JEREMIAS 31 - Maung a Balita Biblia (PnPV)(PnPV)

Say Impawil na saray Israelita

1Say Katawan kuanto, Onsabiy panaon a magmaliw ak a Dios na amin a tribu na Israel, tan sikaray magmaliw a totook.

2Kinasian kod kalawakan iray totoon nibatikan day patey. Nen nampilalek na painawa iray totood Israel,

3pinmatnag ak ed sikara manlapud arawi. Totood Israel, inaro ta kayo lawas, kanyan intuloy kon impatnag ed sikayo so ag mangoman a panangarok.

4Pasimbaloen ko so kipapasen yo a totook. Alaen yo lamet iray tamborin yo tan maliket kayon mansayaw-sayaw.

5Taneman yo lamet iray kaubasan ed toktok na kapokdulan na Samaria, tan saray mantanem kanen da ray bungay kaubasan.

6On, onsabiy agew a saray managbantay ikolyaot dad toktok na kapokdulan na Efraim, Ontatdang itayod Sion, diad Katawan a Dios tayo.

7Say Katawan kuanto,

Mankanta kayod liket para Israel,

say sankatalonggaringan ed saray bansa.

Kanta yoy imno na panangidayew,

Inyagel na Katawan iray totoo to,

inliktar ton amin iray akeraan.

8Alaen ko rad bansa ed baybay

tan tiponen ko ran manlapud saray sokung na mundo.

Milad sikara iray bulag tan saray lopuy,

saray malokun tan amin da ray paanak-anak.

Ompawil ira a sakey a matalonggaring a bansa.

9Diad liket dan ompapawil iray totook ag da napokpokay interter na lua ra,

mampipikasi ra legan ko ran iwawanwan.

Iwanwan ko rad gilig na managagos a danum,

diad mablak a dalan pian ag ira niparokul.

Singa ama so pasen ko ed Israel,

et si Efraim so sankapangulowanan ya anak kon laki.

10Say Katawan kuanto,

Dengel yo ak, sikayo ran bansa,

tan ibawag yod arawi ran gilig na dayat iray salitak.

Inkaykayat ko ray totook, balet tiponen ko ra,

bantayan ko ran singa pambabantay na pumapastol ed saray karniro to.

11Imbolus ko ray Israelita,

tan inyagel ko rad makapanyarin bansa.

12Ondago ra tan mankanta rad liket diad Palandey na Sion

tan panliketan da ray rigalok

saray rigalon trigo, alak, tan larak na oliba,

saray karniro tan saray baka.

Magmaliw iran singa asalusalug a tanamanan,

tan nawalaan ira na amin a nakaukolan da.

13Insan mansayaw tan manliket iray bibii;

manggayaga ray lalaki, malangwer may matakken.

Ligliwaen ko ra tan pagmaliwen kon liket so ermen da;

pagmaliwen kon gayaga so ermen da.

14Peneken ko na mananam a kakanen iray papari,

tan iter koy amin a nakaukolan na saray totook.

Siak, say Katawan, so nansalita.

Say Panangasi na Katawan

ed Israel

15say Katawan kuanto,

Nadngel so tanul ed Rama,

tanul na ampaipait a pannangis tan panugaog.

Si Raquel saray anak to nanangisan to ra;

maneermen tan ag naligliwa,

ta naandi la ra.

16Tondaan yo lay panaakis yo,

tan ponasan yo ray lua yo.

Ag nayarin ag natumangan

iray amin a ginagawa yo para saray anak yo;

ompawil iran manlapud dalin na kalaban.

17Maung so ilalo yod arapen a panaon;

ompawil ed dilin bansa ra iray anak yo.

Siak, say Katawan, so nansalita.

18Narerengel kon maermen ya ibabaga na saray Israelita,

Katawan, nen saman singa kami maatap a bakan kalakyan,

balet binabangatan mo kamin ontoluk.

Papawil mo kami pa;

sipaparaan kamin ompawil ed sika,

Katawan a Dios mi.

19Inmarawi kami ed sika,

balet kabebekta nilabay miy ompawil.

Kayari mo kamin dinusa,

nanampat kami lapud ermen na pagbabawi.

Ambaing kami,

lapud saray kasalanan mi nen wala kami nid kalangweran.

