SIRAC 18 - Maung a Balita Biblia (PnPV)(PnPV)

Say Inkatalonggaring na Dios

1Say Katawan, a mambibilay ya ando lan ando, et pinalsa to so sansinakuban,

2tan sikato labat so matonung.

4Ag to initdan so siopaman na pakayarin makapangipaliwawa no anto ray ginawa to, tan anggapoy sigput a makasokay.

5Siopay makasukat na ontan lan kabaleg na pakayari to? Siopay sigput a makapangipaliwawa na saray mapangasin gawgawa to?

6Anggapoy nayarian tayon iyarum ed sikara; ag tayo ra nayarian a bawasan. Anggapoy polaing na pantalus na makapakelaw iran bengatla a ginagawa na Katawan.

7No asabi tayo lay samput na istoria, ag tayo ni anggan nigapo; ag tayo amtay ibaga tayo.

Anggapoy Kakanaan so Too

8Anto so too? Antoy kana to? Say kamaungan a gagawaen tosay kaogsan a gagawaen toantoy kabaliksan dan amin?

9No mambilay so too na sanlasus a taon, nidoman dokey na bilay so impanbilay to,

10balet no ipara ed intiron ando lan ando, saraman a taon et singa ra sakey a terter na danum ed dayat, singa sakey a buer.

11Sikato yay makasengeg ya ontan lay anos na Katawan ed sikatayo, no akin et mabolbolus so panangasi to.

12Onnengneng ed sikatayo tan amta to a mansumpal itayod patey; sikato yay makasengeg a maliket a mamirdonad sikatayo.

13Nayarin aroen na sakey a too so kabat to, balet inaro na Katawan ya amin iray katoowan. Pepeteken to itayo; pepegetan to itayo; ibabangat to itayo. Ipapawil to itayo ed sikato a singa pumapastol ya aasikasoen to ray karniro to.

14Kasian to itayo no awaten tayoy panangiwanwan to tan pampilalekan tayon ipanengneng tod sikatayoy pakalilingoan tayo.

Panangasi tan Panagabagey

15Anak, no tulongan moy sakey a too, ag mo pamapasnukan met. No mangiter kay rigalo, ag ka mangibabalikas na antokaman a makapasakit.

16Ambelat ni ray salitam nen saray iiter mo. Anggan say linaew mangiiter na inawa no panaoy ampetang.

17On, dakel niy nagawaan na marakep iran salita nen saray sankaabigan a rigalo, et no tuan walay panangasim iter mo ran dua.

18Inkakulang-kulang so ag pangasi tan pamabaing. Ag linggisen na siopaman so rigalon aliwan mabolus a niiter.

Say Panokay na Sikan Dili

19Amtaen mo nin onona so labay mon ibaga kasakbayay pansalitam, tan asikasom so laman mo kasakbayan kan mansakit.

20Sokayan mo nin onona so konsinsiam kasakbayay panintinsia na Katawan ed sika; diad ontan, pirdonaen ka na Katawan no onsabiy panintinsia to.

21Mampaabeba ka kasakbayay pakaiter ed sikay dusan sakit. No nankasalanan ka, ipanengneng moy pagbabawim.

22No mansipan kad Katawan, sumpal mon masaksakbay. Ag mo aalagden a patey-pateyan ka la, insan mo sumpalen.

23Balet kasakbayay pansipan mo, mamparaan kan manumpal. Ag mo susubokey anos na Katawan.

24Mannunot ka! Labay mon ampetang so olo tod sika diad agew na ipatey mo?

25No wala lay amin a nakaukolan mo, nunot mo no antoy kipapasen na narasan, antoy kipapasen na mairap-bilay.

26Nayarin naoman iray bengatla diad loob na sanagew; nayarian na Katawan so onggalaw a masiglat.

27No makabat ka, maalwar ka ed amin a gawaen mo. No walad kaliber-liber moy kasalanan, alwaran moy ag mo pakapankasalanan.

28Nabirbir na balang maotek a too so kakabatan tan pagalangan toy balang toon mangipapanengneng na Kakabatan.

29No panliketan moy kakabatan no narengel mo, magmaliw kan makabat, tan magmaliw a panlapwan na kakabatan a para arum a totoo iray salitam.

Panagadyad Sikandili

30Ag ka papaoleyan na maoges a liknaan mo; adyaan mo ray maoges a pilalek na laman mo.

31No abuloyan mon napenek so amin a pilalek mo, elekelekan ka na saray kalaban mo.

32Ag ka mambibilay na sawasawaan ta deralen to ka.

33Ag mo pagmamaliwen so sikan dili a mipapayabol diad panggastos mo na alablabas ed baleg a ponsia lapud panutang mo, ta anggapoy malaem a kuartam.