ISAIAS 43 - Maung a Balita Biblia (PnPV)(PnPV)

Insipan na Dios ya Iyagel to ray Totoo to

1Say Katawan ya amalsad sika,

Israel, kuanto,

Ag ka natatakotiyagel ta ka.

Tinawag ta kad ngaran mokayaryan ta ka.

2No ondalan kad aralem a danum, wala ak ed sika;

ag ka natabunan na saray gunigon mo.

No ondalan kad apoy, ag ka napoolan;

ag ka napasakitan na saray ambelat a subok ya onsabid sika.

3Ta siak so Katawan a Dios mo,

say masanton Dios na Israel, a mangilalaban ed sika.

Ipatalok so Egipto, Etiopia tan Seba pian narondon ka.

4Ipatalok ya amin iray bansa pian nilaban koy bilay mo,

lapud mabli kad siak

tan lapud inaro ta ka tan itdan ta kay kagalangan.

5Ag ka nanatakotwala ak ed sika!

Manlapud bokig tan sagur

pasempeten ko ray totoom.

6Ibagak ed baybay ya ibolus to ra

tan ibagak met ed abalaten ya ag to ra popokpokan.

Ibagak ya abuloyan da ray totook ya ompawil a manlapud saray arawin dalin,

ompawil iran manlapud amin a sokung na mundo.

7Sikaray dilin totook,

tan pinalsak ira a mangiter ed siak na kagalangan.

Say Israel so Tasi na Katawan

8Say Dios kuanto,

Awit yod korti iray totook.

Walay mata ra, balet ag ira makanengneng;

walay layag da, balet ag ira makadngel!

9Pantitipon yo ray amin a totoo ed saray bansa.

Siopad saray diriyos da so makapangipasakbay ed nagawa ed arapen a panaon?

Siopad sikaray angipasakbay ed nagagawa natan?

Iyarap komun na sarayan diriyos iray tasi ra

a mamaneknek ya ag ira alingo,

a mangipaliwawa ed katwaan na saray salita ra.

10Totood Israel, sikayo ray tasik;

pinili ta kayon aripen ko,

pian nakabatan yo ak tan manisia kayo ed siak

tan natalusan yo a Siak si Siak.

Likud ed siak anggapo lay arum a dios

nen saman, natan, tan anggan kapigan.

11Bukbukor ko so Katawan,

siak labat so makapangilaban ed sikayo.

12Impasakbay koy nagawa,

insan inlaban ta kayo.

Anggapoy dios na arum a bansa a nanggawad saya;

sikayo ray tasik.

13Siak so Dios tan Siak si Siak.

Anggapoy makapaliis ed pakayarik;

anggapoy makaoman ed antokaman a gagawaen ko.

Say Imbatik na saray Israelita a Nanlapud Babilonia

14Say masanton Dios na Israel, say Katawan a Mananondon yo, kuanto,

Diad pangilaban kod sikayo,

mangibaki ak na saray sondalo a mibakal ed Babilonia;

igebak iray puirta na siudad,

et magmaliw ya akis so eyag

na saray totoo to.

15Siak so Katawan, say masanton Dios yo.

Pinalsa ta ka, Israel, tan siak so arim.

16Nen saman a panaon, say

Katawan nanggaway dalan a binmeltang ed dayat,

say dalan ed madaluyon a danum.

17Insulong tod kadederal iray makapanyarin sondalo,

saray sondalon akakarwahi tan akakabayo.

Atumtumba ra, et ag la ra makabangon,

naandipat iran singa narep a silew na lamparaan!

18Balet say Katawan kuanto,

Ag kayo manmamatalek ed saray agawgawad imbeneg a panaon,

odino pinunot iray agawa nen saman ni.

19Talaranan yoy gawaen kon balo a bengatla.

Nagagawa lananengneng yo la natan!

Manggawa ak na dalan ed kalawakan

tan itdan ta kayo na saray sobul diman.

20Igalang ak na anggan saray ayayep ed katakelan;

idayew ak na saray asod katakelan tan saray abistrus

no saray ilog et paagosen kod kalawakan,

pian naitdan na danum iray totook a pinilik.

21Sikaray totoon ginawak a para siak,

mankanta ra na saray dayew ko!

Say Kasalanan na Israel

22Say Katawan kuanto,

Balet sinmawa kad siak nen saman, Israel;

ag mo ak inggalang.

23Ag mo ak inyakaran na karnirom a para bagat a popoolan;

ag mo inkanan pangigalang ed siak iray bagat mo.

Ag ta ka impansakbat na ambelat

diad impamilit kod sikan mangibagat

odino pinairap ta ka diad impankerew kod sikay insinso.

24Ag mo ak insaliwan na insinso

odino pinenek ak na taba na saray tabay ayayep mo.

Say agawa, ingen, et siak so impansakbat mo lapud saray kasalanan mo;

pinakesaw mo ak lapud saray kaogsan a ginagawam.

25Anggaman ontan, siak so Dios a mamipirdonad saray kasalanan mo,

et onyay gagawaen ko lapud inka-Dios ko.

Ag ta ka singilen ed saray

kasalanan mo.

26Onla ta ed korti; ipaway mo no antoy dalem mo!

Iparontal mo ray pankatonungan mo a mamaneknek a dugay gagawaen mo!

27Say sankaonaan a lakim et nankasalanan;

nankasalanan ed siak iray pangulom,

28tan saray manoley mo impagmaliw dan andi-kakanaan a pasen so santuariok.

Lapud saya dineral koy Israel;

inyabuloy kon napabaingan iray dilin totook.