1Si David angipaalagey ed Siudad nen David na saray abung a para sikaton dili. Angiparaan met na pasen a para Kaban na Sipanan na Dios tan impaalageyan to na tulda.
2Insan inkuanto, Saray Levita labat so nepeg a manawit na Kaban na Sipanan, ta sikara labat so pinili ton manawit ed saya tan manlingkur ed sikato diad ando lan ando.
3Kanyan impantitipon nen David ed Jerusalem iray amin a totoo, ta iyakar da may Kaban na Sipanan ed pasen ya imparaan ton panginan.
4Insan impatawag to ray kabyangay boleg nen Aaron tan saray Levita.
5Manlapud boleg nen Coat, sinmabiy Uriel tan saray sanlasus tan duamplon kakanayon to ya ipapangulo to.
6Manlapud boleg nen Merari, sinmabiy Asaya tan saray duanlasus tan duamplon kakanayon to ya ipapangulo to.
7Manlapud boleg nen Gerson, sinmabiy Joel tan saray sanlasus tan talomplon kakanayon to ya ipapangulo to.
8Manlapud boleg nen Elizafan, sinmabiy Semaya tan saray duanlasus a kakanayon to ya ipapangulo to.
9Manlapud boleg nen Hebron, sinmabiy Eliel tan saray walomplon kakanayon to ya ipapangulo to.
10Manlapud boleg nen Uziel, sinmabiy Aminadab tan saray sanlasus tan labinduan kakanayon to ya ipapangulo to.
11Impaawit nen David ira di Sadoc tan Abiatar a paparin tan saray Levitan di Uriel, Asaya, Joel, Semaya, Eliel, tan Aminadab.
12Inkuantod sikara, Sikayo ray pangulo na saray boleg na Levita. Linisan yo onung ed ganggan so sikayon dili tan saray kapara yon Levita, pian nayarian yon awiten so Kaban na Sipanan na Katawan a Dios na Israel ed pasen ya imparaan kon panginan.
13Anggapo kayod man a mangawit nen inmona, kanyan say Katawan a Dios tayo dinusa to itayo lapud ag tayo inggalang onung na nepeg a pangigalang ed sikato.
14Nilinisan sirin na saray papari tan saray Levita so sikaran dili, ta iyalis day Kaban na Sipanan na Katawan a Dios na Israel.
15Sinakbat na saray Levita ed saray tiken imay Kaban na Sipanan, onung na ingganggan na Katawan diad panamegley nen Moises.
16Ingganggan nen David iray pangulo na saray Levita a manoro ra na saray nandoroman Levita a mankanta tan mantogtog na maliket iran togtog ed saray arpa tan piangpiang.
17-21Diad saray boleg a marunong a mankanta pinili ran mantogtog na saray gansang piangpiang si Heman a lakin anak nen Joel, say kanayon to a si Asaf a lakin anak nen Berekias, tan si Etan a lakin anak nen Cusaias a kabyangay boleg nen Merari. Saray manogtog na saray atagey a tuno na arpa, pinili da ray onggendan: Zacarias, Aziel, Semiramet, Jehiel, Uni, Eliab, Maasias tan Benaya.
Saray manogtog na saray abeban tunon arpa, pinili da ray onggendan: Matatias, Elifelehu, Michias, Azazias, tan saray guardiay Timplo a di Obed-edom tan Jeiel.
22Si Kenanias so apilin makaoley ed saray Levitan kumakanta tan tumutogtog lapud marunong ed musika.
23Di Berekias tan Elkana et apili ran guardia na Kaban na Sipanan.
24Saray paparin di Sebanias, Josafat, Natanael, Amasias, Zacarias, Benaya, tan Eliezer et apili ran mamaknul na trumpita ed arap na Kaban na Sipanan. Di Obed-edom tan Jehias et apili met iran guardia na Kaban na Sipanan.
Say Kaban na Sipanan Nialis ed Jerusalem(2 Sam. 6:12-22)25Kanyan si David, saray pangulo na Israel, tan saray pangulo na sondalo et malikeliket iran linma ed abung nen Obed-edom, ta alaen da may Kaban na Sipanan.
26Angibagat ira na pitoran bakan kalakyan tan pitoran karniro, lapud tutulongan na Dios iray Levitan manasakbat na samay Kaban na Sipanan.
27Si David, saray tumutogtog tan saray kumakanta, si Kenanias a pangulo ra, tan saray Levitan manasakbat na Kaban na Sipanan et akasolung iran amin na sankaabigan a linen a tunika. Akasolung met si David na linen ya ipod.
28Kanyan amin da ray Israelita inolup da ya anggad Jerusalem imay Kaban na Sipanan a kataruk day eyag na liket tanul na saray trumpita, tambuyog, piangpiang, tan togtog na saray arpa.
29Legan a niyaakar ed siudad so Kaban na Sipanan, tinmandag si Micol a biin anak nen Saul, et anengneng toy Ari David a mansasayaw-sayaw tan manlulukso-lukso ed liket. Lapud saya naingungotan ed kinen David.
Who We AreWhat We EelieveWhat We Do
2025 by iamachristian.org,Inc All rights reserved.
