2 SAMUEL 22 - Maung a Balita Biblia (PnPV)(PnPV)

Say Kanta nen David nipaakar ed Impanalo to(Sal. 18)

1Sikato yay kinanta nen David ed Katawan nen inyagel na Katawan ed kinen Saul tan saray arum a kalaban to:

2Say Katawan so manangilaban ko;

sikatoy mabiskeg a tirinsirak.

3Say Dios ko so manangyagel ko,

tan no kaibak anggapoy pagpagak.

Sikatoy singa samper a manasanib ed siak;

iyaagel to ak tan iyaarawi to ak ed kaatapan.

Sikatoy manangilaban ko;

iyaagel to ak ed antokaman a maoges ya onsabid siak.

4Ontatawag ak ed Katawan,

et iyaagel to ak ed saray kalaban ko.

Idayew yoy Katawan!

5Walad kaliber-liber ko so kaatapan na patey;

saray daluyon a managderal tinatabunan da ak.

6Walad kaliber-liber ko so kaatapan na patey

tan say lobuk intaryaan to ak na patit.

7Nen asabian ak na segsegang, tinmawag ak ed Katawan;

kinmerew ak ed Dios ko na tulong to.

Diad dalem na timplo to, dinengel toy bosis ko;

dinengel toy ikekerew koy tulong.

8Insan ginmiwgiw tan yinmegyeg so dalin;

ginmalaw tan ayegyeg iray pundasion na katawenan,

ta amasnuk so Dios!

9Pinmaway so asewek ed eleng to,

pinmaway so manliub ya apoy tan mandarlang a ngalab ed sangi to.

10Inlokiab toy tawen insan inmakseb,

walay makapal a lorem ed silong na saray dapan to.

11Kinmabayod kirubin to insan tinmikyab;

linmogan ed saray payak na dagem.

12Nankobut na bilonget;

aliber na makapal a lorem a napnoy danum;

13pinaapoy na kirmat ed arap to iray mandarlang a ngalab.

14Insan manlapud tawen, kinmarul so Katawan;

tan nadngel so bosis na Dios a Makapanyarin-amin.

15Ataytayak iray kalaban to nen pinapana to ra;

diad panamegley na kirmat, pinapakoyat to ra.

16Pinmaway so dalem na dayat,

tan alokasan iray pundasion na mundo,

nen nampasnukan na Katawan iray kalaban to,

tan ineyagan to ray maksil lapud sanuk to.

17Manlapud tagey, say Katawan ginawat to ak tan binembenan to ak;

inagwat to ak ed araldalem a danum.

18Inyagel to ak ed saray makapanyarin kalaban ko,

tan amin da ray mamobosul ed siak,

ta ag ko nayariay ontan lan inkabiskeg da!

19Dinogpaan da ak nen maniirap ak,

balet inyagel ak na Katawan.

20Inekal to ak ed kaatapan;

inlaban to ak, ta makaliliket ed siak.

21Tutumangan ak na Katawan lapud matonung ak;

bibindisionan to ak lapud anggapoy kasalanan ko.

22Tinoluk koy ganggan na Katawan;

ag ko imbeneg so Dios ko.

23Inonur koy amin a ganggan to;

ag ko impolisay iray bilibilin to.

24Amta ton anggapoy kasalanan ko,

tan inaarawian koy kaogsan.

25Kanyan tutumangan to ak lapud matonung ak,

tan lapud amta ton anggapoy kasalanan ko.

26Matoor ka, Katawan, ed saray matoor ed sika,

tan nagnap so inkamaung mod saray totoon ayadyari.

27Malinis so ipapatnag mod saray malinis so panagbilay da,

balet mapasnuk kad saray maoges so panagbilay da.

28Iyaagel mo ray totoon mauyamo,

balet papaabebaen mo ray mapaatagey.

29Sika, Katawan, so liwawak;

papaliwawaen moy bilonget ko.

30Iitdan mo ak na biskeg ya ondogpad saray kalaban ko,

tan pakayari a manakep ed saray tirinsira ra.

31Ayadyari ray gawa na sayan Dios,

napanmatalkan iray salita to!

Aliling toy samper

ed amin da ray pa paiyagel ed sikato.

32Bukbukor na Katawan so Dios;

say Dios labat so manangyagel tayo.

33Sayan Dios so mabiskeg a salimbeng ko,

eekalen toy kaatapan ed dalan ko.

34Gagawaen to ak a singa impansaliy ulsa;

iyaarawi to ak ed kaatapan diad kapalandeyan.

35Babangatan to ak ed pibabakal,

pian nayarian kon ikanay sankabiskegan a pana.

36 Katawan, iyaagel tan ilalaban mo ak;

lapud pananulong mo nagmaliw ak a matalonggaring,

37Ag mo ak inabuloyan ya adakep,

tan ag ak balut atumba.

38Osilan ko ray kalaban ko et tataloen ko ra;

ag ko ra tondaan ya anggad ag ko ra napatey.

39Pepekpeken ko ra, et ag ira makabangun;

natutumba ran atalo ed saliyan ko.

40Iitdan mo ak na biskeg a mibakal,

tan pananalo ed saray kalaban ko.

41Pababatiken mo ray kalaban ko;

papateyen ko ray mamobosul ed siak.

42Onkekerew ira na tulong,

balet anggapoy mangilaban ed sikara,

mikakasi rad Katawan, balet ag to ra ebatan.

43Memekmeken ko ra,

et magmamaliw iran singa dabuk.

Gagatinan ko ran singa pitek ed saray dalan.

44Inliktar mo ak ed saray totoon mananumpa,

tan impansiamsiam so panooley kod saray bansa;

panlilingkuran ak natan na saray totoon ag ko kabat nen saman.

45Dadakmomoan ak na saray totoon taga arum a bansa;

no narengel da ak, ononur ira.

46Onkakapoy so linawa ra

tan manggiwgiw iran onsisingger a manlapud saray tirinsira ra.

47Say Katawan et mabilay! Idayew yoy manangyagel ko!

Ibawag yoy talonggaring na mabiskeg a Dios a mangilalaban ed siak!

48Panataloen to ak ed saray kalaban ko;

tataloen to ray totoon walad silong na pakaoley ko;

49tan ililiktar to ak ed saray kalaban ko.

Katawan, sikay mangiiter ed siak na pananalo ed saray kalaban ko

tan sikay mangyaagel ed siak ed saray maruksan totoo.

50Kanyan idadayew ta ka diad pegley da ray bansa;

kakantaan ta ka na panangidayew.

51Say Dios mangiiter na pananalo ed arin impasen to;

ag mangoomay panangaro tod toon pinili to,

diad kinen David tan saray kabyangay boleg to, diad ando lan ando.