2 SARAY AWARAN 5 - Maung a Balita Biblia (PnPV)(PnPV)

1Nen asumpal nen Ari Solomon iray amin a kimey ed Timplo, inyan tod saray kuarton panagsinupan ed Timplo ya amin iray bengatlan insaklang nen ama ton David ed Katawansaray pilak, balituk, tan saray arum a kagawaan.

Niakar ed Timplo so Kaban na Sipanan(1 Ar. 8:1-9)

2Insan impaawit nen Ari Solomon iray amin a pangulo na saray tribu tan saray boleg na Israel a mankakasakey irad Jerusalem, ta iyakar dad Timplo so Kaban na Sipanan na Katawan manlapud Sion, say Siudad nen David.

3Nantitipon iran amin nen Pista na saray Abung-abung.

4Nen akapantitipon lan amin iray pangulo, inalsa na saray Levita so Kaban na Sipanan

5tan inyakar dad Timplo. Saray papari tan saray Levita inyalis da met ed Timplo so Tuldan Ayamay Katawan, tan amin a kagawaan to.

6Si Ari Solomon tan amin da ray totood Israel nantitipon irad arap na Kaban na Sipanan tan angibagat ira na amayamay a karniro tan baka ya ag ira nabilang lapud karakel da.

7Insan saray papari inawit dad dalem na Timplo so Kaban na Sipanan na Katawan tan inyan dad Sankasantosan a Pasen, diad silong na saray payak da ra may kirubin.

8Saray akabuskag a payak da ra may kirubin et asakbungan da may kaban tan saramay tiken a panagsakbatan.

9Siopamay toon manalalagey ed arap na Sankasantosan a Pasen nanengneng to ray ngoro na saramay tiken. Balet diad arum a pasen ag to ra nanengneng. (Wadman ni ra yan tiken ya anggad natan.)

10Anggapoy karga to may Kaban na Sipanan likud labat ed saramay duaran tapyak a bato ya inyan nen Moises diman nen walad Palandey na Sinai, nen akisipanan so Katawan ed saray totood Israel nen tataynanan day Egipto.

Say Kagalangan na Katawan

11-14Amin a paparin wadman, anggan anton grupoy kawalaan da, insaklang day sikaran dili. Amin da ray Levitan tumutogtog tan kumakanta a di Asaf, Heman, tan Jedutun tan saray kabyangay boleg da et akasolung iray linen a kawes. Nanalagey iray Levita ed abay na altar diad nibokig a dapag. Sankaawit da ray piangpiang tan saray arpa; tan kaiba da ray sanlasus tan duamplon papari a mamapaknul na trumpita. Saray kumakanta indayew day Katawan tan babansagan iray trumpita, saray piangpiang tan arum ni ran kagawaay musika. Kinanta ra:

Igalang yoy Katawan ta sikato et maung,

Tan mansiansia ed ando lan ando

so panangaro ton ag mangoman.

Legan a tataynan na saray papari so Timplo, biglan apano na lorem na Kagalangay Katawan, kanyan ag da la nituloy so pangigagalang da.