SIRAC 45 - Maung a Balita Biblia (PnPV)(PnPV)

Si Moises

1Diad saray kabyangay boleg nen Jacob, intanduro toy sakey a matonung a lakin nala toy maung a linawa na balang too, tan inaro na Dios tan too. Si Moises yan too, a say pakanudnunotan ed sikato et sakey a bindision.

2Ginawa na Katawan a mapagalang a singa saray anghil, tan impagmaliw ton takotan na saray kalaban to.

3Diad panangiganggan nen Moises, tinmerak so desyang ed Egipto. Ginawa na Katawan a pagalangan na saray arari si Moises. Inter na Katawan ed sikato iray ganggan ton para saray totoo to tan impanengneng tod sikatoy kagalangan to.

4Pinili na Katawan si Moises ed amin da ray katoowan tan insaklang to, lapud inkatoor tan inkauyamo to.

5Imparengel tod sikato so bosis to tan inwanwan tod ambilonget a lorem, a lupalupaan ton inter diman ed sikato iray ganggan to, say Ganggan a mangiiter na bilay tan pakatalus, pian nibangat nen Moises ed saray Israelita iray totontonen nipaakar ed sipanan.

Si Aaron

6Intanduro na Katawan si Aaron, sakey a masanton too a singa si agi ton Moises, tan kabyangay tribu nen Levi.

7Andianggaan ya akisipanan ed sikato so Katawan, tan initdan to na nidoman kanepegan a manlingkur a pari ed saray totoo na Katawan. Pinagalangan to diad impangisolung tod sikato na mararakep iran kawes tan adikoraan na balibali,

8ya ayadyari rad karakpan. Initdan to na saray tanda na pakaoley: say linen a potut a pantalon, say kawes a para tagey, tan say kawes ya andokey a wala ray nibordan granada ed liber-liber na saloy.

9Wala met ed liber-liber na saloy iray kampanan balituk, pian no onakar, narengel ed Timplo so talangiting da, et nanunotan na Katawan iray totoo to.

10Initdan na Katawan si Aaron na masanton kawes a wala ray bordan balituk, asul, tan ambalanga; say apis na pagew a walay Urim tan Tummin,

11say ambalangan balkes a nilaga na marunong a kumikimey; saray mabmablin bato a wala ray ngaran a nitatak, inlira na platiro ed balituk a patoonan, tan niiyan ed apis na pagew a mangipanunot ed Katawan na saray labinduan tribu na Israel.

12Initdan na Katawan na turban a dinikoraan na balituk a nitatak ira yan salita: Nisaklang ed Katawan. Ginawa na marunong a kumikimey, marakep so inkaarti to, tan pakagalangan a baleg na mangisolung.

13Kasakbayay panaon nen Aaron, ag nin balut anengneng ira man a marakep a bengatla. Anggapoy arum ya angisolung odino mangisolung ed saraman, likud ed kinen Aaron tan saray kabyangay boleg to.

14Nepeg ya isaklang a mamidwad sanagew so bagat a trigo tan sigput a poolan.

15Kinonsagra nen Moises si Aaron ed kimey to, diad impangikalbo tod olo to na masanton panaglanan larak. Agawad sikara tan saray kabyangay boleg to so andi-anggaan a sipanan a manlingkur irad Katawan a papari to, tan bindisionan dad ngaran to iray totoo to.

16Pinili na Katawan ed amin a katoowan si Aaron a mangisaklang na saray bagat, mamool na saray ambalingit ya insinso a mangipanunot ed Katawan na saray totoo to, tan mangekal na saray kasalanan da.

17Impalima ton asikasoen nen Aaron iray ganggan tan initdan to na pakaoley a manintinsia tan mangibangat ed Israel na Ganggan.

18Aminsan, nen walad kalawakan iray totoo, walay grupo na saray totoon ampetang so olo ra lapud imon tan nankokomplut ira sumpad Moises. Sikara ya di Datan, Abiram, tan Kora, pati saray mananulong da.

19Anengneng na Katawan so gagawaen da, et akapasnuk; mapalaloy impetang na olo to, kanyan nanggaway milagro tan pinatey to rad manliub ya apoy.

20Insan to tinumangan lamet si Aaron diad impangiter to na nidoman kagalangan: say kanepegan a mangalad saray bagat ya ononan naani, pian duga so kanen na saray papari.

21Saray bagat a nisasaklang ed Katawan so kakanen na papari; inter ya na Katawan ed kinen Aaron tan saray kabyangay pamilya to.

22Balet si Aaron ag makatawir na dalin, aliwan singa saray arum a totoo; anggapoy nidoman parti na dalin a kayaryan to. Say Katawan so amin a nakaukolan to.

Si Finees

23Di Moises tan Aaron labat so ontalonad kinen Finees a lakin anak nen Eleazar diad inkamatoor ed Katawan. Agawaan toy impakapirdonay kasalanan na Israel lapud mabiskeg ton intalindeg so inkatoor to tan ag balut tinmakot nen linmaban ed pakaoley so balang sakey.

24Kanyan akisipanan so Katawan ed sikato ya anggan kapigan si Finees so makaoley ed santuario tan saray totoo to, a sikato tan saray kabyangay boleg to et bembenan dan ando lan ando so betang a Pangulon Pari.

25Doma yad impisipanan ed kinen David a lakin anak nen Jesse tan kabyangay tribu nen Juda, ta say inkaari niiter labat ed anak manlapud ama, balet say inkaari niiter manlapud Aaron ed amin da ray kabyangay boleg to.

26Natan, idayew yo so Katawan, ta sikato et maung. Kinoronaan to kayo na kagalangan. Itdan to kayo komun na kakabatan a manintinsiad saray totoo to onung ed kaptekan, pian mansiansia ya anggan kapigan so aligwas da tan say pakaoley yo.