SAY KAKABATAN NEN SOLOMON 7 - Maung a Balita Biblia (PnPV)(PnPV)

Anggapoy Pidomaan na Ari ed Siopaman

1-2Ompatey ak a singa arum a too. Nanlapwak ed samay inmonan too a ginawad dalin. Nilokun ak manlapud bini na sakey a laki, diad impanliket na bii tan laki. Diad loob na siam bulan, antibokel so laman ko ed dala na eges na inak.

3Nen nianak ak, pinmaway ak ed mundo a singa arum a totoo. Ginmapo ak a sinmongap na dagem a sosongapen tayon amin; tan singa arum a totoo, akis so inmonan tanul a ginawak.

4Abalkut ak na lamping tan naasikaso ak.

5Anggapoy arin domay inggapo na bilay to.

6Para sikatayon amin, saksakey so iloloob ed bilay, tan saksakey so ipapaway.

Imbawag nen Solomon so Panangaro tod Kakabatan

7Diad impakabirbir kon sakey ak labat a too, nampikasi ak, et naitdan ak na pakatalus. Sinmabid siak so ispiritu na Kakabatan.

8Atagey niy impangipasen kod Kakabatan nen say dinanman a trono odino koronay ari. Anggapoy kuintay kayamanan no iparad Kakabatan.

9Ag makasimbang so kablian na saray alahas ed kablian na Kakabatan; no iyabay ed Kakabatan, amin a balituk ed mundo et singa ra labat sankaakup a buer, tan say pilak et singa labat pitek.

10Impasen kon mabli ni so Kakabatan nen say abig-laman tan maung ya indengan. Ag balut ombibilonget so karlangan na Kakabatan tan labay ko ni nen saray arum a liwawa.

11Kaolup na Kakabatan iray amin a maung a bengatla nen sinmabid siak. Inawitan to ak na ag nibalikas a kayamanan.

12Nanliketan ko ran amin, lapud inawit irad siak na Kakabatan. Ag ko abirbir nen saman a panlalapwan na sarayan amin a bengatla so Kakabatan.

13Masimoon ak a nanaral ed Kakabatan, et natan maliket ak a manginagnag na naaralan ko.

14Anggapoy makaoput na saray kayamanan na Kakabatan. Kakaaro kayo na Dios no ikana yo ra tan a kayamanan; aabubonan na Dios iray nanaaralan yod Kakabatan.

15Mampipikasi ak ed Dios a saray kanunotan ko et onnepeg ira komun ed naaralan ko, tan makapansalita ak komun onung ed linawa to. Sikato so manangiwanwan na Kakabatan; pepeteken to ray totoon makabat.

16Wala itayod silong na pakayari tan pakaoley tosikatayon dili, saray salita tayo, amin a pakatalus tan dunong tayo.

17Sikato so angiter ed siak na tuan pakatalus ed saray biskeg da ray pinalsa: no antoy inkagawaan na mundo; no panoy ikukurang na saray iliminto;

18no panoy itotombuk na kalindario ed igagalaw na agew, saray mansasalat a panaon,

19saray grupo na bitewen, tan say pantetelek na saray taon.

20Imbangat to ak na nipaakar ed saray mabilay a pinalsa, say kagagawa na saray ayayep ed katakelan, say biskeg na dagem, saray pakayari na katoowan a mannunot, saray nandoroman klasi na tanaman, tan say kana na saray lamut dan tambal.

21Naaralan ko ray bengatlan kabkabat la tan saray bengatlan ag ni akabatan nen saman,

22lapud say Kakabatan, a manitibokel na amin a mambibilay, et sikatoy bumabangat ko.

Say Inkanatural na Kakabatan

Maotek tan masanto so ispiritu na Kakabatan. Saksakey so inkanatural to, balet ipapaamta toy sikaton dili diad panamegley na amayamay a polaing. Ag agawad antokaman a bengatlan matiryal, tan makaiwas-iwas ed anggan iner. Malinew, malinis, tan matalek; ag nayarin napaakitan. Inaro toy kamaungan. Matdem tan ag nayarin taloen,

23mapangasi, tan kaaro na katoowan. Napanmatalkan tan ag manduaruwa, tan anggapo ray gunigon to. Walay pakayari to ed amin a bengatla, tan sankanengneng toy amin a bengatla. Tetebeken toy balang ispiritun maotek tan puro, anggan anto lay impis na inkagawa to.

24Mainomay nin onggalaw so Kakabatan nen say dilin kagagalaw; lapud inkapuro na Kakabatan, tetebeken toy amin a bengatla.

25Ingas na pakayari na Dios so Kakabatanpuro tan marmarlang a talagsik na kagalangan a manlalapud Makapanyarin-amin. Ag makasabid Kakabatan so antokaman a bengatlan marotak.

26Aninag na andi-anggaan a liwawa so Kakabatan, sakey ya ayadyarin ispiho na gagawaen tan kaabigan na Dios.

27Anggaman a mankikimey a bukor so Kakabatan, nagawaan ton amin. Gagawaen ton balo so amin a bengatla, anggaman ya ag mangooman. Manlapud sakey a kailalakan ya anggad sananey a kailalakan, say Kakabatan et onloloob ed saray kamarerwa da ray totoon masanto, tan gagawaen to ran kakaaro tan propita na Dios.

28Anggapoy lalon aaroen na Dios nen saray totoon maliket ed Kakabatan.

29Marakep ni so Kakabatan nen say agew tan amin da ray grupo na bitewen. Maung ni nen say dilin liwawa, lapud totombuken lawas na labi so agew, balet ag balut tataloen na kaogsan so Kakabatan.