Salmo 59 - Maung a Balita Biblia (PnPV)(PnPV)

Pikekerew na Kiarawid Kaatapan

1Iliktar mo ak pad saray kalaban ko, O Dios ko;

iyagel mo ak pad saray ondodogpad siak!

2Iyagel mo ak pad saray totoon maoges;

ipaliis mo ak pad saray managpatey na too!

3Nengneng mo! Tatalaranan da ak a pateyen;

mantitipon ya onlaban ed siak iray maruksan totoo.

Aliwan lapud kasalanan o kaogsan a ginawak,

4odino lapud kabandayan a ginawak, O Katawan,

so panggaganat dan onlad saray pasen da.

5Liing ka pa, Katawan a Dios a Makapanyarin-amin, ta dago mo ak a tulongan;

sikan dili so onnengneng, O Dios na Israel!

Bangon ka pa, ta dusam ya amin iray bansa;

ag mo pa kakasian iray traidor!

6Nilabi-labin ompapawil ira;

singa ra ason mandangul a liber-liber ed siudad.

7Dengel mo pay panagleglemew tan pangtaktakot da.

Saray dila ra et singa ra ispada ed saray sangi ra,

balet abaloan dan anggapoy makakadngel ed sikara.

8Balet sika, Katawan, elek-elekan mo ra;

balbalawen mon amin iray bansa.

9Manmamatalek ak ed biskeg mo;

sika so salimbengan ko, O Dios.

10Inaro ak na Dios ko tan dagoen to ak;

ipanengneng tod siak so katalo na saray kalaban ko.

11Ag mo pa ra papateyen, O Dios, ta ompan makalingwan iray totook.

Buyak mo pa ra diad panamegley na pakayarim tan talom ira,

Katawan a manangyagel mi.

12Kasalanan so walad bibil da, tan maoges ya amin iray salita ra;

naerel ira komun ed inkalastug da.

Lapud manaayew tan mantitila ra,

13diad pasnuk mo, deral mo pa ra;

deral mo ra ya anggad ag da kaoput.

Naamtaan ed satan na amin a katoowan a say Dios so manooley ed Israel,

tan say panooley to et sasakopen toy intiron mundo!

14Nilabi-labin ompapawil iray kalaban ko,

singa ra ason mandangul a liber-liber ed siudad;

15singa ra ason liber-liber a manaanap na nabwag da,

tan mantaglool ira no ag ira napesel.

16Balet ikantak so nipaakar ed biskeg mo;

kinabwasan ya ikantak a maksil so nipaakar ed ag mangoman a panangarom.

Sikay salimbengan ko,

say siroman diad panaoy gunigon ko.

17Idayew ta ka, sikan manangyagel ko.

Say Dios so salimbengan ko,

say Dios a mangaarod siak.