JEREMIAS 48 - Maung a Balita Biblia (PnPV)(PnPV)

Say Inkaderal na Moab

1Sikato yay inkuan na Katawan a Makapanyarin-amin nipaakar ed Moab:

Kaskasian iray totoo ed Nebo

aderal so baley da!

Adakep so Kiryataim,

ageba so mabiskeg a tirinsira to,

tan abaingan ed kababaingan iray totoo to;

2naandi lay kagalangan nen Moab.

Adakep na saray kalaban so Hesbon tan mankokomplut iran maneral ed bansa na Moab.

Ag makaesel so baley na Madmen;

onsulong iray sondalo sumpad sayan baley.

3Oneeyag iray totood Horonaim,

Panagduksa! Panagderal!

4Aderal so Moab;

dengel yo ray ogogaw a manakakis.

5Diad dalan a mamaatagey ed Luhit

dengel yoy pandageyem da;

diad dalan a mamaleksab ed Horonaim,

dengel yoy pannangnangis dad kaermenan.

6Ganatan yo, iyagel yoy bilay yo! kuanda.

Batik kayon singa asnod kalawakan!

7Moab, nanmatalek kad biskeg tan kayamanan mo,

balet natan pati sika so naalan nadakep,

naalan nibantak ed arum a bansa so dios mon Camos,

naala met iray pati prinsipi to tan saray papari to.

8Anggapoy anggan sakey a baley a makapaliis ed panagderal;

naderal iray patar tan kaalogan.

Siak, say Katawan, so nansalita.

9Iparaanan yoy pantion so Moab;

ag mabayag naderal la;

Nataynan ya aderal-deral iray baley to,

tan anggapo lay manayam diman.

(

10Nisamba so toon ag mankolin mankimey para Katawan! Nisamba so toon ag to ikakanay ispada tod pampatey!)

Aderal iray Siudad na Moab

11Say Katawan inkuanto, Arawi lawas ed kaatapan so Moab, tan ag balut nibantak ed arum a bansa. Say Moab et singa alak ya ag nagagalaw ed akapanginan tan ag balut nibabales-bales ed nandodoman pasig. Ag balut aderal so taway to tan ag naomay samit na taway to.

12Kanyan sirin, onsabiy oras a mangibaki ak na saray totoon mangibung ed Moab a singa alak. Paekatan da ray pasig ton pananginay alak, insan da ra mekmeken.

13Diad satan saray taga Moab ibaing day dios dan Camos a singa samay inkabaingan da ray Israelita ed Betel, sakey a dios a nanmatalkan da.

14Lalakin taga Moab, akin et ipapasen yoy sikayon dili a palbayani,

masebeg a sondalon asali la rad bakal?

15Aderal so Moab tan saray siudad to;

apatey iray sankamaungan a mamalangwer ton lalaki.

Siak so ari a Katawan a Makapanyarin-amin,

tan siak so nansalita.

16Onsasabi lay kadusa na Moab;

magano lan onsabi so kaderal to.

17Panermenan yo man a bansa, sikayon manaayam ed kaliber-liber to.

Amin yon makaamta ed inkabantug to;

Kuanyo, Apoter lay makapanyarin panooley na Moab;

naandi lay kagalangan tan biskeg to.

18Sikayon manaayam ed Dibon,

epas kayod tad pasen a kawalaay kagalangan yo

tan yorung kayod dabuk;

wadya lay managderal na Moab,

tan dineral to ray tirinsira to.

19Sikayon manaayam ed Aroer,

manalagey kayod gilig na dalan tan manalagar kayo;

tepetan yo ray ontataynan no antoy agawa.

20Naplag la so Moab, so iyebat da,

nangisan yo; napelag lad kababaingan.

Ibawag yod gilig na Ilog na Arnon

ya aderal la so Moab!

21Sinmabi lay sintinsia ed saray siudad ed patar; diad Holon, Jahzah, Mefat,

22Dibon, Nebo, Bet-diblataim,

23Kiryataim, Bet-gamul, Bet-meon,

24Kiryot, tan Bosra. Sinmabi lay sintinsia ed amin da ray siudad na Moab, arawi may asingger.

25Nakal lay biskeg na Moab, aderal lay pakayari to. Siak, say Katawan, so nansalita.

