JOSUE 18 - Maung a Balita Biblia (PnPV)(PnPV)

Say Inkaapag na Akeraan a Parti na Dalin

1Kayarin adakep na saray Israelita so intiron dalin na Canaan, nantitipon irad Silo, insan da inlira so Tuldan Ayamay Katawan.

2Wala ni ray pitoran tribu na saray totood Israel ya ag ni ra apabetangan na dalin.

3Kanyan inkuanen Josue ed saray totood Israel, Kapigan niy iloob yon pangala ed dalin ya inter ed sikayo na Katawan a Dios na saray lalaki yo?

4Mamili kayo na taloran lalaki ed kapag tribu, ta ibakik ira ed intiron bansa a mangimapa ed dalin a labay dan kayaryanen. Insan ira ompawil ed siak.

5Pankapitoen a parti so dalin; ag la galawen so dalin ed abalaten a nipabetang ed tribu nen Juda tan say dalin ed baybay a nipabetang ed tribu nen Jose.

6Igawaan yoy mapa ira yan pitoran parti, insan yo dia iyakar ed siak. Ipanonan ta kayod Katawan a Dios yo diad panamegley na pampapalaranan.

7Balet saray Levita ag ira itdan na betang da ed dalin lapud say betang da et say panlingkur dan papari na Katawan. Say tribu di Gad, Ruben, tan say kapalduay tribu nen Manases et naawat da la so dalin dad bokig na Jordan ya inter ed sikara nen Moises ya aripen na Katawan.

8Saramay lalakin apili linma ran mangimapa ed dalin kayari nen Josue ya imbilin ed sikara: Laka yod intiron dalin tan imapa yo, insan kayo dia ompawil ed siak. Kasabi yo diad Silo ipanonan ta kayod Katawan diad panamegley na pampapalaranan.

9Kanyan niliber day intiron dalin ira may lalaki tan inggogolis da no panoy impangapag dan pitoran parti so dalin. Inlilista da met iray nandoroman baley. Insan iray pinmawil ed kinen Josue diad kampo ed Silo.

10Impanonan ira nen Josue ed Katawan diad panamegley na impanpapalaranan, et impabetang tod balang sakey ed saramay akeraan a tribu na Israel so sakey a parti na dalin.

Say Dalin a Nipabetang ed kinen Benjamin

11Say dalin a kayaryan da ray pamilya na tribu nen Benjamin et sikatoy ononan nipabetang. Say dalin da et walad nanleetan na tribu nen Juda tan say tribu nen Jose.

12Diad baybay onggapo so ketegan da ed Jordan, insan mampaatagey ed baybay na Jerico tan mampasagur ya ondalan ed kapokdulan ya anggad kalawakan na Bet-aven.

13Ontuloy so ketegan ed alusadsar diad niabalaten na Luz (tatawagen met ya na Betel), insan mampaleksab ed Atarot-adar diad palandey a niabalaten na Abeban Bet-horon.

14Insan ontuloy so ketegan ed sananey a dapag ta ombalikod abalaten manlapud nisagur a dapag na sayan palandey tan onlad Kiryat-baal (odino Kiryat-jearim), a kayaryan na tribu nen Juda. Sikato ya so ketegan ed sagur.

15Say ketegan ed abalaten onggapo ed samput na Kiryat-jearim insan ontuloy ed saray Sobul na Neftoa.

16Mampalasur ed satan ed alusadsar ya ososdongan toy Patar na Hinom, diad nibaybay a samput na Patar na Refaim. Ontuloy ed abalaten tan nadalan toy Patar na Hinom a niabalaten na pokdul da ray Jebuseo, insan ontalus ed Enrogel.

17Onlikod satan ed baybay a mamaarap ed En-semes insan ontuloy ed Gelilot a kasumbaliwan na Dalan na Adumim. Say ketegan et mampalasur ed Bato na Bohan (si Bohan et sakey a lakin anak nen Ruben)

18insan ondalan ed nibaybay na pokdul ya ososdongan toy Patar na Jordan. Mampalasur ed satan ed patar,

19tan ondalan ed nibaybay na nipokdul a pasen na Bet-hogla tan mansamput ed nibaybay a sabangan na Inatey a Dayat a kawalaay sabangan na Ilog na Jordan. Sikato ya so ketegan ed abalaten.

20Say Ilog na Jordan so ketegan ed bokig. Sikara yay ketegan na dalin a naawat na saray pamilya na tribu nen Benjamin.

21Saray siudad a kayaryan na saray pamilya na tribu nen Benjamin et saraya: Jerico, Bet-hogla, Emek-keziz,

22Bet-araba, Zemaraim, Betel,

23Avim, Para, Ofra,

24Kefar-haammoni, Ofni, tan Geba; labindua ran amin a siudad a pati saray baley ed kaliber-liber da.

25Siudad da met iray onggendan: Gabaon, Rama, Beerot,

26Mizpa, Cefira, Moza,

27Rekem, Irpeel, Tarala,

28Zela, Elef, Jebus (odino Jerusalem), Gibeat, tan Kiryat-jearim; labinapat iran amin a siudad, a pati saray baley ed kaliber-liber da. Sikato yay dalin a nipabetang ed saray pamilya na tribu nen Benjamin.