SAY KAKABATAN NEN SOLOMON 10 - Maung a Balita Biblia (PnPV)(PnPV)

Inyagel na Kakabatan si Adan

1Inyagel na Kakabatan so ama na mundo, say ononan toon minoli, nen bukor toy apalsa. Inyagel tod kasalanan a ginawa to

2tan initdan to na biskeg a manoley ed amin a bengatlad dalin.

Inkaindan nen Cain so Kakabatan

3Balet walay toon aliwan matonung ya inkaindan toy Kakabatan; dineral toy sikaton dili, ta pinatey toy agi to lapud pasnuk to.

Inyagel na Kakabatan si Noe

4Lapud saman a kasalanan, adelap so mundo, balet inlaban lamet na Kakabatan. Inwanwan toy sakey a toon matonung diad panamegley na lopuk a kiew a baloto to.

Tinulongan na Kakabatan si Abraham

5Aminsan nen maermen iray bansa lapud ag atuloy iray maoges a plano ra, binirbir na Kakabatan so sakey a toon matonung tan impansiansia ton anggapoy kasalanan ed arap na Dios. Initdan toy biskeg ya ontoluk ed ganggan na Dios, anggaman ya inaro toy anak ton laki.

Inyagel na Kakabatan si Lot

6Inyagel na Kakabatan so sakey a toon matonung, legan ya ompapatey iray totoon maoges. Nibatikan na sayan too so apoy ya aneral ed saramay Limaran Siudad.

7Nanengneng yo ni ray pakapaneknekan na kaogsan da. Kinmelang diman so dalin tan manasasewek. Mambubungad man iray kakiewan balet ag ira naluluto, tan manalalagey diman so lusek a pakanudnunotan ed sakey a toon ag anisia.

8Impolisay na saray totood saraman a siudad so Kakabatan tan ag da napambiigay maung tan maoges. Aliwan satan labat; saray akeraan a deral-deral na saray siudad da et ipapanunot da nid sikatayo so makulangkulang ya impanbilay da, kanyan ag balut nalingwanan so nankulangan da.

9Balet inyagel na Kakabatan ed kaatapan iray aripen to.

Inyagel na Kakabatan si Jacob

10Aminsan nepeg a paliisan na sakey a toon matonung so pasnuk na agi ton laki, et inwanwan na Kakabatan ed dugan dalan. Impanengneng tod sikato so panarian na Dios tan inabuloyan ton mangamta na saray masanton bengatla. Impagmaliw ton mapalabo tan maaligwas ed kimey to.

11Nen inagoman na saray arum a totoo iray kayaryan to, tan labay dan alaen ed sikato, intalindeg na Kakabatan tan impagmaliw ton mayaman.

12Inyagel tod saray kalaban to a manaalagar na pankanawnawa ran ondogpad sikato. Impanalo to ed pinasyan laban, pian nabirbir to ya anggapoy lalon makapabiskeg ed too nen say panaglingkur ed Dios.

Inyagel na Kakabatan si Jose

13Aminsan nilakon sakey ya aripen so sakey a toon matonung, balet ag inkaindan na Kakabatan. Inyarawi to ed kasalanan. Akilad sikato ed prisowan

14tan ag ton balut tinaynan ya anggad naitdan to na pakayari ed sakey ya impirio tan ginawa ton manoley ed totoon nampapairap ed sikato nen saman. Impaamta na Kakabatan a tila-tilay impangakusa rad sikato, tan initdan to na andi-anggaan a kagalangan.

Impaway na Kakabatan ed Egipto iray Israelita

15Aminsan inyagel na Kakabatan iray anggapoy kasalanan tan masanton totoo ed sakey a bansan managpairap iray totoo to.

16Linmoob so Kakabatan ed kamarerwa na sakey ed saray aripen na Dios tan tinalindegan to ray tatakotan ya arari diad panamegley na impanggagawa to na saray milagro.

17Tinumangan to ray totoo na Dios lapud saray kairapan da. Inwanwan to rad makapakelaw ya impanbiahi ra. Initdan to ray tarung no agew, tan maliwliwan sinag na saray bitewen no labi.

18Pinabeltang to rad aralem a danum na Dayat ya Ambalanga,

19balet impalner to ray kalaban da tan impaanor to ray bangkay da ed gilig na dayat.

20Kanyan sinamsaman na saray totoon matonung iray totoon maoges. Nankanta ra na saray imno ed masanton ngaran mo, O Katawan; nankakasakey iran angidayew ed sika lapud inyagel mo ra.

21Initday Kakabatan iray emel na pakayarin mansalita; initdan to ni ingen iray ogogaw ya ankekelag na pakayarin malinew a mansalita.