Napaabeba so Moab

26Inkuan na Katawan, Buek yo so Moab, ta linmaban ed siak. Pandokulan toy dilin ota to, tan elek-elekan na saray totoo.

27Moab, nanunotan mo no panoy impanluludlurey mod saray totood Israel? Impapasen mon kaolup ira na saray matakew, kanyan mameyeng-peyeng ka kapag nasalitam ira.

28Sikayo ran taga Moab, taynanan yo ray baley yo! Laka yon manayam ed saray diking na kapalandeyan! Alig yo ray palekpek-punay a manobung ed saray gilig na kelas.

29Mapalalon mapaatagey so Moab! Nadngelan kon mapaatagey, ag mangitaltalek, tan malastug iray totood Moab. Atagtagey so panangipasen dad sikaran dili.

30Siak a Katawan amtak so inkamapaatagey da. Andi-kakanaan so panagpaatagey da tan ag mansiansia ray gagawaen dan bengatla.

31Kanyan nangisan kon amin iray taga Moab tan saray totood Kireres.

32Mapalalo niy pannangis kod saray taga Sibma nen saray taga Jazer. Siudad na Sibma, singa ka ubas a saray sangam et labsanan day Inatey a Dayat tan sabien day Jazer. Balet natan aderal iray bungam ed panaoy tiagew tan saray masasamit ya ubas mo.

33Naandi ray liket tan gayaga ed mabonan dalin na Moab. Ag ko la papaagosen so alak a manlapud panagpespesan na ubas; anggapo lay manggawa na alak tan anggapo la ray oneyag ed liket.

34Maneeyag iray totoon taga Jesebon tan Eleale, tan narengel ya anggad Jahaz so eyag da; narerengel na saray taga Zoar, Horonaim, tan Eglat-selisiya. Nakatan so anggan say Kolus na Nimrim.

35Patondaen ko ray taga Moab ed pangisasaklang dad saray bagat a popoolan diad saray pasen na panangigalangan da tan say pangibabagat dad saray diriyos da. Siak, say Katawan, so nansalita.

36Singa ak toon manotogtog ed plauta na sakey a togtog a para tolur diad pannanangis kod Moab tan saray totood Kireres, ta naandi ya amin so kayaryan da.

37Kinikiskisan dan amin so olo ra tan pinopotut day balbas da. Sinasalger day kalimaan da tan nankakawes na sako so balang sakey ed sikara.

38Diad amin a toktok na abung ed Moab tan diad amin a plasa to, akis na kaermenan labat so narerengel lapud binetag kon singa pasig so Moab kanyan anggapo lay malabay.

39Abetag-betag lay Moab! Eyag kayo! Naplag lad kababaingan so Moab. Aderal la, tan luludlureyan na amin a kaliber-liber ton bansa. Siak, say Katawan, so nansalita.

Ag Makabatik so Moab

40Say Katawan insipan to a sakey a bansa so onsibar a singa agila ed Moab ya akabuskag iray payak to,

41tan nadakep iray baley tan saray tirinsira. Diad satan ya agew ontakot a singa biin mampapasakit iray sondalo na Moab.

42Naderal so Moab tan magmaliw ya aliwa lan bansa, lapud linmaban ed siak.

43Onsabiy takot ed saray taga Moab tan manaalagar ed sikara iray abut, tan saray patit. Say Katawan so nansalita.

44Siopamay ibatikan toy takot napelag ed saray abut, tan siopamay makaagwat ed saray abut naalad saray patit, ta ingganak lay panaon na pakaderal na Moab.

45Saray totoon pangaskasiyan ya akabatik salien day paiyagel ed Hesbon, say siudad ya aminsan inoleyan nen Ari Sihon, balet napopoolan. Tinemek na apoy iray tirinsira tan saray kapalandeyan na saray totood Moab a maliket irad bakal.

46Pangaskasiyan iray taga Moab! Inaatey iray totoon angigalang ed dios a Camos, tan nalan priso iray anak dan lalaki tan bibii.

47Balet diad saray agew ya arapen say Katawan pagmaliwen ton maaligwas lamet so Moab. Sikato yay sintinsia ya inter na Katawan ed Moab.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help