SAY KAKABATAN NEN SOLOMON 4 - Maung a Balita Biblia (PnPV)(PnPV)

1Maung nin walad sikay masimpit a panagbilay, anggaman a kabaliksan toy ag ka nawalaan na saray anak. Nabirbir na arum a totoo tan say Dios so masimpit a panagbilay mo, tan nanunotan kad anggad angga lapud satan.

2Say masimpit a panagbilay et mangiiter na maung a pangaligan na saray totoo; no naandi, anapen da. Sikato lawas so sankaabigan a tumang a nagamuran na sakey a too, tan mansiansian onya. Sikatoy sankamaungan ed amin da ray marakep a kagagawa na too.

3Anggan anto lay karakel na anak da ray ag da kanepegay manakdul, anggapod sikaray maung so pansumpalan to. Anak irad paway; ag iran balut makapangilira na malet a pundasion a para sikaran dili; ag balut makaaralem so lamut da.

4Singa ra saray kiew ya atapew so lamut da, a makapambulong iran magano, balet ipapalig-palig ira na dagem, tan babaguten ira na bagyo.

5Napopoter iray sanga ra kasakbayan iran ontakken; ag balut naluluto so bunga ra, tan anggapoy kakanaan da.

6No Agew na Okum, saray anak da ray ag da kanepegay manakdul et paneknekan day kasalanan na saray atateng da tan mantasi ra sumpad sikara.

7Balet makarumog na inawa iray totoon matonung, anggaman ya ompatey iran malangwer.

8Papagalangan tayoy inkatakken, balet aliwan lapu labat ya andokey so bilay na sakey a too.

9Say Kakabatan tan say inkatonung et tanda ra na inkadugay kalakal, a nepeg a katekep na inkatakken.

Say Oliran nen Enoc

10Aminsan walay lakin manngaran na Enoc a makapaliket ed Dios, tan inaro na Dios. Nen mambibilay ni si Enoc a kaiba to ray makasalanan, inala na Dios,

11pian ag narotakan so kanunotan tan kamarerwa to na kaogsan tan tila. (

12Amta tayon amin a diad mapalalon kakaayat na saray totoo ed kaogsan, ag da la nabirbir no antoy maung, anggaman a walad arap da. Saray totoon anggapoy kasalanan et nayarin narotarotakan ira na maoges a pilalek, kanyan anggapoy arum a nanunotan da no ag say labay da.)

13Agawaan na sayan toon Enoc ed pigaran taon so inkayadyari ya ag nagawaan na arum a totoo ed intiron bilay da.

14Akaliket so Katawan ed bilay nen Enoc tan impaway ton tampol ed sayan maoges a mundo. Amta na saray totoo so intaynan to, balet ag da atalusan. Ag dan balut naaralan

15a mapangasi tan maabagey so Dios ed saray dilin totoo to; iyaagel to ray totoon pinili to.

Say Pansumpalan na saray Totoon Maoges

16Anggan inatey tan naandi la ray totoon matonung, papabaingan da ray totoon maoges a mambibilay ni. Saray tobun-balon akarapat la na inkayadyari et ipelag dad kababaingan iray mamatakken a totoon maoges.

17Nayarin ompatey a malangwer iray totoon makabat, balet ag balut natalusan na saray totoon maoges a sikato yay polaing na Dios a pangekal tod sikarad kaatapan.

18Leleglemewen day impatey na toon makabat, balet ag mabayag elekan ira na Katawan. No ompatey ira, ag ira naitdan na mapagalang a pompon. Andi-anggaan a balawen tan pakaingungotan ira na anggan saray inaatey.

19Ibantak ira na Dios ed dalin tan gawaen to ran ag makasalita. Magmaliw iran bunton na deral-deral, a singa saray paalagey ya ayakayak iray pundasion da. Sikaray napairap. Ag mabayag nalingwanan la ra na saray totoo.

20Ondago ran natatakot ed Okum, a pakabilangan na saray kasalanan da; manalagey iran sinintinsiaan na saray dilin kagagawa ran sumpad ganggan.