BILANG 5 - Maung a Balita Biblia (PnPV)(PnPV)

Saray Marotak a Totoo Onung ed Ganggan

1Say Katawan kuantod kinen Moises,

2Iganggan mod saray totood Israel a papawayen dad kampo iray amin ya akating odino walay ompapaway ed laman da tan amin iray totoon marotak lapud impakadiwit dad bangkay.

3Papaway mo ra yan amin a totoon marotak onung ed ganggan, pian ag da narotakan so kampo a panaayaman ko a kaibak iray totook.

4Tinmoluk iray Israelita ed imbagay Katawan kanyan pinapaway da rad kampo.

Say Ibayar na Toon Nanggaway Maoges

5Say Katawan inter to ray

6onggendan a bilin para saray totood Israel. No say sakey a too et onsumpad ed Katawan tan manggawa na maoges ed kapara ton too,

7nepeg ton ipatuay kasalanan to tan mambayar ed toon nanggawaan toy maoges tan pasolukan to na kakalima.

8Balet no inatey la may too tan anggapoy kanayon ton pambayaran, nepeg ya iter ed Katawan so bayar tan ikana na pari. Sayan bayar et kaaruman na karniron kalakyan ya ikana ed panggawa na sirimonyan panlinis ed samay toon nankasalanan.

9Ontan met, amin a nidoma-doman bagat ya isaklang da ray Israelita ed Katawan et kayaryan ira parin pangiteran da.

10Balang pari et kayaryan to ray bagat a niiter ed sikato.

Saray Bilin a Nipaakar ed Pangimon

11Say Katawan ingganggan toy Moises

12-14ya iter to ray onggendan a bilin ed saray Israelita. Nayarin nagawa a say sakey a laki et manginap a mankakasalanan ed sikato so asawa to, ta dinotakan toy sikaton dili diad impiakdul tod sananey a laki. Balet nayarin manduaruwa imay laki, lapud nayarin inyamut na samay bii so ginawa toanggapoy makatasi, tan ag apesgaan ed impanggawa toy maoges. Nayari met a nagawa a manginap, anggaman ya aliwan tua a samay bii et mankakasalanan ed sikato.

15Tua man o andi so inap to, iyakar tod pari imay asawa to. Mangawit na nakaukolan a sakey kilon arinan sibada, balet ag to nepeg a patoroan na larak na oliba odino inan na insinso, lapud sakey yan bagat a nanlapud sakey ya asawan lakin manginap, tan insaklang a pamapaway na katwaan.

16Say pari iyakar tod arap na altar imay bii tan diman to panalageyen.

17Mangyan ed yaung a dalin na masanton danum, mangala na dalin ed loob na Tuldan Ayamay Katawan, insan iyan tod samay danum.

18Buyaken toy buek na samay bii tan iyan tod saray lima to imay bagat ya arina. Samay parid satan ampatoten tod saray lima to imay yaung a nankargay ampait a danum a mangiter na samba.

19Insan samay pari paabubonen to may bii ed samba a salitaen to: No ag ka akikaloguran, ag ka napasakitan na samban iter na sayan danum.

20Balet no akikaloguran ka,

21say Katawan et gawaen to komun a panalwaran ed saray kadalaan mo so ngaran mo. Pakebeten to komun so kayaryan mo tan palaragen toy eges mo.

22Onloob komun ed eges mo yan danum, palaragen to, tan pakebeten toy kayaryan mo.

Samay bii onebat, Onabubon ak; ontan pa komun so gawaen na Katawan.

23Insan samay pari isulat tod panagsulatan imay samba tan orasan tod samay ampait a danum a walad yaung.

24Kasakbayan a samay pari et ipainom tod samay bii imay danum a mangiter ed sikatoy ontan lan sakit na laman,

25alaen tod lima to may bii imay bagat ya arina, iyatagey ton isaklang ed Katawan, insan to iyapay ed tapew na altar.

26Mangalay sankaakup ed samay arina a pakapatnagan na intiron bagat tan poolan tod tapew na altar. Kayari to ya, ipainom tod samay bii imay danum.

27No akikaloguran imay bii, pairapen na samay danum; onlarag so eges to tan onkebet so kayaryan to. Magmaliw a panalwaran ed saray kadalaan to so ngaran to.

28Balet no ag akikaloguran, ag naano tan makapananak.

29-30Sikato yay ganggan a nipaakar ed lakin mangimon tan manginap a makakaloguran so asawa to. Say bii et paalageyen ed arap na altar tan say pari et gawaen to yan sirimonya.

31Anggapoy kasalanan na asawan laki, balet no nankasalanan imay bii, nepeg a nadusa.