DEUTERONOMIO 13 - Maung a Balita Biblia (PnPV)(PnPV)

1Say sakey a propita odino sakey a managpatalus na kogip et nayarin mangisipan a manggaway sakey a milagro odino sakey a pakelaw,

2pian natangguyor to kayon mangigalang tan manlingkur ed saray diriyos ya ag yo ni ra inggalang nen saman. Anggaman ontua bilang so insipan to,

3ag yo dedengelen. Say Katawan a Dios yo et ikana to a panubok ed sikayo, pian naamtaan to no kasi inaro yo ed intiron puso yo tan intiron kamarerwa yo.

4Tombuk yo so Katawan tan takotan yo; toluk tan sumpal yo ray ganggan to; igalang yo tan mansiansia kayod sikato.

5Balet nepeg a pateyen so siopaman a managpatalus na kogip odino siopaman a propitan mangibagad sikayo a sumlangen yoy Katawan ya angipaway ed sikayod Egipto ya akaaripenan yo. Maoges itan a too ta labay to kayon iyarawi ed panagbilay ya ingganggan na Dios a tombuken yo. Nepeg a pateyen pian naandid pegley yo yan kaogsan.

6Nayarin anggan say agi yon laki, odino say anak yon laki, odino say anak yon bii odino say asawa yon bii ya inararo yo, odino say kaaro yon malmalet et maamut to kayon tanggoyuren a mangigalang ed arum a diriyos ya ag yo ni ran balut inggalang, sikayo tan saray lalaki yo.

7Nayarin say sakey ed sikara et tanggoyuren to kayon mangigalang ed saray diriyos da ray totoon manaayam ed abay yo, odino saray diriyos da ray totoon manaayam ed arawid sikayo.

8Balet ag yo aabuloyan a natanggoyur to kayo; ag yo anggan dedengelen. Ag yo kakasian o aabageyen, tan ag yo iyaagel.

9Patey yo! Sikayo so ononan manupak ed sikato, insan tupaken na arum a totoo.

10Tupak yo ya anggad ompatey! Sinali to kayon iyarawi ed Katawan a Dios yo ya angipaway ed sikayod Egipto ya akaaripenan yo.

11Diad satan narengelan na amin ya totood Israel so agawa; ontakot ira, et anggapo lay manggawa na onyan kaogsan.

12No manaayam kayo lad saray baley ya iter ed sikayo na Katawan a Dios yo, nayarin narengelan yo

13a pigaran andi-kakanaan a totoo ed bansa yo so amalikdod saray totood baley da a mangigalang ed saray diriyos ya ag da ni ran balut inggalang nen saman.

14No narengelan yoy ontan a balbalita, osisa yon maung; et no talagan tua ya agaway ontan a kaogsan,

15patey yo ray amin a totood satan a baley tan amin ya ayayep da. Deral yon sigput itan a baley.

16Pantitipon yon ibunton ed plasa iray amin a kayaryan na saray totoon manaayam diman. Insan yo poolan so baley tan amin a logan to a sikatoy sakey a bagat ed Katawan a Dios yo. Nepeg a satan a baley et paolyan ya aderal-deral ya anggad angga tan ag lan balut pasimbaloen ya ipaalagey.

17Ag kayo mangisisinup na antokaman a nepeg a deralen, et diad satan onkepa so ontan lan pasnuk na Katawan tan abageyen to kayo. Kasian to kayo tan parakelen to kayon totoo, onung na insipan tod saray lalaki yo,

18no onuren yo ray amin a ganggan ya inter kod sikayo diad sayan agew, tan gawaen yo ray amin a matonung.