SIRAC 19 - Maung a Balita Biblia (PnPV)(PnPV)

1No gawaen mo ya, ag kan balut onyaman; no ag mo isingansingan iray ankekelag a bengatla, mankalkalnan deralen moy sikan dili.

2Say alak tan saray bibii panggawaen da ray totoon makalakal na maoges iran bengatla. Magmaliw lan magmaliw ya anggapoy adya so lakin arapen to ray marotak a bibii,

3et sayan panagbilay ya anggapoy adya so makasengeg na ipatey to. Kanen na saray bigis so naboboluk a laman to.

4Inkakulang-kulang so panmatalek a tampol ed saray totoo. No mankasalanan ka, papasakitan moy sikan dili.

5No panliketan mo so kaogsan, nasintinsiaan kay dusa.

Say Panagsalitan Anggapoy Adya

6Paliisan moy pansalita na andi-kakanaan, et napaliisan moy dakel a gunigon.

7Ag mon balut ooliten ya ibaga so narerengel mo, et anggapoy pagbabawian mo.

8Ag mo ibabagad saray kakaarom odino saray kalaban mo, likud no pakapankasalanan mo so ag mo pangibaga.

9Nudnunoten na siopaman a makadngel ed sika, et ag mabayag kabosulen to ka lapud nadngel to.

10Akadngel ka lay labir ya anggapoy katwaan to? Ememan mod sikan dili labat. Mampasebeg ka! Ag to ka pateraken.

11Say toon makulang-kulang ya eememan toy nepeg ya iyamut et manliliknay kairapan a singa biin mampapasakit.

12Diad oras a makadngel na iyaamut, singa panan nipanek ed ulpo to.

13No narengel mon nanggawa na makapoy so sakey a kaaro, tepetan mo na nipaakar ed ginawa to. Nayarin aliwan tuay nadngel mo. No tua, ag to oliten a gawaen.

14No narengel mon walay imbaga na sakey a kaabay, tepetan mo na nipaakar ed imbaga to. Nayarin ag to imbaga. No imbaga to, ag to la oliten ya ibaga.

15No narengel moy bengatlan makapoy a nipaakar ed sakey a kaaro, tepetan mo na nipaakar ed nadngel mo. Nayarin tilay nadngel mo. Ag mo sisisiaen ya amin so narerengel mo.

16Nayarin mangibagan bengatbengat so sakey a too na bengatla, balet et panggagalaw to labat. Akapankasalanan so balang too nipaakar ed saya.

17No makarengel kay bengatlan pakapasnukan mo ed kaabay mo, tepetan mo na nipaakar ed nadngel mo kasakbayan a taktakoten mo. Ipalimam la yad Ganggan na Sankatagyan.Pamirbir ed Tuan Kakabatan

20Takotan moy Katawan tan sumpal mo ray Ganggan to; sikato yay labay ya ibaga a Kakabatan.

22Nayarin naamtaan moy amin ya amtaen nipaakar ed kaogsan, balet ag to ka tan pagmaliwen a makabat. Andid kalakal so itombuk ed simbawa na saray makasalanan.

23Nayarin ikana so inkasilib ed maoges iran getma, balet wala ray totoon singa makulang-kulang so kagagawa ra lapud anggapoy amta ra.

24Maung ni nen say sankasiliban a makasalanan so sakey a toon matonung, anggaman ya aliwan maotek.

25Nayarin mapalalon tuay inkasilib mo balet matila ka; nayari met ya alaen moy labay mo diad panamegley na aliwliwan pitotoo.

26Insan wala ray totoon maoges a manliliber a nengneng day masansanto tan maerermen, balet papalikdoen da ka labat.

27Ilingaw day lupa ra ed biek tan konwarin ag da ka narerengel, balet anamutan day pankanawnawa rad sika no ag mo iilaloan.

28No ag ni ra makapankasalanan natan lapud walay makasengeg, diad ononan pankanawnawa ra gawaen da.

29Naamtaan mo no siopa so sakey a too diad panamegley na nengneng to. Diad ononan pannengneng mod sikato, nibagam no walay kalakal to.

30Nipapanengneng so ogali to diad panamegley na panangawes to, say kakaelek to, tan say panangakar to.