2 SAMUEL 13 - Maung a Balita Biblia (PnPV)(PnPV)

Si Amnon tan si Tamar

1Si Absalom a lakin anak nen David et walay magangganan agi ton marikit a manggaray Tamar. Say sakey a lakin anak nen David a si Amnon et naibegan toy Tamar.

2Diad ontan lan panibeg to, akainagem. Inisip ton ag to nayarin kayaryanen, ta sakey a birhin.

3Walay masilib a kaaro ton manngaray Jonadab a lakin anak nen Simea a lakin agi nen David.

4Inkuanen Jonadab ed kinen Amnon, Anak kay ari, balet inagew-agew ta kan nanenengneng a maermen. Antoy makasengeg a?

Walay panibeg kod kinen Tamar ya agi nen Absalom ya agik ed ina, ebat to.

5Inkuanen Jonadab ed sikato, Mansakit-sakitan ka tan dokul ka. No laen to ka nen amam a nengnengen, ikuan mod sikato, Ibaki yo pa diay agik a Tamar, ta pakanen to ak. Labay kon nanengneng ya iparaanan to ak dia na tinapay, insan to ak pakanen.

6Kanyan nansakit-sakitan si Amnon, tan dinmokul.

Linmay Ari David a nengnengen to, insan kuanen Amnon ed sikato, Ibaki yo pa diay agik a Tamar, ta labay kon nanengneng ya iparaanan to ak dia na tinapay, insan to ak pakanen.

7Kanyan impaibaga nen David ed kinen Tamar diad palasio: Lakad abung nen Amnon ta iparaanan moy kanen to.

8Kanyan linmay Tamar tan asabi toy Amnon a walad dokulan. Angalay arina, minasa to, tan nanggaway pigaran tinapay a sankanengneng nen Amnon.

9Insan inekal to rad kawali; ipapakan to ra, balet ag mangan si Amnon. Inkuanto, Papaway mo ray amin a totoon wadya, kanyan pinmaway iran amin.

10Insan to inkuan ed sikato, Awit mo la dia ra tay tinapay tan pakan mo ak. Inala to ray tinapay tan sinmingger ed sikato.

11Nen idederew to ra, siningkat nen Amnon tan kuanto, Miakdul kad siak agik!

12Andi, kuanen Tamar. Ag mo ak papasootan! Ag ya nagagawa ed Israel! Ag ka manggagaway makapabaing!

13Anto niy lupak a miarap ed karaklan? Tan sika, magmaliw kan mabambanday a maung ed Israel. Ipangasim, ta mitongtong kad ari! Andi-duaruwan iter to ak ed sika.

14Balet ag dengelen nen Amnon; et lapud mabiskeg nen say sikato, apasoot ton inakdulan.

15Insan kinabosul a maumaung nen Amnon; mapalalo niy impambosul to nen say impangaro to. Inkuantod sikato, Paway ka dia!

16Andi, ebat to. Ambelat nin kasalanan so pamapaway mod siak nen say ginawam!

Balet ag dengelen nen Amnon;

17tinawag toy dilin aripen to tan kuanto, Paarawim ed arap ko yan bii! Papaway mo tan italak moy puirta!

18Pinapaway na samay aripen tan intalak toy puirta.

Si Tamar akakawes na andokey so saloy tan taklay, say ikakawes na saray prinsisan anggapoy asawa ed saman a panaon.

19Ininan toy dapul so olo to, pinilat toy kawes to, tan linma lan manakis a sankaakup toy lupa to.

20Nen anengneng nen Absalom ya agi to, tinepet to, Pinasoot kan inakdulan nen Amnon? Ag mo la kari liliknaen a maung. Lapud ta agim ed ama, ag mo la ibabagad siopaman so agawa. Maerermen a nanayam si Tamar ed abung nen Absalom.

21Nen nadngelan nen David so agawa, nampasnuk a maung.

22Ag lan balut akitongtong si Absalom ed kinen Amnon, lapud mapalalon pasnuk tod sikato ed impamasoot tod kinen Tamar.

Say Imbawi nen Absalom

23Kayariy duay taon, kakatlian nen Absalom iray karniro to diad Baal-hazor ya asingger ed baley na Efraim. Inimbitaan ton onlad man iray amin a lalakin anak na ari.

24Linmad kinen Ari David tan kuanto, Papakatlian ko ray karnirok. Dagup kayo pa tan saray opisyal yo.

25Andi, anak ko, ebat na ari, No onla kamin amin, nairapan kan maung ed panangkailim. Ipapasoot nen Absalom, balet ag onabuloy so ari, tan papaonlaen to la.

26Balet inkuanen Absalom, Sigi sirin, anggan si Amnon labat so abuloyan yon onla.

Akin et sikato? tepet na ari.

27Balet mapilit si Absalom, kanyan inmabuloy si David a pilaen toy Amnon tan amin da ni ray arum a lalakin anak to.

Namparaan si Absalom na panangan a manepeg a para ari,

28tan binilin to ray aripen to: Imano yo no akainom lan maung si Amnon, tan kapangiganggan ko, patey yo. Ag kayo natatakot ta siak a dili so makaoley. Mampasebeg kayo tan ag kayo ontatalaw!

29Kanyan pinatey na saray aripen si Amnon onung na imbilin nen Absalom. Amin iray arum a lalakin anak nen David et kinabayoan da ray asno ra tan kibatiktik ira.

30Nen onsesempet ira, nibagad kinen David: Pinatey nen Absalom iray amin a lalakin anak moanggapoy anggan sakey ya atilak ed sikara!

31Inmalagey so ari, pinilat toy kawes to a pangipanengneng toy ermen to, tan tinmiblak ed dalin. Pinilat da met so kawes da ray kakaiba ton aripen to.

32Balet inkuanen Jonadab a lakin anak nen Simea a lakin agi nen David, Kagalang kon Ari, ag apatey iray amin ya anak mon lalaki. Si Amnon labat so apatey. Diad nengneng labat nen Absalom nalikas ya igagaem to lan pateyen si Amnon nanlapu lad samay impamasoot to ed kinen Tamar ya agi nen Absalom.

33Kanyan ag mo komun panisiaen so balitan inatey ya amin iray lalakin anak mo; si Amnon labat so inatey.

34Batik la balet si Absalom.

Kabebekta say bantay anengneng tod dalan ed gilig na palandey so olup na totoon onsasabin nanlapud Horanaim. Linmad kinen ari tan imbalita toy anengneng to.

35Inkuanen Jonadab ed kinen David, Anak mo ra tay onsasabi, onung na samay aganok nin imbaga.

36Kapangibaga tod saya, sinmabi ray lalakin anak nen David; insan ira manorangal, tan inmakis na ampaipait si David tan saray opisyal to.

37-38Batik si Absalom tan linmad ari na Gesur a si Talmai a lakin anak nen Amihud, tan nanayam diman na taloy taon. Abayag ya inermenan nen David si Amnon;

39balet nen ayari lay impanermen tod impatey nen Amnon, akailiw ed kinen Absalom.