ZACARIAS 8 - Maung a Balita Biblia (PnPV)(PnPV)

Insipan na Katawan

a Pasimbaloen ton Ipaalagey so Jerusalem

1Say Katawan a Makapanyarin-amin inter to yan salita ed siak:

2Pampilpilalekan kon tulongan so Jerusalem lapud inararok iray totoo to; lapud panangarok ed sikara siak so akapasnuk ed saray kalaban da.

3Ompawil ak ed Jerusalem a masanton siudad ko, tan manayam ak diman. Natawag iman a pasen a matoor a siudad tan say palandey na Katawan a Makapanyarin-amin et natawag na masanton palandey.

4Ompawil lamet imay gendat lan agawa a saray mamasiken tan saray akokolaw, a lapud kinatakken da mambastun la ra, et manyurong irad saray plasa na siudad.

5Saray dalan et napano lamet ed satan na saray ogogaw a lalaki tan bibiin manggagalaw.

6Nayarin ipasen na saray totoon atilak ed bansa ya ag yan balut nagawa, balet no para siak nagawa.

7Ilaban ko ray totook ed saray dalin ya akadakepan da,

8tan manlapud bokig tan sagur ipawil ko ran manayam ed Jerusalem. Magmaliw iran totook tan siak so Dios da a manoley ed sikara onung ed inkatoor tan inkatonung.

9Mampabiskeg kayoy linawa! Narerengel yo natan ira may salitan imbabaga na saray propita diad samay panaon a nililira so pundasion diad pamapasimbaloy kipaalagey na Timplo.

10Kasakbayan to man a panaon anggapoy toon nayarian toy mangupa na totoo odino ayayep, tan anggapoy toon ag igagaem na kalaban to. Impanbubusolan kod saman ya amin iray totoo.

11Balet natan doma so gagawaen kod saray totoon akapaliis ed patey ed sayan bansa.

12Anggapoy manigensigen ed sikara ed pantanem da. Mambunga ray sengeg na ubas da, mangiter na bungay tanaman so dalin da, tan daakan so ompelag ya oran. Iter ko ra yan amin a bindision ed saray totook ya akapaliis ed patey.

13Sikayo ran totood Juda tan Israel! Nen saman saray sangkaili mansasambaan ira ya ikuandad sakey tan sakey, Ondapo met komun ed sika so deral a singa samay deral a dinmapo ed Juda tan Israel! Balet ilaban ta kayo, insan saraman a sangkaili ikuandad sakey tan sakey, Nagamuran mo met komun so bindision a singa samay bindision ya agamuran na Juda tan Israel! Kanyan pabiskeg yoy linawa yo, ag kayo ontatakot.

14Say Katawan a Makapanyarin-amin kuanto, Nen impanpasnuk ak na saray lalaki yo, ninunot ko ya ipadalan so deral ed sikara tan ag ko inoman so kanunotan ko, no ag ingen intuloy kon sinumpal iray planok.

15Balet natan nununoten ko a bindisionan iray totood Jerusalem tan Juda. Kanyan ag kayo natatakot.

16Sarayay bengatlan gawaen yo: Salita yod balang sakey so katwaan. Diad saray korti ipakurang yo so petepeteg a katunongansay katunongan a mangiter na kareenan.

17Ag kayo mannununot na antokaman a makapasakit ed arum. Ag kayo mantatasi na tila a katekep toy samba. Kabosul koy panagtila, panagpikewet na katunongan, tan panagduksa.

18Say Katawan a Makapanyarin-amin inter to yan salita ed kinen Zacarias:

19Say ayunon nagagawa kapag kumapat, kumalima, kumapito tan kumaplon bulan et magmaliw a pista na liket tan gayagan para saray totood Juda. Nepeg yon aroen so katwaan tan kareenan.

20Say Katawan a Makapanyarin-amin kuanto, Onsabiy panaon a saray totood amayamay a siudad et onla rad Jerusalem.

21Saray totoon walad sakey a siudad inkuandad saray walad arum a siudad, Onla kamin mangigalang ed Katawan a Makapanyarin-amin tan onkerew kami na bindision to. Mila kayod sikami!

22Amayamay a totoo tan makapanyarin bansa so onlad Jerusalem a mangigalang ed Katawan a Makapanyarin-amin tan onkerew ira na bindision to.

23Diad saratan ya agew saray samploran sangkaili onla rad sakey a Judio tan ikuanda, Mikasakey kamid sika, lapud nadngelan min walad sika so Dios.