2 SAMUEL 5 - Maung a Balita Biblia (PnPV)(PnPV)

Si David Nagmaliw ya Ari ed Israel tan Juda(1 Awa. 11:1-9; 14:1-7)

1Insan amin a tribu na Israel linma rad kinen David diad Hebron tan kuandad sikato, Kadalaan tan kalamanan mo kami.

2Nen saman, anggan nen ari mi ni si Saul, impangulom ed bakal iray totood Israel, tan insipan ed sika na Katawan ya iwanwan mo ray totoo to tan oleyan mo ra.

3Kanyan amin a panguloy Israel linma rad kinen Ari David diad Hebron. Diad arap na Katawan akisipanan ed sikara, nilanaan da et nagmaliw ya ari na Israel.

4Talomploy taon nen David nen nagmaliw ya ari, tan nanoley na apataploy taon.

5Diad Hebron nanoley ed Juda na pitora tan kapalduan taon, tan diad Jerusalem nanoley ed intiron Israel tan Juda na talomplo tan taloy taon.

6Aminsan, namparaan si Ari David tan saray totoo to ya ondogpa ed Jerusalem. Abaloan na saray Jebusita, a sikaray manaayam diman, ya ag to nayarian a dakepen so siudad, kanyan inkuandad sikato, Ag ka dian balut makaloob; nayarian kan ag palooben na anggan saray bulag tan saray lopuy. (

7Balet dinakep nen David so tirinsira na Sion, kanyan nagmaliw ya atawag na Siudad nen David.)

8Diad saman ya agew inkuanen David ed saray totoo to, Wala rad sikayoy mamobosul ed saray Jebusita a singa pamobusul kod sikara? Nayarian yo ra kasin pateyen? Lakayo sirin tan dalan kayod dalan na danum. Dogpaan yo ra man a pangaskasiyan a bulag tan lopuy. (Sikayo yay makasengeg no akin et nikuan, Ag makaloob ed abung na Katawan iray bulag tan saray lopuy.)

9Kayarin adakep so tirinsira, nanayaman nen David tan inngaran to na Siudad nen David. Impaalagey toy siudad ed kaliber-liber na tirinsira; inggapo tod pasen a tinabonan diad bokig na pokdul.

10Pinmalalo lan pinmalalo so inkatalonggaring nen David, ta walad sikatoy Katawan a Dios a Makapanyarin-amin.

11Si Ari Hiram na Tiro angibaki na totoo to ed kinen David; initdan to na saray troson sidro, saray karpintiro tan saray kantiro ta ipaalageyan day sakey a palasio.

12Abirbir nen David ed satan a say Katawan inletneg ton manari ed Israel, tan papaaligwasen toy nanarian to a pankaabigan na saray totoo to.

13Kaalis nen David manlapud Hebron, angyamung ni tan angasawa ni na pigaran bibii ed Jerusalem, kanyan dinmakel iray anak ton bibii tan lalaki.

14Niay kangaranan da ray anak ton nianak ed Jerusalem: Samua, Sobab, Natan, Solomon,

15Ibhar, Elisua, Nefeg, Jafia,

16Elisama, Eliada, tan Elifelet.

Tinalo nen David iray Filisteo(1 Awa. 14:8-17)

17Nen nadngelan na saray Filisteo ya agawa lan arid Israel si David, linma ray sondalo ran manakep ed sikato. Nen nadngelan ya nen David, linmad pasen a niliber na padir.

18Akasabid Patar na Refaim iray Filisteo tan nanayam irad man.

19Tinepet nen David ed Katawan, Dogpaan ko ray Filisteo? Panaloen mo ak kasi?

Inmebat so Katawan, On, dogpaan mo ra! Panaloen ta ka!

20Kanyan linmad Baal-perazim si David, tan tinalo tod man iray Filisteo. Inkuanto, Singa sinelak na delap iray kalaban ko nen dinogpaan iray Katawan. Kanyan saman a pasen atawag na Baal-perazim.

21Tinaynan diman na saray Filisteo iray talintaoy diriyos da, et inaala ra nen David tan saray totoo to.

22Pinmawil ed Patar na Refaim iray Filisteo tan nanayam irad man lamet.

23Impanon lamet nen David ed Katawan, et say Katawan inmebat, Ag ka dia manlalapu no dogpaan mo ra. Saliberber ka tan dogpa kan manlapud biek a dapag, diad abay na saray kiew a balsamo.

24No narengel mod tagey na kakiewan so tanul na panaakar da ray sondalo, dogpa ka, ta wala ak ed onaan mo a mibakal ed saray sondalo na Filistia.

25Ginawa nen David so ingganggan na Katawan, tan pinasoner to ray Filisteo manlapud Geba ya anggad Gezer.