1Labinduay taon nen Manases nen nagmaliw ya ari ed Juda, tan nanoley ed Jerusalem na limamplo tan limay taon. Si Hefziba so ina to.
2Nanggagawa na kaogsan ed arap na Katawan, ta inalig to ray makapaingungot ya ogali da ray pinapataynan na Katawan legan a mankukurang iray totoo to.
3Pinasimbalo ton impaalagey iray paganon pasen a panangigalangan a dinederal nen Ezekias ya ama to; nanggagawa na saray altar a panangigalangan ed Baal, tan nanggawa na talintao nen Asera, a singa samay ginawa nen Ari Acab na Israel. Inggalang met nen Manases iray bitewen.
4Nanggawad dalem na Timplo na saray altar a panangigalangan na saray pagano, anta say Timplo so pasen ya imbaga na Katawan a pangigalangan ed sikato.
5Diad duaran patio na Timplo nanggawa na saray altar a pangigalangan ed saray bitewen.
6Insaklang ton bagat a popoolan so lakin anak to. Nambubuyon tan nampaparles tan nampapanon ed saray panagpalar tan saray manangipanon ed saray ispiritu na inaatey. Mapalaloy impankasalanan tod Katawan, kanyan impanpasnuk to.
7Inyan tod dalem na Timplo so talintao nen diosan Asera. Onya so inkuan na Katawan ed kinen David tan si Solomon a lakin anak to nipaakar ed sayan Timplo: Diad Jerusalem ed sayan Timplo so pasen a pinilik ed amin da ray lugar na labinduan tribu na Israel a pangigalangan ed siak.
8No onuren na saray totood Israel iray amin a bilibilin ko tan sumpalen day intiron Ganggan ya inter ed sikara nen Moises ya aripen ko, ag ko ra abuloyan a napataynan ed dalin ya inter kod saray lalaki ra.
9Balet ag inonur na saray totood Juda so Katawan, tan inlagyat nen Manases iran nankasalanan na ambelat ni nen saray kasalanan a ginagawa da ray totoon pinapataynan na Katawan legan a mankukurang iray totoo to.
10Inkuan na Katawan ed panamegley na saray aripen ton propita,
11Ginagawa nen Manases ira yan makapaingungot a bengatlan maoges ni nen saray ginagawa da ray Cananeo; tan diad panamegley na saray talintaoy diriyos to inlagyat ton nankasalanan iray totood Juda.
12Kanyan siak, say Dios na Israel, so mangyakar na ontan lan deral ed Jerusalem tan Juda, et onkelaw so balang sakey a makadngel ed agawa.
13Dusaen koy Jerusalem a singa ginawak ed Samaria, a singa ginawak ed kinen Ari Acab na Israel tan saray kabyangay boleg to. Pataynanen ko ray totood Jerusalem, et magmaliw a malinis a singa platon pinonasan tan impatikleb.
14Ikaindan ko ray totoon nakdaan a mabilay, insan iyawat ko rad saray kalaban dan manakep ed sikara tan maneral ed dalin da.
15Gawaen ko yad saray totook, ta nankasalanan irad siak tan impanpasnuk da ak, nanlapu lad panaon a pinmaway ed Egipto iray lalaki ra ya anggad natan.
16Pinatey nen Manases iray amayamay a totoon anggapoy kasalanan, kanyan adelap na dala so daladalan na Jerusalem; sayan ginagawa to et kaaruman na samay impangilagyat ton angigalang ed saray talintao iray totood Juda, kanyan impankasalanan to rad Katawan.
17Nisulat ed libron Say Awaran na saray Ararid Juda iray arum nin ginagawa nen Manases, pati saray ginagawa ton kasalanan.
18Inatey si Manases, nipompon ed tanamanan ed palasio, say tanamanan na Uza, insan sinmalat ed sikaton nanari si Amon a lakin anak to.
Si Ari Amon na Juda(2 Awa. 33:21-25)19Duamplo tan duay taon nen Amon nen nagmaliw ya ari na Juda, tan nanoley ed Jerusalem na duay taon. Si Mesulemet ya anak nen Haruz a taga baley na Jotba so ina to.
20Nanggagaway kaogsan ed arap na Katawan a singa si ama ton Manases;
21inalig toy ginagawa nen ama to, tan inggalang to ray talintaoy diriyos ya inggalang nen ama to.
22Impolisay toy Katawan, say Dios na saray lalaki to, tan ag to inonur iray ganggan na Katawan.
23Nankokomplut iray opisyal nen Amon sumpad sikato, insan da pinatey ed palasio.
24Pinatey na saray totood Juda ira may amatey ed kinen Amon tan ginawa ran ari si Josias a lakin anak to.
25Nisulat ed libron Say Awaran da ray Ararid Juda iray arum nin ginagawa nen Amon.
26Nipompon si Amon ed lobuk diad tanamanan na Uza, insan sinmalat ed sikaton nanari si Josias a lakin anak to.
Who We AreWhat We EelieveWhat We Do
2025 by iamachristian.org,Inc All rights reserved.
