SAY KAKABATAN NEN SOLOMON 1 - Maung a Balita Biblia (PnPV)(PnPV)

Say Pananap na Inkatonung

1Aro yo so inkatonung, sikayo ran manoley ed mundo. Iyapasakey yon masimoon ed Katawan so kanunotan yo, tan anap yon matwa so Katawan.

2Narumog na saray ag manusubok ed sikato; ipaamta toy sikaton dili ed saray manmamatalek ed sikato.

3Saray totoo et isisian irad Dios na saray pikewet a kanunotan, tan no makulang-kulang itayon manubok ed sikato, say pakayari to ipelag to itayod kababaingan.

4Ag balut manayam so Kakabatan ed siopaman a toon managpalikdo odino aripen na kasalanan.

5Naaralan na siopaman a masanto so onarawi ed saray totoon managpalikdo. Ontaynan la no nibabalikas iray makulang-kulang a kanunotan; aliway liknaan to no nagagawa so ag inkatonung.

Amta na Dios so Ibabalikas tayo

6Say Kakabatan et sakey ya ispiritun makaaro ed saray totoo, balet ag to pirdonaen so siopaman a mansasalita na sumpad Dios, ta amta na Dios iray liknaan tan saray kanunotan tayo, tan narerengel toy balang salita tayo.

7Bangta papanoen na ispiritu na Katawan so intiron mundo, tan pankakasakeyen ton amin iray walad mundo, amta to so balang salita ya ibabalikas na saray totoo.

8Anggapoy toon mansasalita na maoges ya ag naimano na arum; ag mabayag awaten to so manepeg a dusa.

9Nasalaysay a mapeget iray getma na totoon maoges; nidalem ed Katawan iray salita ra, insan naawat day dusan kanepegan na kaogsan da.

10Ag iyabuloy na Dios a walay onlaban ed sikato, tan bangta narerengel toy amin a bengatla, ag mo niamut ed sikato so panririklamom.

11Kanyan ag ka onliliber a manririklamo, ta anggapoy nagawaan to yan kamaungan tan ag ka mansasalita na anagasang. Walay pansumpalan na saray sankaamutan a sasalitaen mo, tan deralen na panagtila so kamarerwam.

Ag Pinalsa na Dios so Patey

12Ag yo aanapen so dilin ipatey yo diad panamegley na saray gawan makasalanan.

13Ag pinalsa na Dios so patey, tan no ompatey iray mabilay a pinalsa, ag to pakaliketan.

14Pinalsa toy amin a bengatla pian mansiansia ran mambilay, tan maung tan marakep so amin a bengatlan pinalsa to. Anggapod sikara so makapatey a samal. Ag ooleyan na patey iyan mundo,

15ta ag ompatey so inkatonung na Dios.

16Saray totoon maoges et inawit dad sikaran dili so patey diad panamegley na saray bengatlan imbabaga tan ginagawa ra. Pampipilalekan day patey a singa pampipilalek ed sakey ya inaro. Akiambus irad patey, kanyan sikatoy kanepegan dan kaiba.