1 SARAY AWARAN 28 - Maung a Balita Biblia (PnPV)(PnPV)

Saray Bilin nen David nipaakar ed Timplo

1Ingganggan nen David a mantitipon ed Jerusalem iray amin ya opisyal na Israel. Kanyan nantitipon ed Jerusalem iray amin ya opisyal na saray tribu, saray opisyal a pangulo na saray kimey ed nanarian, saray pangulo na saray boleg, saray makaoley ed saray amin a kayaryan tan ayayep na ari tan saray lalakin anak to, pati saray opisyal na palasio, saray matalonan sondalo, tan saray lalakin gagalangen ed baley.

2Nanalagey ed arap da si Ari David tan nansalita ed sikara. Inkuanto, Dengel yo ak, sikayon agagik tan totook. Nampilalekan koy mangipaalagey na mansiansian panayaman na Kaban na Sipanan, say panangitapeway sali na Katawan tayon Dios. Imparaan ko ray nakaukolan ed pangipaalagey na sakey a timplo a pamagalang ed Dios,

3balet sinebelan to ak a mangipaalagey, lapud sakey ak a sondalo tan dakel so pinaagos kon dala.

4Say Katawan a Dios na Israel pinili to ak tan saray kabyangay boleg ko a manoley ya anggad angga ed Israel. Pinili toy tribu nen Juda a panlapwan na mangipangulo, tan diad tribu nen Juda pinili toy pamilya nen amak. Diad amin a kabyangan na sayan pamilya et nanliketan toy impamili tod siak, insan to ak ginawan ari ed intiron Israel.

5Initdan to ak na amayamay ya anak a laki tan diad sikara pinili toy Solomon a manoley ed intiron Israel, saray panarian na Katawan.

6Inkuan na Katawan ed siak, Si anak mon Solomon so mangipaalagey na Timplok ta pinilik a magmaliw ya anak ko tan siak so magmaliw ya ama to.

7Pansiansiaen kod anggad angga so nanarian to, no ituloy ton apiapigeren ya onuren iray ganggan tan saray bilin ko a singa gagawaen to la.

8Kanyan natan, totook ira, diad imaton na Dios tan sayan tipon na amin ya Israelita a totoo na Katawan, simbawaen ta kayo ya apiapiger yon onuren iray amin ya ingganggan ed sikatayo na Katawan a Dios tayo, pian mansiansian kayaryan yo yan mabonan dalin, tan nipatawir yod saray ontombuk a kailalakan ya anggad angga.

9Insan inkuantod kinen Solomon, Anak ko, nia so bilin kod sika: birbir moy Dios nen ama tan panlingkuran mod intiron pusom tan mabolbolus a linawa. Amta to ray amin a kanunotan tan saray pilalek tayo. No ondago kad sikato, awaten to ka; balet no ibeneg mo, ando lan andon ikaindan to ka.

10Nepeg mon nunoten a say Katawan pinili to kan mangipaalagey na masanton Timplo to. Pabiskeg moy linawamipaalagey mo.

11Inter nen David ed kinen Solomon iray plano na amin a paalagey na Timplo, saray panagsinupan a kuarto tan amin nin arum a kuarto, tan say Sankasantosan a Pasen a diay pakapirdonaan na kasalanan.

12Inter to met ed sikato iray plano na nununoten ton pakagawa ed saray solar tan saray kuartod kaliber-liber da, tan saray kuarton panagsinupan na saray kagawaan ed Timplo tan saray rigalon nisaklang ed Katawan.

13Inter met nen David et sikato iray plano na nipaakar ed pakaapag-apag na saray papari tan saray Levita diad panggawa saray kimey dad Timplo tan say pangasikaso rad saray amin ya ikakanad Timplo.

14Imbaga to no kaunongay pilak tan balituk ya ikana ed panggawad saray ikakana ed Timplo,

15say balang lamparaan tan say balang panangipatoonan na lamparaan,

16saray pilak a lamisaan, tan balang balituk a lamisaan a pangitapewad saray tinapay ya ibagat ed Dios.

17Imbaga to met no kaunongay puron balituk ya ikana ed panggawad saray tinidor, saray yaung, tan saray boyug; ontan met no kaunongay pilak tan balituk ed panggawad saray plato.

18Imbaga to met no kaonungay puron balituk ya ikana diad panggawad altar a pampoolay insinso, tan say panggawad karwahi a para saray kirubin ya akabuskag iray payak da tan asakbungan day Kaban na Sipanan na Katawan.

19Inkuanen Ari David, Amin da ra ya et wala rad plano a nisulat onung ed saray bilin na dilin Katawan a gawaen ko.

20Inkuanen Ari David ed anak ton Solomon, Pabiskeg moy linawam tan ag ka natatakot. Igapom so kimey tan ag mo aabuloyan so antokaman a manebel ed sika, ta walad sika so Katawan a Dios a panlilingkuran ko. Ag to ka ikaindan; mansiansiad sika ya anggad pakasumpal moy kimey ed Timplo to.

21Nipabetang lad saray papari tan saray Levita iray amin a kimey a gawaen dad dalem na Timplo. Mampilalek ya ontulong ed sika iray totoon marunong ed antokaman a kimey. Nayarian mon iganggan iray amin a totoo tan saray pangulo ra.