Salmo 44 - Maung a Balita Biblia (PnPV)(PnPV)

Pikekerew na Panangyagel

1O Dios, nadngel na saray dilin layag mi

imbagad sikami na saray lalaki mi,

iray makapakelaw a ginagawam nen panaon da,

diad saraman ya agew;

2say impamagit mod saray pagano,

tan say impangisoblay mod saray totoon manayam ed dalin da;

say impanusam ed saray totoon taga arum a bansa,

tan say impamaaligwas mod saray dilin totoom.

3Saray totoom ag da sinamsam so dalin diad panamegley na saray ispada ra;

ag da dinakep diad panamegley na dilin pakayari ra.

Sinamsam da diad panamegley na dilin pakayarim tan biskeg mo,

diad panamegley na kiwawalam ed pegley da,

ya angipanengneng ya inarom ira.

4Sikay arik tan Dios ko;

panataloen mo ray totoom,

5tan lapud pakayarim tataloen mi ray kalaban mi.

6Ag ko panmamatalkan a mangilaban ed siak

so panak o say ispadak,

7balet inliktar mo kamid saray kalaban mi,

tan tinalom iray mamobosul ed sikami.

8Idayew mi ka lawas,

tan angga anggan misalamat kamid sika.

9Balet, natan, impolisay tan impatalo mo kami;

ag mo la oolupen iray sondalo mi.

10Inabuloyan mon imbatikan mi ray kalaban mi,

kanyan inaala da ray kayaryan mi.

11Inabuloyan mon pinatas da kamin singa karniro;

imbuybuyak mo kamid saray arum a bansa.

12Mamurmuray impangilakom ed saray dilin totoom,

a singa anggapoy kablian da.

13Sankanengneng na saray kakaabay mi so ginawam ed sikami,

kanyan eelek-elekan tan luludlureyen da kami.

14Ginawa mo kamin panelekan na saray arum a bansa;

mameyeng-peyeng irad panlelemlemew dad sikami.

15Lawas lay pakapapaabebak;

mapalalo lay pakababaingan ko,

16lapud pakarerengel kod panagbalaw tan panaglemlemew

da ray kalaban ko tan saray mamobosul ed siak.

17Agawa ra yan amin ed sikami

anggaman ya ag mi ka alingwanan,

odino dineral so impisipanan mod sikami.

18Ag mi ka binenegan;

ag mi sinumlang iray ganggan mo.

19Anggaman ontan pinaolyan mo kamin pakaskasid pegley da ray ayayep ed katakelan;

tan inkaindan mo kamid sankabilongetan a pasen.

20No tinondaan miy angigalang ed Dios mi,

tan akikasi kamid sakey a dios da ray arum a bansa,

21naamtaan mo la komun,

ta kabat mo ray maamut a nunot mi.

22Balet lapud sika, napapatey kami lawas,

tan nipapasen kamin singa karniron papatasen.

23Liing ka pa, Katawan! Akin et naogip ka?

Bangon ka pa. Ag mo kami pa ipopolisay ya anggad angga!

24Akin et iyaamutan mo kami?

Ag mo lilingwanan so paniirap tan kagugunigon mi!

25Abakbaktar kamid dalin;

mandokdokul kamid dabuk lapud inkatalo mi.

26Bangon ka pa ta tulongan mo kami!

Lapud ag mangoman a panangarom, iliktar mo kami pa!