ISAIAS 48 - Maung a Balita Biblia (PnPV)(PnPV)

Say Dios et Katawan

na Arapen

1Dengel yo ya, sikayo ran totood Israel,

sikayo ran totoon say sengeg yo et si Juda:

Mansasamba kayod ngaran na Katawan

tan ibabaga yon igagalang yoy Dios na Israel

balet anggapoy kabaliksan iray salita yo.

2Anggaman ontan ikikinon yon

ibaga a mibabaley kayod masanton siudad

tan manmamatalek kayod Dios na Israel,

a say ngaran to et Yahweh a Makapanyarin-amin.

3Say Katawan kuantod Israel,

Abaybayag ko lan impasakbay no anto ray nagawa;

insan kabebekta, ginawak ira.

4Amtak ya anawet so olom,

anaweawet a singa balatyang tan ag napiklon singa gansa.

5Lapud saya impasakbay ko lan abayag so nagawad sika ed arapen;

kasakbayan a nagawa ray bengatla imbabawag ko la ra,

pian ag mo ipasen a saray

talintao tan saray imahin na diriyos mo so angyabuloy a nagawa ra ya.

6Agawa la ray amin ya impasakbay ko;

nepeg mon birbiren yan katwaan.

Natan ibagak ed sikay balon bengatla ya onsabi,

bengatla ran nagawa ya ag ko impaamta nen saman.

7Natan ko labat iyaabuloy a nagawa ra;

ag mo ni nadngelan ya agawa lay onya.

Ta no agawa la nen saman, ibagam ya amtam lay nipaakar ed saya.

8Amtak ya ag ka napanmatalkan,

a sika lawas so bantug a mananumpa.

Sikato yay makasengeg ya ag mo yan balut nadngelan nen saman,

ya ag mon balut naamingaw.

9Pian idayew na saray totoo so ngaran ko,

popokpokan koy pasnuk ko,

ag ko la idapo tan ag ta kayo la pateyen.

10Sinubok ta kayod apoy na kairapan,

singa pakalinis na pilak ed palbaan.

Balet apapaway kon andi-kakanaan kayo.

11Lapud siak so makasengeg na panggagawak ed gagawaen ko

ag ko abuloyan a nalemlemew so ngaran ko

odino abuloyan koy siopaman a minabang ed kagalangan

a siak labat so akankayaryan.

Si Ciro, say Pangulon Pinili na Katawan

12Say Katawan kunato,

Dengel kad siak, Israel, saray totoon pinilik!

Siak si Siak, say sankaonaan, tan say sankaonuran!

13Inlira na limak so pundasion na mundo

tan impanat koy katawenan.

No tawagen ko ray mundo tan saray katawenan,

ondago ran tampol tan iparontal day sikaran dili.

14Mantitipon kayo, amin yo, tan dengel yo ak!

Anggapod saray diriyos so

makapangipasakbay a say toon pinilik et dogpaan toy Babilonia;

sumpalen to so labay kon pagawad sikato.

15Siak so nansalita tan anawag ed sikato;

inwanwan ko tan impanpalabok.

16Singger kad siak natan tan dengel moy ibagak.

Nanlapu lad gapo anggapoy iyaamut kod panagsalitak

tan tinmua ya amin iray salitak.

(Natan say Katawan a Dios initdan to ak na pakayari to tan imbaki to ak.)

Say Plano na Katawan

ed saray Totoo to

17Say masanton Dios na Israel,

say Katawan a Mananondon yo, kuanto:

Siak so Katawan a Dios yo,

say Dios a mangibangat ed sikayo ed pankaabigan yo

tan sikatoy mangiwanwan ed dalan

na panagbilay a nepeg yon tombuken.

18No komun ta dinmengel kayo ed saray ganggan ko,

inmagos komun ed sikayo ray bindision

a singa kolus ya ag balut naekatan.

Sinmasabi komun ed sikayoy pananalo

a singa saray daluyon ya onsisipwak ed gilig na dayat.

19Singa la komun karakel na buer so karakel na saray kabyangay boleg yo,

tan andi-duaruwa komun ya ag ko ran balut impapatey.

20Paway kayod Babilonia, taynanan yo man a pasen!

Maliket yon ibawag so balita; ipaamta yod amin a pasen:

Dinondon la na Katawan so aripen ton Israel!

21Nen inwanwan na Katawan ed kalawakan iray totoo to,

ag da asaliy napgaan.

Pinapaway ton para sikara so danum ed baton-dampay;

nilengat toy baton-dampay, et inmagos so danum.

22Anggapoy kareenan so bilay da ray managkasalanan, kuay Katawan.