagtaktakot ed saray totoon anggapoy kasalanan, anggapoy panamirbir na maung a linawa, maoges ya ogali, aliwan panangikanad liket na laman, pansisian na sanaasawa, pikakaloguran, tan inmoralidad.

27Say panangigalang ed saray talintaoy diriyos, a nepeg ya ag balut bitlaen iray kangaranan da, et sikatoy gapo tan samput, pansengegan tan pansumpalan na amin a kaogsan.

28Saray totoon mangigagalang ed saraya et nanaandi so panagadya rad sikaran dili odino ipapasen dan propisiya iray tila, odino mambibilay irad kaogsan, odino mainomay dan ag tooren so salita ra.

29Mantitila ra a katekep na samba tan ag da iilaloan a nadusa ra, lapud anggapoy bilay iray talintaoy diriyos a panmamatalkan da.

30Balet diad kaonuran naabotan met lamlamang ira na dusa, lapud duaran makasengeg: onona, alingo ra nipaakar ed Dios nen inggalang da ray talintaoy diriyos, tan kumadwa, melmelag so panamabli rad inkasanto, kanyan nantitila ra a pamalikdo rad saray totoo.

31No mankasalanan iray totoon aliwan matonung, anapen ira na dusan kanepegan na saray makasalanan, aliwan say pakayari na bengatlan nansambaan da.