LEVITICO 16 - Maung a Balita Biblia (PnPV)(PnPV)

Say Agew a Pangekal na Kasalanan

1Say Katawan akisalita ed kinen Moises kayari na impatey na saramay duaran lalakin anak nen Aaron ya inatey ira nen angisaklang ira na aliwan masanton apoy ed Katawan.

2Inkuanto, Ibagam ed kinen agim ya Aaron a no manepeg a panaon labat so iyakar tod dalem na kurtina diad Sankasantosan a Pasen, ta ompanengneng ak diman ed sakey a lorem diad tagey na sakub na Kaban na Sipanan. No ag to ya toluken, nepeg a pateyen.

3Nayarin onloob ed Sankasantosan a Pasen kayari ton angawit na kilaw a bakan kalakyan ya ibagat ton para kasalanan tan say sakey a karniron kalakyan ya isaklang a bagat a popoolan.

4Insan say Katawan inter to ray onggendan a totontonen. Kasakbayan ya onloob ed Sankasantosan a Pasen si Aaron, nepeg a manames tan isolung to ray kawes na pari: say linen a kawes tan pantalon a potut, say balkes, tan say turban.

5Saray Israelita mangiter ira ed kinen Aaron na duaran kanding a kalakyan ya ibagat a para kasalanan tan sakey a karniron kalakyan ya isaklang a bagat a popoolan.

6Mangibagat na sakey a kalakyan a baka a pangekal ed saray dilin kasalanan to tan saray kasalanan da ray kabyangay pamilya to.

7Insan to iyakar ed lolooban na Tuldan Ayamay Katawan ira may duaran kanding.

8Diman to gawaen so pampapalaranan; ikana toy duaran bato a say sakey nanmarka na para Katawan tan say sakey para Azazel.

9Si Aaron isaklang toy kanding ya apilin para Katawan tan ibagat ton para kasalanan.

10Say kanding ya apilin para Azazel iyapay ton mabilay ed Katawan tan ibolus tod kalawakan diad Azazel, pian naekal iray kasalanan na katoowan.

11No ibagat nen Aaron imay bakan kalakyan a para saray kasalanan to tan saray kasalanan da ray kabyangay pamilya to,

12mangala na pananginay insinso a napnoy ngalab a nanlapud altar tan duaran akup a pinon insinso, insan awiten to ra ed loob na Sankasantosan a Pasen.

13Diman ed arap na Katawan iyan tod ngalab imay insinso, pian say asewek na samay insinso et nasaniban to may sakub na Kaban na Sipanan; ag to nanengneng ed satan imay sakub et ag ompatey.

14Mangala na daiset a dala to may baka tan diad panamegley na tamoro to iwalsik tod arap na samay sakub, insan mamimpito ton iwalsik so daiset a dala diad arap to may Kaban na Sipanan.

15Kayari to ya, pateyen to may kanding ya ibagat a para saray kasalanan da ray totoo. Awiten to ed Sankasantosan a Pasen so dala to tan iwalsik tod samay sakub, insan diad arap na samay Kaban na Sipanan a singa ginawa tod dala na samay baka.

16Diad onya, si Aaron gawaen toy sirimonya na panlinis ed samay Sankasantosan a Pasen lapud inkarotak na saray Israelita tan lapud kasalanan dan amin. Onyay nepeg ton gawaen ed samay Tulda, lapud manalalagey ed pegley na kampo a marotak onung ed ganggan.

17Anggapoy toon nepeg a manayam ed dalem na Tulda manlapud iloob nen Aaron ed Sankasantosan a Pasen a manggaway sirimonya na panlinis ya anggad ipaway to. Kayari ton gawaen so sirimonya a para sikato, para pamilya to, tan para amin ya Israelita,

18nepeg ya ompaway ya onlad altar a panagpoolan na saray bagat, ta linisan to. Nepeg a mangawit na daiset a dala to may bakan kalakyan tan daiset a dala to may kanding tan iporanis to ra ed saray pinagkasaklur na saray suyok na altar.

19Diad panamegley na tamoro to nepeg a mamimpito ton walsikan so tapew na altar. Diad onya, nalinisan to may altar ed saray kasalanan da ray totood Israel tan napasanto to.

Say Kanding ya Ibolus

20No asumpal la nen Aaron a gawaen so sirimonya na panlinis ed Sankasantosan a Pasen, saray arum nin parti na Tuldan Ayamay Katawan tan say altar, iyapay tod Katawan imay kanding ya apilin para Azazel.

21Itapew ton duay lima to ed olo na samay kanding tan ipatua to dia iray amin a kaogsan, kasalanan, tan kasusumlang na saray totood Israel. Diad onya, niyalis to ra ya ed olo na samay kanding. Samay kanding et ibolus ed kalawakan na sakey a lakin apilin manggawa ed saya.

22Samay kanding et awiten ton amin iray kasalanan da ray Israelita diad dalin ya ag natotoowan.

23Insan si Aaron onloob ed Tulda, lakseben to ray kawes na pari ya insosolung to kasakbayan a linmoob ed Sankasantosan a Pasen, insan to la rad man taynan.

24Nepeg a manames ed masanton pasen insan to isolung so dilin kawes to. Kayari to ya, ompaway, ta mangisablang na bagat a popoolan a mangekal na saray dilin kasalanan to tan saray kasalanan da ray katoowan.

25Poolan tod tapew na altar so taba na ayep ya ibagat a para kasalanan.

26Say toon angibolus na kanding ed kalawakan diad Azazel et nepeg ya ipesak toy kawes to tan manames kasakbayan ya ompawil ed kampo.

27Say laman na samay baka tan samay kanding ya imbagat a para kasalanan a say dala ra et niakar ed Sankasantosan a Pasen a pangekal na kasalanan, et iyakar irad paway na kampo tan diman ira poolan. Say katat, say karni, tan saray pait et poolan ira.

28Say toon mamool ed saraya et nepeg ya ipesak toy kawes to tan manames kasakbayan ya ompawil ed kampo.

Saray Gawaen no Agew a Pangekal na Kasalanan

29Saray onggendan a totontonen et nepeg a tombuken ira ya anggan kapigan man a panaon. Diad kumaplon agew na kumapiton bulan, saray Israelita tan saray sangkailin manaayam ed kawalaan da et nepeg a manayuno ra tan ag ira mankimey.

30Diad sayan agew gawaen so sirimonya a panlinis ed sikara ed saray kasalanan da, pian nalinisan ira onung ed ganggan.

31Sayan agew et masanton tuloy, kanyan saray totoo et nepeg a manayuno ra tan ag ira mankimey. Sarayan totontonen et nepeg a tombuken ira ya anggan kapigan man a panaon.

32Say Pangulon Pari a nikonsagra tan nisaklang a salatan toy ama to et sikatoy manggawa na sirimonya na panlinis. Mansolung na saray kawes na pari

33tan gawaen toy sirimonya na panlinis ed Sankasantosan a Pasen, saray arum nin a parti na Tuldan Ayamay Katawan, say altar, saray papari, tan amin ya Israelita.

34Sarayan totontonen et nepeg a tombuken ya anggan kapigan man a panaon. Sayan sirimonya et nepeg a gawaen a maminsan ed sakey taon a panlinis ed amin a kasalanan da ray Israelita.

Ginawa sirin nen Moises so ingganggan na Katawan.