SARAY PROBIRBIO 1 - Maung a Balita Biblia (PnPV)(PnPV)

Say Kablian na saray Probirbio

1Saraya so probirbio nen Solomon a lakin anak nen David tan ari na Israel.

2Makatulong irad sikayo ed pakabirbir yod kakabatan tan maung a simbawa, tan diad pakatalus yod saray balikas a walaan na aralem a kabaliksan.

3Nibangat da kayo no panoy pambilay yon makabat, tan no panoy pagmaliw yon matwa, matonung, tan maptek.

4Napagmaliw dan marunong iray anggapoy salsalid panagbilay, tan nibangat day pakatalus tan kakabatan ed saray walad kalangweran.

5Sarayan probirbio nayarian da ya anggan aruman so pakatalus da ray makabat lan totoo, tan nayarian dan iwanwan iray walay aral,

6pian natalusan da ray niamut a kabaliksan da ray probirbio tan saray probliman itetepet da ray makabat a totoo.

Simbawa ed saray Tobun-balo

7Pian nawalaan kay pakatalus, nepeg mon galangen ya onona so Katawan. Saray makulang-kulang babalawen da so kakabatan tan ag da labay so manaral.

8Anak ko, dengel moy ibabaga na amam tan inam.

9Say bangat da et pamaungen toy ogalim a singa pamarakep ed nengneng mo na balibalin sombriro odino kolintas.

10Anak ko, no tuksoen ka na saray makasalanan, ag ka onaabuloy.

11No bilang ta ikuanda, Gala, ta mananap itayoy pateyen tayon too! Dogpaan tayo ray totoon anggapoy kasalanan, pian walay panliketan tayo!

12Nayarin mabilabilay tan mabisbiskeg ira no narumog tayo ra, balet kasiput tayo naoyus lay bilay da!

13Makarumog tayoy mabmabli ran bengatla, tan panoen tayo ray kaabugan tayo na saray asamsam!

14Gala, mila kad sikami, ta panaapagan tin amin iray natakew tayo.

15Anak ko, ag ka mimilad saray ontan a totoo. Arawian mo ra.

16Magangganat iran manggaway kaogsan. Mammainomay day mamatey.

17Anggapoy kana na pangipanat moy iket no sankanengneng na manok a labay mon erelen.

18Balet saray ontan a totoo et papatitan day sikaran dili; diad dilin patit day pateyan da.

19Say tulisan pateyen na inkatulisan toonyay pansumpalan na siopaman a toon mambibilay onung ed inkaruksa to.

Ontatawag so Kakabatan

20Dengel kayo! Mankokolyaot ed saray dalan tan diad saray tindaan so kakabatan,

21maksil ya ontatawag diad saray puirtay siudad, tan diad inerman a pantitiponan na saray totoo:

22Makulang-kulang a totoo! Anggad kapigan so pansiansia yon makulang-kulang? Kapigan so itonda na panluludlurey yod pakaamta? Ag kayon balut makaaral?

23Dengel kayo no pampasnukan ta kayo; itdan ta kayoy maung a simbawa tan inagnag kod sikayoy pakatalus ko.

24Tinatawag ta kayo, balet ag kayo ondengel; iniimbitaan ta kayon ondago balet ag kayo mangasasikaso.

25Ag yo dinengel iray amin a simbawak tan ag yo labay so papetek ed siak.

26Kanyan no onsabid sikayoy gunigon, elekan ta kayo. Ludlureyen ta kayo no nasabian kayoy takot,

27singa mabiskeg a bagyo ya onsabid sikayo a sankaawit to ray masebeg tan maksil a dagem a manggunigon ed sikayo, et nairapan tan pangaskasiyan kayo.

28Diad satan ontawag kayod kakabatan, balet ag ak onebat. Nayarin anapen yo ak ed inerman a pasen, balet ag yo ak narumog.

29Ag yon balut nilabay a nawalaan kayoy pakaamta tan lawas ag yo tinoluk so Katawan.

30Ag yon balut dinengel so simbawak odino inasikasoy panametek ko.

31Lapud saya, anien yoy bungay ginawa yo, tan deryaen kayo lamlamang na dilin kagagawa yo.

32Ompapatey iray totoon anggapoy salsalid panagbilay lapud ipopolisay day kakabatan. Nadederal iray totoon makulang-kulang lapud ag ira mangasasikaso.

33Balet niarawid kaatapan so siopaman ya ondengel ed siak. Mareen so pambilay to, ta anggapoy nepeg ton takotan.