1Nen say arin Cananeo a manooley ed Arad diad abalaten na Canaan et nadngelan ton onsasabi ray Israelita tan ondadalan ira ed Atarim, dinogpaan to ra tan adakep toy pigarad sikara.
2Insan saray Israelita sinambaan dad Katawan: No panaloen mo kamin mibakal ed saraman a totoo, sigput min deralen iray siudad da.
3Dinengel ira na Katawan kanyan impanalo to ran akibakal ed saray Cananeo. Kanyan saray Israelita sigput dan dineral iray Cananeo tan saray siudad da. Horma so impangingaran dad saman a pasen.
Say Oleg a Gansa4Tinaynan na saray Israelita so Palandey na Hor tan nanakar ira ed dalan a mamaarap ed Dayat ya Akaba, pian nasaliberberan day dalin na Edom. Balet diad dalan ag la akaanos iray totoo
5tan nansalita ra sumpad Dios tan diad kinen Moises. Inkuandan nanriklamo, Akin et impaway mo kamid Egipto anta ompatey kami lamlamang diad kalawakan? Anggapo diay naakan odino nainom tan atama kami la ed sayan andi-kakanaan a kakanen!
6Insan say Katawan angibaki na saray nanditan oleg ed saray Israelita et amayamay so aketket tan inatey ed sikara.
7Sinmingger ed kinen Moises iray totoo tan kuanda, Nankasalanan kami nen nansalita kamiy sumpad Dios tan sumpad sika. Ipikasim pad Katawan ya ekalen to la ra yan oleg. Kanyan impikasi nen Moises iray totoo.
8Insan say Katawan imbaga tod kinen Moises a manggawa na gansan oleg tan ibitin tod sakey a teken, pian mambilay so siopaman ya aketket na oleg insan onnengneng ed gansan oleg.
9Kanyan nanggawa na gansan oleg si Moises tan imbitin tod sakey a teken. Siopaman ya aketket na oleg insan onnengneng ed samay gansan oleg, et mambilay.
Manlapud Palandey na Hor ya anggad Patar na saray Moabita10Inmalis iray Israelita tan nankampo ra ed Obot.
11Tinaynan da man a pasen insan nankampo ra ed Iye-abarim diad kalawakan a nibokig na dalin da ray Moabita.
12Insan ira nakampo ed Patar na Zared.
13Manlapud man inmalis ira lamet tan nankampo ra ed baybay a dapag na Ilog na Arnon, diad kalawakan a nasabi toy dalin da ray Amorreo. (Say arnon et ketegan da ray Moabita tan saray Amorreo.)
14Sikato yay makasengeg a sasalitaen na Libron Saray Bakal na KATAWAN so ...baley na Waheb diad dalin na Sufa, tan saray patar; say Ilog na Arnon,
15tan say palasur na saray patar a nasabi toy baley na Ar tan mamaarap ed ketegan na Moab.
16Manlapud man linma ra ed sakey a pasen a tatawagen na Beer a kabaliksan toy bobun a diman inkuan na KATAWAN ed kinen Moises, Pantitipon mo ray totoo, ta itdan ko ra na danum.
17Diad saman a panaon saray Israelita kinanta ra:
Bobun, papaway moy danum mo;
Et ilugay mi diad panamegley na sakey a kanta:
18Say bobun a kinotkot na saray prinsipi
Tan saray pangulo da ray totoo,
Diad panamegley na sitroy ari
Tan saray baston da.
Manlapud kalawakan inmalis ira ed Matana,
19tan manlapud man linma ra ed Nahaliel, tan manlapud Nahaliel inmalis ira ed Bamot,
20tan manlapud man inmalis ira ed patar a nasasakopan na saray Moabita, ya ososdongan na Palandey na Pisga, tan tantandagan toy kalawakan.
Say Impanalo da ray Israelita ed kindi Ari Sehon tan Ari Og(Deut. 2:26—3:11)21Insan saray totood Israel angibaki ra an pigarn totoo ed ari na saray Amorreo a si Sehon tan impaikuanda:
22Padalan mo kami pa ed dalin mo. Sikami tan saray ayayep mi et ag kami oniwas ed dalan, ag kami onlad kaalogan odino kaubasan mo, tan ag kami oninom ed saray bobun mo. Mampetek kamin mananakar ed maawang a dalan ya anggad nalabsanan miy nasasakopan mon dalin.
23Balet si Sehon ag to abuloyan ya ondalan ed dalin to iray Israelita. Tinipon to ray sondalo to tan pinmaway iran linmad Jahaz diad kalawakan tan dinogpaan da ray Israelita.
24Balet saray Israelita apatey da ray amayamay a kalaban da tan nanayaman day dalin da manlapud Ilog na Arnon ya anggad Jabok a kawalaan da ray Amonita lapud mabiskeg so ketegen da.
25Kanyan saray totood Israel adakep da ray amin a siudad na saray Amorreo, pati say Hesbon tan amin a kaliber-liber ton baley, insan da ra nanaayaman.
26Say Hesbon et manonan siudad na ari da ray Amorreo a si Sehon ya akibakal nen saman ed ari na Moab tan adakep toy intiron dalin to ya anggad Ilog na Arnon.
27Sikato yay makasengeg a saray umaanlong ikankanta ra:
Laka yod Hesbon, diad siudad nen Ari Sehon!
Labay min nanengneng a nipaalagey lamet tan napasimbalo.
28Nen saman manlapud sayan siudad na Hesbon
Pinmaway a singa apoy iray sondalo nen Sehon;
Dineral to so siudad na Ar diad Moab
Tan inoput toy kapokdulan na tagey na Arnon.
29Pakaskasi kayo la, sikayon taga Moab!
Aderal-deral kayo la, sikayon manangigalang ed Kemos!
Inyabuloy na dios yo a nadakep na arum a bansa iray lalaki,
Tan saray bibii adakep ira na ari na saray Amorreo.
30Balet natan aderal la ray kabyangay boleg da,
Manlapud Hesbon ya anggad Dibon,
Manlapud Nasim ya anggad Nofa a kaabay na Medeba.
31Kanyan saray totood Israel nanayam ira ed dalin da ray Amorreo,
32et si Moises angibaki na saray lalaki a mananap na sankaabigan ya idogpa rad siudad na Jazer. Adakep na saray Israelita yan siudad tan saray kaliber-liber ton baley tan pinataynan da ray Amorreo a manaayam diman.
33Insan sinmipa ray Israelita tan amaarap ira ed Basan, balet pinmaway si Ari Og na Basan tan saray sondalo to et dinogpaan da ra ed Edrei.
34Say Katawan kuantod kinen Moises, Ag kayo ontatakot ed sikato. Panaloen ta kayo ed sikato, amin a totoo to, tan dalin to. Gawa yod sikato so singa ginawa yo ed kinen Sehon ya ari da ray Amorreo a nanoley ed Hesbon.
35Kanyan pinatey na saray Israelita si Og, saray lalakin anak to, tan amin da ray totoo to; anggapoy inkera ran mabilay, insan da nanayaman so dalin to.
Who We AreWhat We EelieveWhat We Do
2025 by iamachristian.org,Inc All rights reserved.