20Israel, sikay pinablik ya anak,

say anak kon inararo.

Kapag bitlaen koy ngaran mo,

nununoten ta ka a katekep na panangaro.

Milmilay linawak ed sika;

andi-duaruwan kasian ta ka.

21Mangyan kayo ray tanda tan pakapatnagan ed dalan;

anap yo may dinalan yo.

Pawil kayo, sikayon totood Israel,

sempet kayod saray baley a tinaynan yo.

22Kapigan mangangga so panduaruwa yo, sikayon anggapoy pananisian totoo?

Nanggawa ak na bengatlan balo tan nidoma,

nidoma a singa sakey a bii ya iyaagel toy laki.

Say Arapen ya Aligwas na saray Totooy Dios

23Say Katawan a Makapanyarin-amin a Dios na Israel kuanto, No papawilen kod dalin da iray totook, ibaga da lamet ed dalin na Juda tan saray baley to,

Bindisionan komun na Katawan so masanton palandey na Jerusalem,

say masanton pasen a panaayaman to.

24Manayam ed Juda tan saray baley to iray totoo; niwalad satan iray dumaralus tan saray pumapastol a wala ray karniro ra.

25Pasimbaloen koy liknaan da ray mapagpaga, tan peneken koy kakanen iray makapkapoy lad eras.

26Diad onta, ikuan na saray totoo, Naogip ak, tan binmangon ak ya apasimbaloy liknaan.

27Siak, say Katawan, kuanko ya onsabiy panaon a panoen ko na totoo tan ayayep so dalin na Israel tan Juda.

28Onung na impangasikasok ed impamagut, impangibalsak, impangipatalo, impaneral, tan impamataynan kod sikara, ontan met so pangasikasok ed pangiletneg tan pamasimbaloy kipapasen da.

29No onsabi tan a panaon, ag la ikuan na saray totoo,

Angan na anakseng ya ubas iray atateng,

Balet akilem iray anak da.

30Ingen say nagawa onya: Siopamay mangan na anakseng ya ubas, nakilem so dilin ngipen to, tan ompatey so balang sakey lapud dilin kasalanan to.

31Say Katawan kuanto, Onsabiy panaon a baloy pisipanan kod saray totood Israel tan saray totood Juda.

32Aliwan singa samay impisipanan kod saray lalaki ra nen intabin ko ran impaway ed Egipto. Aliwa ran matoor ed saman a sipanan, anggaman ya alimbawak so sakey ya asawan laki ed sikara.

33Onya so pisipanan kod saray totood Israel: Iyan kod sikaray ganggan ko tan isulat kod kapusoan da. Siak so magmaliw a Dios da, tan sikara so totook.

34Anggapod sikaray nepeg a mangibangat ed kabansaan to na nipaakar ed pangamta ed Katawan, ta nakabatan da ak ya amin, abeba may atagey so kipapasen da. Pirdonaen ko ray kasalanan da tan ag ko la nunoten iray ginagawa ran kaogsan. Siak, say Katawan, so nansalita.

35Say Katawan iiter toy agew a manliwawa no agew

tan say bulan tan saray bitewen a manindag no labi.

Kimbogen toy dayat, kanyan onungol iray daluyon to;

Yahweh a Makapanyarin-amin so ngaran to.

36Isisipan to a legan a mansiansiay gendat ya oksuy na sansinakoban,

mansiansian sakey a bansa so Israel.

37No nasukat so tawen,

tan nasokait iray pundasion na mundo,

ipolisay tod satan iray totood Israel,

lapud amin a ginagawa ra.

Say Katawan so nansalita.

38Onsabi so panaon, kuay Katawan, a napasimbalon nipaalagey a siudad ko so intiron Jerusalem, manlapud tori na Hananel ya anggad Puirta na Sokung.

39Insan manlapud man ed sagur say ketegan mampaarap ed pokdul na Gareb, insan diad kaliber-liber na Goa.

40Say intiron patar na pomponan ed saray bangkay tan bantakan na dotak, tan amin a kaalogan ed pandel na Kolus na Cedron ya anggad Puirta na Kabayo et magmaliw iran masanton pasen ed siak. Ag lan balut nigeba odino naderal yan siudad.