SARAY ARARI 12 - Maung a Balita Biblia (PnPV)(PnPV)

Linmaban iray Tribu ed Baybay(2 Awa. 10:1-19)

1Linmay Roboam ed Sikem a nantitiponan na saray totood Israel a wala rad baybay, ta gawaen dan ari.

2Nadngelan ya nen Jeroboam a lakin anak nen Nebat, a wadman nid Egipto a dimay nila to nen imbatikan toy Ari Solomon, kanyan pinmawil manlapud Egipto.

3Impaawit na saray tribu ed baybay, insan ira linman amin ed kinen Roboam tan kuandad sikato,

4Ambelat so impasakbat nen amam ed sikami. No palemewan moy sasakbaten mi tan painomayan moy panagbilay mi, panlingkuran mi ka.

5Pawil ki dia kayariy taloy agew, ta ibagak ed sikayoy ebat ko, inkuantod sikara. Kanyan linma la ra.

6Insan impanon ya nen Roboam ed saray mamatakken a lalakin sumisimbawa nen ama ton Solomon. Antoy isimbawa yon iyebat kod saraman a totoo? tepet tod sikara.

7Inmebat ira, No labay mo a maung so panlingkur mod saraman a totoo, iter moy kerew da, et matoor ira lawas a manlingkur ed sika.

8Balet ag dinengel nen Roboam so simbawa ra. Ingen linmad saray lalakin binmaleg a kaiba to a sikaray sumisimbawa to la natan.

9Tinepet tod sikara, Antoy isimbawa yod siak? Antoy ibagak ed saraman a totoon onkekerew a palemewan koy sasakbaten da?

10Inmebat ira, Onyay ikuan mod saraman a totoo: Mabiskeg niy kiking ko nen say ulpo nen amak.

11Ambelat so impasakbat ed sikayo nen amak; ambelat niy ipasakbat kod sikayo. Nilatiko kayo nen amak; pekpeken ta kayoy balatyang!

12Kayariy taloran agew, pinmawil ed kinen Ari Roboam si Jeroboam tan amin a totoo, onung na imbaga na ari ed sikara.

13Maruksa ya inmebat ed sikara tan ag to tinombuk so simbawa da ra may mamatakken a sumisimbawa.

14Sinalita to may impaikuan na saray mamalangwer a sumisimbawa: Ambelat so impasakbat ed sikayo nen amak; ambelat niy ipasakbat kod sikayo. Nilatiko kayo nen amak; pekpeken ta kayoy balatyang!

15Say Katawan so akanlinawa a si Roboam et ipolisay toy kerew na saray totoo, pian napatwa so imbaga tod kinen Jeroboam diad panamegley nen propita Ahias a taga Silo. Sikato yay makasengeg ya ag dinengel na ari iray totoo.

16Nen abirbir na saray totoo ya ag ira dengelen na ari, inmeyag ira, Anggapo lay pibibiang tayod kinen David tan say pamilya ko. Antoy ginawa ran para sikatayo? Totood Israel, onsempet ti la! Akaoley lad sikaton dili si Roboam!

Kanyan sinmempet lan amin iray totood Israel.

17Pinaolyan da lay Roboam a nanoley ed saray totoon manaayam labat ed sakop na Juda.

18Insan imbaki nen Ari Roboam si Adoniram, say makaoley ed saray totoon pinasoot a mankimey, ya onlad saray Israelita, balet tinutupak da ya anggad inatey. Lapud saya, nangganat si Roboam a linmogan ed karwahi to, insan batik ed Jerusalem.

19Nanlapud saman, sumpad saray manaarin kabyangay boleg nen David iray totood baybay a nanarian na Israel.

20Nen nadngelan na saray totood Israel a pinmawil lay Jeroboam a nanlapud Egipto, binagaan dan mitongtong ed saray totoo, insan da ginawan ari na Israel. Saray kabyangan labat na tribu nen Juda so nansiansian matoor ed saray kabyangay boleg nen David.

Say Propisiya nen Semaya(2 Awa. 11:1-4)

21Nen akasabid Jerusalem si Roboam, impantitipon to ray sanlasus tan walomplon libo a pinilin lalaki ed saray tribu di Juda tan Benjamin, ta mibakal ira pian nipawil tod sikaton dili so panagoley tod saray tribu na Israel a wala rad baybay.

22Balet imbaga na Dios ed kinen propita Semaya

23ya onlad kinen kinen Ari Roboam na Juda, ta ibaga tod sikato tan amin a totood saray tribu di Juda tan Benjamin

24a say Katawan kuanto, Ag yo dodogpaan iray dilin agagi yo, saray totood Israel. Sempet kayo la, balang sakey ed sikayo, ta siak so nanlapwan na samay agawa. Inonur dan amin so ganggan na Katawan, kanyan sinmempet la ra.

Inkaindan nen Jeroboam so Dios

25Si Ari Jeroboam na Israel niliber toy padir so baley na Sikem diad nipokdul a luyag na Efraim tan nanayam diman ya agano. Tinmaynan diman tan niliber toy padir so baley na Penuel ya inalisan to.

26-27Inkuantod sikaton dili, No onya lan onyay nagagawa ya onlad Jerusalem iray totook a mangibagat ed Katawan diad Timplod man, naayat iran migampid kinen Ari Roboam na Juda, insan da ak pateyen.

28Kayari to yan dinalepdep, nanggawa na duaran balituk a kilaw na bakan kalakyan, insan inkuantod saray totoo, Abaybayag lay iyaakar yo lan iyaakar a mangigalang ed Jerusalem. Tondaan yo la. Totood Israel, nia ray diriyos yo ya angipaway ed sikayo ed Egipto!

29Inyan tod Betel imay sakey a bakan balituk tan diad Dan so sakey.

30Kanyan nankasalanan iray totoo diad iyaakar dan mangigalang ed Betel tan diad Dan.

31Nanggawa met ed saray toktok na pokdul na saray pasen a panangigalangan, tan anoro na saray papari diad saray pamilya ya aliwa ran kabyangan na tribu nen Levi.

Dineral na Dios so Altar ed Betel

32Ginawa nen Jeroboam a sakey a pista so kumalabinliman agew na kumawalon bulan, kaparay agew a sisilibraan ed Juda. Diad tapew na altar diad Betel nambabagat ed saray bakan balituk a ginawa to, tan angipasen ed Betel na saray papari a manlingkur ed altar a ginawa to.

33Diad kumalabinliman agew na kumawalon bulan, say agew a sikaton diliy angigana, linmad Betel, ta mansilibra onung na imbaga ton gawaen na saray totood Israel, diad panamegley na pambagat tod tapew na altar.