DEUTERONOMIO 25 - Maung a Balita Biblia (PnPV)(PnPV)

1Anto so gawaen no wala bilang so duaran Israelita ya onarap irad korti lapud kolkolan da, et say sakey nasintinsiaan a nankasalanan tan say sakey andi?

2No asintinsiaan a leweten imay nankasalanan, patikleben na huis tan palewet to. Say karakel na lewet ya ondapod sikato et onsimbang ed belat na ginawa ton kasalanan.

3Nayarin nalewet na anggad apataplo, balet ag la onsoluk ed sayan bilang; no onsoluk nid saya naekalan lay galang ed arap na karaklan.

4Ag yo babalongosan so baka no paniiliken yo.

Say Kanepegan ed Inatey ya Agi

5No manaayam ed saksakey a solar so sanagin lalaki, insan inatey so sakey ed sikara, tan anggapoy lakin anak to, samay abalo ag nepeg a miasawa ed siopaman ya aliwan kabyangan na pamilya; kanepegan na lakin agi na samay inatey ya asawaen to may abalo.

6Say pangulowan ya anak dan laki et nipasen ya anak na samay inatey, pian mansiansian kabyangan na Israel so pamilya to.

7Balet no say lakin agi na samay inatey et ag to labay ya asawaen imay ayro ton abalo, onlan omparontal imay bii ed saray pangulo na baley tan ikuanto, Say bayaw kon laki et ag to labay a gawaen so kanepegan to; ag to labay ya itdan so agi to na sakey a kabyangan na boleg na saray totood Israel.

8Diad satan saray pangulo na baley paawit da may laki ta pitongtongan da. No ag to ni labay ya asawaen imay ayro to,

9samay balo et onsingger ed sikato a sankanengneng na saramay pangulo na baley, alaen toy sakey ed saray sandalya to may bayaw to, lukdaan tod lupa, tan ikuanto, Onya so nagawa ed lakin ag to itdan na sakey a kabyangan na boleg so agi ton inatey.

10Say pamilya to may laki et natawag ed Israel a pamilya na laki a naoyusay sandalya.

Saray Arum a Ganggan

11No manlalaban so duaran lalaki et say asawa na sakey ed sikara et tulongan toy asawa to diad panggemes tod paltak na samay sakey,

12ag yo kakasian itan a bii; potut yoy lima to.

13-14Ag kayo mansasaol no mangikana kayoy simbangan tan sukatan.

15Ikana yo so tua tan dugan simbangan tan sukatan, pian andokey so pambilay yo ed dalin ya iiter ed sikayo na Katawan a Dios yo.

16Kabosul na Katawan iray totoon masaol.

Say Ganggan a Pateyen iray Amalecita

17Nunot yo may ginawad sikayo na saray Amalecita nen oonla kayo dian nanlapud Egipto.

18Anggapoy takot dad Dios, kanyan dinogpaan da kayod beneg nen naknaksawan tan napupunaw kayo la; pinapatey da ra may makapkapoy lan walad bandad onur.

19Ontan sirin, no niiter lad sikayo na Katawan a Dios yo so dalin tan inyarawi to kayo lad kaatapan ya iter na saray kalaban yod kaliber-liber yo, patey yo ray amin a Amalecita, pian anggapo lay makanunot ed sikara. Ag yo ya lilingoanan!