1No ompaway kayon mibakal ed saray kalaban yo et nanengneng yo ray karwahi tan saray kabayo tan saray sondalon amayamay ni ra nen say sikayo, ag yo ra tatakotan. Say Katawan a Dios yo ya angipaway ed sikayo ed Egipto et kaolup yo.
2Kasakbayan a mibakal kayo, onlad arap na saray sondalo so sakey a pari tan ikuantod sikara,
3Lalaki na Israel, dengel kayo! Natad sayan agew onla kayon mibakal. Ag kayo ontatakot ed saray kalaban yo, ag yo papakapoyey linawa yo, tan ag kayo natataranta.
4Say Katawan a Dios et olupen to kayo, tan panaloen to kayo.
5Insan saray opisyal ikuandad saray totoo, Wala diad sikayo so kapkapangipaalagey toy abung to ya ag to ni abasaan? No wala, nepeg ya onsempet. Ta no napatey ed bakal, sananey a too so mampabasa.
6Wala diad sikayo so kakkapantanem toy kaubasan to tan ag nin balut akapamborbor na bunga to? No wala, nepeg ya onsempet. Ta no napatey ed bakal, sananey so manliket ed bungay kaubasan to.
7Wala diad sikayo so akisipanan a mikasal? No wala, nepeg ya onsempet. Ta no napatey ed bakal, sananey a laki so mangikasal na biin akisipanan to.
8Saray opisyal ikuanda met ni ed saray totoo, Wala diad sikayo so apatalaw toy linawa to tan antakot? No wala, nepeg ya onsempet. Ta no ag onsempet, patalawen to met so linawa da ray arum.
9No asumpal lan nansalita ed saray sondalo ira may opisyal, nepeg a pilien iray mangipangulod saray olup na sondalo.
10No onla kayon ondogpa ed sakey a siudad, itdan yon onona iray totoo to na pankanawnawa ya onsuko ra.
11No lokasan da ray puirta ta onsuko la ra, magmaliw iran aripen yo tan pasoot yo ran panlingkuren ed sikayo.
12Balet no saray totood satan a siudad et ag ira onsuko, no ag ingen onlaban ira, liktub yo na sondalo.
13Insan no say Katawan a Dios yo et iyabuloy ton nadakep yo so siudad, patey yoy amin a lalaki ed satan a siudad.
14Balet nayarin alaen yo a para sikayo iray bibii, saray ogogaw, saray ayayep da, tan saray arum a bengatlan walad siudad. Nayari yon ikana iray amin a kayaryan na saray kalaban yo. Say Katawan et inter to rad sikayo.
15Ontan so nepeg a gawaen yo ed saray siudad ya arawid dalin a panayaman yo.
16Balet no adakep yo la ray siudad ya iiter ed sikayo na Katawan a Dios yo, patey yoy balang sakey a too.
17Sigput yon pateyen iray amin a totoo: saray Heteo, saray Amorreo, saray Cananeo, saray Pereseo, saray Heveo, tan saray Jebuseo, onung na ingganggan ed sikayo na Katawan.
18Patey yo ra, pian ag da kayo tanggoyuren a mankasalanan ed Katawan diad pambangat dad sikayon manggawa na saray amin a makapaingongot a gagawaen da diad panangigalang dad saray diriyos da.
19No manadakep kayo na siudad, ag yo babatangen iray kakiewan to, anggaman a mabaybayag so pibakal yo. Akan yoy bunga ra, balet ag yo ra dederalen; ag yo ra kalaban.
20Nayarin batangen yo ray kiew ya ag naakay bunga ra tan ikana yo rad iloob yod siudad anggad pakadakep yo.
Who We AreWhat We EelieveWhat We Do
2025 by iamachristian.org,Inc All rights reserved.
