TOBIT 8 - Maung a Balita Biblia (PnPV)(PnPV)

Apagit so Dimonyo

1Kayari ran angan, insan oras lay kakaogip, saramay ateng nen Sara et inolup day Tobias ya inyakar ed kuarto nen Sara.

2Anunotan to ra may bilin nen Rafael, kanyan kinaut tod supot ya angisinupan to imay apgo tan puso na sira. Insan inyan to rad mandarlang ya insinso.

3Say balingit to et pinagit tod sikara so dimonyo, tan batik ed Egipto. Inosilan nen Rafael imay dimonyo et nabot tod man. Binalur ton tampol iray lima tan sali to.

Say Pikakasi nen Tobias

4Nen si Tobias tan si Sara et bukbukor dan dua ed dalem na kuarto, binmangon si Tobias tan inkuantod asawa to, Bangon ka, ta ipikasi tan kasian tan iyagel ita komun na Katawan.

5Binmangon si Sara pian makapampikasi ran dua, tan kinerew dad Dios ya iyagel to ra. Insan nanpikasiy Tobias:

O Dios na saray lalaki mi, manepeg ya idayew mi ka.

Igalang komun ya ando lan ando so ngaran mo.

Na amin da ray pinalsam diad tawen tan dalin.

6Pinalsam si Adan tan inter mon asawa to si Eva,

a kaiba tan katulongan to.

Nagmaliw iran ateng na amin a katoowan.

Inkuanmo, Aliwan maung a mambukbukor so too.

Igawaan ko na sakey a manepeg a katulongan to.

7Katawan, pinilik ya asawa si Sara, aliwan lapud pamenek kod kaliktan na laman,

no ag ingen lapud amtak a matonung yan ginawak.

Kasian mo kami pa,

tan iyabuloy mon andokey so pambilay min dua.

8Insan bansag dan inkuay Amen,

9tan dinmokul irad saman a labi.

Mapagpagan Atateng

Ag abayag ed saman a labi, tinawag nen Raguel iray aripen to, tan pinmaway iran nanggaway lobuk,

10ta inisip nen Raguel, Ompatey met angangko si Tobias, et elekan tan balawen kami na saray totoo.

11Kayari ran nanggaway abut, pinmawil ed abung si Raguel tan kuantod kinen asawa to,

12Mangibaki kay sakey ed saray aripen a bibii, ta nengnengen to no mabilay niy Tobias. No inatey la, ikotkot mi lan tampol, pian anggapo lay mikabat.

13Angibaki ra sirin na sakey a biin aripen ya angalay lamparaan tan linman nengnengen to no mabilay niy Tobias. Kapangilokas tod puirtay kuarto, anengneng ton malet so ogip da ra may sanasawa.

14Pinmawil so aripen tan impakabat tod kindi Raguel tan si Edna a mabilay si Tobias tan anggapoy agawad sikato.

15Indayew nen Raguel so Dios na tawen.

Say Pikakasi nen Raguel

O Dios, manepeg kan idayew mi.

Idayew ka komun ya ando lan ando na saray totoom;

malinis komuy puso ra a mangidayew ed sika.

16Idadayew ta ka, lapud pinaliket mo ak;

mapangasi kad sikami

tan ag timwa so mapalalon katatakotan ko.

17O Katawan, kanepegan moy idayew mi;

kinasian mo ra yan tobun-balo a kapankasal,

saray alenleneg ya anak na saray atateng da.

Natan, kasian mo pa ra tan iyagel mo ra.

Pambilay mo pa ran dua a napnoy liket tan panangaro.

18Impatabunan nen Raguel ed saray aripen to imay abut kasakbayan na kabwasan.

Say Ponsiay Bansal

19Imbaga nen Raguel ed asawa to a manggawa ray malaem a tinapay ya ikanad baleg a ponsia. Insan sikato balet, pinmaway ed kawalaan da ray ayayep to, tan angisempet na duaran bakan kalakyan tan apatiran karniron kalakyan, tan ingganggan tod saray aripen to a patasen da ran para bansal.

20Tinawag toy Tobias tan sinambaan to ya ag to pataynanen a duay simba. Inkuanto, Manayam ka ni dia, ta mangan tan oninom itayo. Mangiter ya na kaabigan ed anak kon Sara, kasumpal na makapasinagem ya impanirap to.

21Insan alam so kapalduay kayamanan ko, tan sempet kad kindi amam ya ag ka naano tan maksil so laman mo. Ipatawir kod sika so keran kapaldua na kayaryan ko no andi kami lad bilay nen Edna. Ag mo panduaduaruwaan so panangaro mid sika; manlapud natan sikay anak mi a singa si Sara. Anggapoy nepeg mon takotan, anak ko.