1Inyakar da may Kaban na Sipanan ed tuldan imparaan nen David tan inyan dad dalem to. Insan angisaklang irad Dios na saray bagat a popoolan tan saray bagat a para kareenan.
2Kayariy impangibagat nen David, binindisionan tod ngaran na Katawan iray totoo,
3tan binunogan to ran amin na kakanen. Initdan toy balang sakey a laki tan bii ed Israel na sakey a tinapay, sakey a tegteg ya inkalut a karni, tan pigaran pasas.
4Tinoro nen David iray pigaran Levita a mangipanguloy pikakasi, pisasalamat, tan panangidayew ed Dios na Israel, diad arap na Kaban na Sipanan.
5Si Asaf so atoron pangulo tan si Zacarias so onkumadwad sikato. Saray manogtog na saray arpa et di Jeiel, Semiramot, Jehiel, Matatias, Eliab, Benaya, Obed-edom, tan Jeiel. Si Asaf so mampaknul na piangpiang,
6tan saray duaran pari a di Benaya tan Jahaziel so mampaknul ya inagew-agew na saray trumpita diad arap na Kaban na Sipanan.
7Saman ya agew so onaan ya impanoro nen David ed kinen Asaf tan saray kapara ton Levita a mankanta ray pangidayew ed Katawan.
Say Kantan Pangidayew(Sal. 105:1-15; 96:1-13; 106:1,47-48)8Misalamat kayod Katawan, ibawag yoy pakapanyari to,
tan ipaamta yod saray bansa iray ginagawa to.
9Kantaan yoy dayew so Katawan;
ibelyaw yoy amin a makapakelkelaw iran gawgawa to.
10Manggayaga kayo, ta kayaryan to itayo;
manliket komun ya amin iray mangigagalang ed Katawan!
11Laka yod Katawan tan kerew kayoy tulong to;
tan igalang yo ed ando lan ando.
12-13Sikayo ran kabyangay boleg nen Israel ya aripen na Dios,
sikayo ran kabyangay boleg nen Jacob a pinili na Dios
nunot yo ray makapakelaw a milagron ginagawa to,
tan saray sintinsian iniiter to.
14Say Katawan so Dios tayo,
para amin a katoowan iray ganggan to.
15Ag yo lilingwanan ya anggan kapigan so impisipanan to,
say impisipanan tod amin a kailalakan,
16say impisipanan tod kinen Abraham,
say sinambaan tod kinen Isaac.
17Say Katawan akisipanan ed kinen Jacob,
say andi-anggaan ya impisipanan tod kinen Israel.
18Iter kod sikay dalin na Canaan, inkuanto.
Sikatoy tawiren mo.
19Pigpigara nen saman iray totoo na Dios,
tan sangkaili rad dalin na Canaan.
20Nansosoblay so nanaayaman da ran bansa tan saray nanarian.
21Balet ag inyabuloy na Dios a pairapen ira na anggan siopa,
tan diad pangyagel tod sikara, pinapasakbayan to ray arari.
22Inkuanto, Ag yo didiwiten iray aripen kon pinilik;
ag yo papasakitan iray propitak!
23Kantaan yoy Katawan, amin yon katoowan ed tapew na dalin!
Ibawag yon inagew-agew so maung a balita ya inlaban to itayo.
24Ibando yod saray bansa so kagalangan to,
tan diad amin a katoowan iray makapakelaw a gawgawa to.
25Matalonggaring so Katawan, tan nepeg ya idaydayew;
nepeg a lalon igalang nen saray amin a diriyos.
26Talintao labat ya amin iray diriyos da ray arum a bansa,
balet say Katawan pinalsa to ray katawenan.
27Galang tan pakayari so walad kaliber-liber to;
biskeg tan liket so walad dalem na Timplo to.
28Amin yon katoowan ed tapew na dalin, idayew yoy Katawan;
idayew yoy kagalangan tan pakapanyari to.
29Idayew yoy mapagalang a ngaray Katawan;
mangawit kayoy bagat tan loob kayod Timplo to.
Dakmomo kayod arap na Masanton Katawan no omparontal;
30giwgiw kayod arap to, amin yon pinalsa!
Malet so inkiletneg na mundo tan ag balut natenyeg.
31Manliket kayo, sikayon dalin tan tawen!
Ibawag yod amin a bansa, Manaariy Katawan!
32Ongul kan dayat tan amin a pinalsa a manaayam ed sika
manggayaga kayon kaalogan tan amin yon pinalsa a manaayam ed sikayo.
33Saray kakiewan mankanta rad liket diad arap na Katawan,
no onsabin manoley ed sankamundoan so Katawan.
34Misalamat kayod Katawan, ta sikato et maung;
andi-anggan so panangaro ton ag mangoman!
35Ikuanyod sikato, Iyagel mo kami pa, O Dios a Manangilaban mi;
pantitipon mo kami pa; iyagel mo kamid saray kalaban a bansa,
pian misalamat kami tan idayew miy masanton ngaran mo.
36Idayew yoy Katawan a Dios na Israel!
Idayew yo natan tan anggad angga!
Insan inkuan na amin a totoo, Amen,
tan indayew day Katawan.
Say Panangigalang diad Jerusalem tan diad Gabaon37Imbaga nen David ed kindi Asaf tan saray kapara ton Levita ya ituloy dan sikaray makaoley ed panangigalang a ginagawad pasen a kawalaay Kaban na Sipanan. Nepeg ya inagew-agew so panggawa rad saray kimey da.
38Tinmutulong ed sikara si Obed-edom a lakin anak nen Jedutun tan saray anemaplo tan walon lalaki a kakanayon to. Si Hosa tan si Obed-edom so makaoley ed pangguardiad saray puirta.
39Balet si Sadoc tan saray kapara ton papari so impasen ton makaoley ed panangigalang ed Katawan diad Gabaon.
40Kinabwasan tan kapag labi so nepeg a pangisaklang dad saray bagat a popoolan diad tapew na altar onung na amin a nisulat ed Ganggan ya inter na Katawan ed Israel.
41Kaiba rad man si Heman tan si Jedutun tan saray arum a pinili tan intalaga a mankantay dayew ed Katawan lapud andi-anggaan a panangaro to.
42Di Heman tan Jedutun met so makaoley ed saray trumpita, piangpiang, tan saray arum a kagawaan na musika a togtogen ira no kantaen iray imnon panangidayew. Saray kabyangay boleg nen Jedutun so makaoley ed panagguardiad saray puirta.
43Insan sinmempet lay balang sakey, tan sinmempet met lay David a mangilugay ed pamilya to.
Who We AreWhat We EelieveWhat We Do
2025 by iamachristian.org,Inc All rights reserved.
