LEVITICO 20 - Maung a Balita Biblia (PnPV)(PnPV)

Saray Dusa na Kasusumlang ed Ganggan

1-2Say Katawan kuantod saray Israelita diad panamegley nen Moises, Siopaman ed sikayo odino siopaman a sangkailin manaayam ed kawalaan yo a mangiter na anak to, ta ikanad pangigalang ed diyos-diyos a Moloc, et nepeg a tupaken na amin a katoowan ya anggad ompatey.

3No walad sikayoy mangiter ed Moloc na sakey ed saray anak to tan dotakan toy masanton Tuldak tan ipelag ton kababaingan so masanton ngaran ko, sumpaen ko tan ag ko la ibilang a sakey ed saray totook.

4Balet no palabasen na katoowan so ginawa to tan ag da pateyen,

5siak a dili so onsumpad sikato tan amin a kabyangan na pamilya to tan sumpaen ko met iray amin a mikasakey ed insumlang tod siak diad impangigalang tod Moloc. Ag ko la ra ibilang a totook.

6No walad sikayoy onkerew na simbawa ed saray midium tan diad saray manangipanon ed saray ispiritu na inaatey, sumpaen ko tan ag ko la ibilang a sakey ed saray totook.

7Nepeg a masanto kayo ta siak so Katawan a Dios yo.

8Sumpal yo ray ganggan ko, lapud siak so Katawan a mamapasanto ed sikayo.

9Say Katawan inter to ray onggendan a totontonen. Siopamay mangisamba na ama to odino ina to et nepeg a pateyen; sikaton dili so makasengeg na ipatey to.

10No say sakey a too et mikaloguran ed asawa na kapara ton Israelita, sikato tan say biin akikaloguranan to et nepeg iran pateyen.

11Say lakin miakdul ed sakey ed saray asawa na ama to ipelag tod kababaingan so ama to, tan sikato tan say biin akiakdulan to et nepeg iran pateyen. Sikaran dili so makasengeg na ipatey da.

12No say sakey a laki et miakdul ed manugang to, nepeg iran pateyen a dua. Maoges a tuloy so ginawa ra tan sikaran dili so makasengeg ed ipatey da.

13No say sakey a laki et miakdul ed kapara ton laki, nanggawa ran dua na kabandayan tan nepeg iran pateyen a dua. Sikaran dili so makasengeg na ipatey da.

14No say sakey a laki et asawaen toy sanina, nepeg iran poolan a talo ya anggad ag da ipatey lapud maoges a tuloy so ginawa ra; ag yo ya aabuloyan a nagawad sikayo.

15No say sakey a laki et misiping ed ayep, sikato tan say ayep ya akisipingan to et nepeg iran pateyen.

16No say sakey a bii et pasipingan ed ayep, sikato tan say ayep ya akisipingan to et nepeg iran pateyen. Sikaran dili so makasengeg na ipatey da.

17No say sakey a laki et asawaen toy agi ton peteg odino say agi tod ama o ina, nanggawa ran duay kababaingan, tan nepeg iran pataynanen ed olupan da ray Israelita. Akiakdul ed agi to kanyan nepeg ya akoen toy dusa na ginawa to.

18No say sakey a laki et miakdul ed biin naliliberan nepeg iran pataynan ed olupan da ray Israelita, lapud sinumpa ray totontonen nipaakar ed inkarotak onung ed ganggan.

19No say sakey a laki et miakdul ed panginaen to, nepeg ya akoen day dusa lapud maoges a tuloy so ginawa ra.

20No say sakey a laki et miakdul ed asawa na pangamaen to ipelag tod kababaingan so pangamaen to tan sikato tan samay biin akiakdulan to et nepeg iran dusaen; ag ira nawalaan na anak.

21No alaen na sakey a laki so asawa na agi to, ompatey iran dua ya anggapoy anak. Nanggawa may laki na karotakan onung ed ganggan tan impelag tod kababaingan so agi to.

22Say Katawan kuanto, Onur yo ray amin a ganggan tan amin a bilin ko, pian ag kayo ipolisay na dalin na Canaan a pangyaakaran kod sikayo.

23Ag yo aaligen iray kagagawa na saray totoon manaayam diman; pataynanen ko ra may paganon totoo pian makaloob kayo. Lapud saray maoges a gagawaen da, pinaingungot da ak.

24Balet insipan kon kayaryanen yo man a mataba tan mayaman a dalin, kanyan iter kod sikayo. Siak so Katawan a Dios, tan siak so angibiig ed sikayo ed saray arum a bansa.

25Kanyan nepeg yon pambiigan iray ayayep tan saray manok a malinis tan saray marotak onung ed ganggan. Ag yo kakanen iray marotak ya ayayep odino saray manok. Sinintinsiaan ko la ran marotak, tan magmaliw kayon marotak no kanen yo ra.

26Nepeg a masanto kayo tan siak labat so akankayaryan ed sikayo, lapud siak so Katawan tan masanto ak. Imbiig ta kayo ed saray arum a bansa pian sikayo labat so kayaryan ko.

27Siopamay laki odino biin mangipanon ed saray ispiritu na inaatey et nepeg a tupaken ya anggad ag to ipatey; siopaman a manggawad saya sikaton dili so makasengeg na ipatey to.