2 SARAY AWARAN 24 - Maung a Balita Biblia (PnPV)(PnPV)

Si Ari Joas na Juda(2 Ar. 12:1-16)

1Nagmaliw ya ari na Juda si Joas nen mantaon na pitora, tan nanoley ed Jerusalem na apataploy taon. Si Zibia a taga siudad na Beer-seba so ina to.

2Legay impanbilay nen Joiada a pari, ginagawa nen Joas iray makapaliket ed Katawan.

3Amiliy Joiada na duaran bibii ya impaasawa tod Ari Joas, et nanilalak na lalaki tan bibii.

4Ag abayag ginetma nen Ari Joas ya apigeren so Timplo na Katawan.

5Ingganggan to ray papari tan saray Levita ya onla rad saray siudad na Juda, ta mankolikta rad saray totoo na kuarta a para samay tinaon a pamaapiger ed Timplo. Imbaga tod sikaran ganatan da yan gawaen, balet nantayam-tayam ira may Levita.

6Impatawag to sirin si Joiada a pangulo ra, tan tinepet to, Akin et ag mo ni impakolikta ed saray Levita so buis da ray taga Juda tan Jerusalem, a si Moises ya aripen na Katawan et ingganggan tod saray totoo a bayaran da para Tuldan Ayamay Katawan?

(

7Saray mananombuk nen Atalia, samay maoges a bii, et dineral day Timplo tan inkakana rad panangigalang ed Baal iray amayamay a masanton kagawaan.)

8Ingganggan na ari iray Levita a manggawa ray kahon a pananginay tulong tan iyan dad puirta na Timplo.

9Impaibaga rad intiron Jerusalem tan Juda a balang sakey et nepeg ya iyakar tod Katawan imay buis ya ononan kinoliktad kalawakan nen Moises ya aripen na Dios.

10Akaliketan ya na saray totoo tan saray pangulo ra, kanyan inyaakar da may kuarta ran para buis tan pinapano ra may kahon.

11Inagew-agew saray Levita iyakar da may kahon ed opisyal na ari a makaoley. No napno la, ondago so sikritario na ari tan say opisyal na Pangulon Pari, alaen day kuarta, insan da ipawil imay kahon ed pasen to. Kanyan amayamay so akolikta ran kuarta.

12Insan ipalima na ari tan si Joiada imay kuarta ed saray makaoley ed panagapiger na Timplo, a nanuupa ra na saray manapiger a kantiro, karpintiro, tan platiro.

13Pinasiay impankimey da ra may nanapiger, kanyan nipawil dad gendat a kipapasen ton mabisbiskeg imay Timplo.

14Nen asumpal so impangapiger, niiter ed ari tan si Joiada iray soluk a balituk tan pilak. Inkana da ra ya ed panggawa na saray yaung tan arum ni ran kagawaan na Timplo.

Naoman iray Pananontonan ya Impaakseb nen Joiada

Legan a mabilay si Joiada, ag tinmonda so pangisasaklang na saray bagat ed Timplo.

15Masikesiken lay Joiada nen inatey, sanlasus tan talomplo so taon to.

16Impompon da ed saray pantion da ray arari diad Siudad nen David, lapud impamirbir da ed impanlilingkur tod saray totood Israel, diad Dios, tan diad Timplo.

17Balet kapatey nen Joiada, tinanggoyur na saray pangulo na Juda si Ari Joas ya ondengel ed sikara.

18Tinondaan na saray totoo so mangigalang ed Timplo na Katawan, say Dios na saray lalaki ra, tan angigalang irad saray talintaoy diriyos tan saray talintaoy diosan Asera. Lapud sayan kasalanan na saray totood Juda tan Jerusalem, akapasnuk so Katawan ed sikara.

19Angibaki so Katawan na saray propita a mamasakbay ed sikara pian makapawil irad Katawan, balet ag da ra dinengel.

20Insan say ispiritu na Dios linmoob ed kinen Zacarias a lakin anak nen Joiada a pari. Nanalagey ed sakey a pasen a nanengneng na saray totoo tan inkulyaot to, Tetepeten ed sikayo na Katawan a Dios no akin et sinumlang yo ray ganggan to tan ipepelag yod sikayon dili so deral! Inkaindan yoy Katawan kanyan inkaindan to kayo!

21Akikomplut si Ari Joas ed saray totoo sumpad kinen Zacarias, et nen ingganggan to tinupak dad patio si Zacarias.

22Alingwanan na ari so matoor ya impanlingkur ed sikato nen Joiada ya ama nen Zacarias, kanyan impapatey toy Zacarias. Nen ompapatey si Zacarias, inmeyag, Nanengneng komun na Katawan so gagawaen yo tan dusaen to kayo!

Say Samput na Impanoley nen Joas

23Nen magano lan mansamput iman a taon, dinogpaan na saray sondalon Siriano so Juda tan Jerusalem, pinatey da ray amin a pangulo, tan amayamay so asamsam dan insempet ed Damasco.

24Daiset iray Sirianon sondalo, balet impatalo na Katawan iray amayamay a Judion sondalo lapud inkaindan na totoo so Katawan a Dios na lalaki ra. Onya so impakadusa nen Ari Joas.

25Mapalaloy inkasugat nen Joas, et nen tinmaynan la ra may kalaban da, nankomplut so duaran opisyal to tan pinatey da ed katri to, pian makabales irad samay impamatey ed anak nen Joiada a pari. Nipompon ed Siudad nen David, balet aliwan diad kamposanto da ray arari. (

26Saramay nankomplut ya amatey ed sikato et si Zabad lakin anak na Ammonitan bii a manngaray Simeat, tan si Jozabad a lakin a anak na Moabitan bii a manngaray Simrit.)

27Nikorit ed Say Komintario ed Libro da ray Arari so istoria na saray lalakin anak nen Joas, saray propisiyan asalita sumpad sikato, tan say impamaapiger tod Timplo. Si Amasias a lakin anak to so sinmalat ed sikaton nanari.