SIRAC 13 - Maung a Balita Biblia (PnPV)(PnPV)

1No diwiten moy alkitran, ompeket ed limam, tan no miolup-olup kad saray totoon mapaatagey, magmaliw a kaparam ira.

2Ag mo sasalien ya itagey so bengatlan ag mo nayarian, tan ag ka mimiolup ed saray totoon mayaman tan makapanyari ni nen say sika. Ag mo nayarin panabayen so banga tan kaldiro; nabetag so banga no natopa toy kaldiro.

3No akagawa na makapoy ed sakey a too so toon mayaman, nayarian ton pabalegen so ginawa ton makapoy; balet no say mairap-bilay so akagawa na makapoy, napilitan a mipirdonaan.

4Ikana ka na toon mayaman legan a walay nagugunggona tod sika, balet no nakaukolan mo, taynan to kan pangaskasiyan.

5Miamung ed sika no wala niy naala to tan maliket a pakatan to ka.

6No nakaukolan to ka, palikdoen to ka na saray imis to tan saray maligsa tan mauyamon salita to. Tepeten to, Walay nakaukolan mo?

7Pakanen to ka ya anggad pakabaingan mo. Diad kaunoran, no apakatan to kan amidwa odino amitlo, elekan to ka. No nanengneng mod satan, mankonkonwarin ag to ka kabat, et labasan to ka.

8Alwaran moy ag mo pakapalikdo; nayarin manliliket ka, et kabebekta sika lay apaabeba.

9No naimbitaan kan onlad abung na bibirbiren a too, manalwar kad kagagawam. Diad ontan imbitaan to kan naynay.

10No maasingger kan tuloy ed sikato, paabebaen to ka. Balet no maarawi ka met a tuloy ed sikato, nalingwanan to ka.

11Ag ka mankonkoanan a kaparam ed kipapasen, tan ag mo panmamatalkay amin ya ibabaga to. Anggan anto lay karokey tan karakep na tongtongan yo, susuboken to ka labat.

12No ag niamut na sakey a too iray nepeg ya ag ipaway, sikatoy maruksa; ag to kawkawanay pamasakit tod sika odino pangipriso tod sika.

13Iyamut mod sikan dili iray nepeg ya ag mo ipaway tan manalwar kan maung, ta mankukurang ka ed maatap a dalan.

15Labay na balang pinalsa so kapara to; ag midoma so too.

16No panoy pantitipon na saray ayayep a nampapara, ontan met a manoolup iray totoon nampapara.

17Anggapoy pipara na toon makasalanan ed toon matonung, a singa say asod katakelan ed kordiro.

18Anggapoy pipara na mayaman a too ed toon mairap-bilay, a singa say ason amo ed asod katakelan.

19Oosilan na saray mayaman iray mairap-bilay, a singa pangoosil na saray lion ed saray asnod katakelan diad maawang a patar.

20Panagbalaw ed saray mapaabeba so wala labat ed saray totoon mapaatagey; ontan met so gagawaen na mayaman ed saray mairap-bilay.

21No natumba so toon mayaman, ipaalagey na saray kakaaro to, balet no say mairap-bilay so atumba, anggapoy gawaen ed sikato na saray kakaaro to.

22No nalingo so toon mayaman, dakel iray manakub na kasalanan to tan ipaliwawa ray bengatlan ag to nepeg komun a sinalita. Balet no say mairap-bilay so nalingo, balaw labat lay narengel to. Anggaman a makabaliksan iray sasalitaen to, anggapoy ondengel.

23No mansalita so toon mayaman, mareen so balang sakey a too, tan idaydayew da lapud ibabaga to. Balet pansalitam so toon mairap-bilay, et balang sakey kuanda, Siopa tan a too? Itulak da ni ingen, no nipaparokul.

24Anggapoy kaogsan na pagmaliw a mayaman, no ag ka nankasalanan ed inyaman mo. Balet aliwa met a kasalanan so pagmaliw a mairap-bilay. Saray aliwan matonung labat so mannununot a kasalanan ya.

25Say walad dalem na pusom so panlalapway ipapatnag na lupam, maliket odino maermen.

26No maliket so liknaan mo, maliket so nengneng mo, anggaman a nakaukolay pinasyan panagnunot ed panggawa na saray probirbio.