2 SAMUEL 3 - Maung a Balita Biblia (PnPV)(PnPV)

1Abayag a panaon so impanbabakal na saray totoon akigampid pamilya nen Saul tan saray totoon akigampid kinen David. Diad ibibiskeg lan ibibiskeg nen David, onkakapoy lan onkakapoy iray kalaban to.

Saray Lalakin Anak nen David

2Diad Hebron nianak iray onggendan ya anak nen David manlapud onona ya anggad kumanem: Amnon, a say ina to et si Ahinoam a taga Jezreel;

3Kileab, a say ina to et si Abigail a balo nen Nabal a taga Carmel; Absalom, a say ina to et si Maaca ya anak nen Ari Talmai a taga Gesur;

4Adonias, a say ina to et si Hagit; Sefatias, a say ina to et si Abital;

5Itream a say ina to et si Egla, ya asawa nen David. Nianak ira yan amin ed Hebron.

Akitipon si Abner ed kinen David

6Legan a mambabakal iray totoon akigampid pamilya nen Saul tan saray totoon akigampid kinen David, ompapalaloy pakapanyari nen Abner ed saray totoo nen Saul.

7Aminsan ya agew, si Isboset ya anak nen Saul inakusa toy Abner ya akiakdul ed sakey ya asawa nen Saul a si Rizpa ya anak nen Aya.

8Lapud saya, pinmetang a maung so olo nen Abner. Inkuanto, Nababaluan mon manlilingkur ak ed Juda. Traidor ak sirin? Nanlapu lad gapo matoor ak ed Saul ya amam, saray agagi ton lalaki, tan saray kakaaro to, tan iyaagel ta kad kinen David; natan balet aakusaen mo ak a nankasalanan lapud sakey a bii!

9-10Insipan na Katawan ed kinen David ya ekalen toy nanarian ed kinen Saul tan saray kabyangay boleg to, insan to gawaen ya ari si David ed Israel tan Juda, manlapud baley na Dan ya anggad baley na Beer-seba. Pateyen ak komun na Dios no ag ko gawaey polaing ya ontua ya!

11Ag akaskasel si Isboset, tan mapalaloy takot tod kinen Abner.

12Angibakiy Abner na pigaran totoo ed kinen David a wala natan ed Hebron, tan impaikuanto, Siopay manoley ed sayan dalin? Mipaknaan kad siak, ta tulongan ta kan mananggoyur ed amin ya Israelita a migampi rad sika.

13Inmebat si David, On, sigi! Mipaknaan ak ed sika no awiten mo diay Micol a biin anak nen Saul diad iyakar mo dian mitongtong ed siak.

14Angibaki met na pigaran totoo ed kinen Isboset tan impaikuanto, Ipawil mod siak si asawak a Micol. Nambayar ak na sanlasus a ngoroy baog na kayaryan na saray Filisteo, pian naasawak.

15Kanyan angibakiy Isboset na angala ed kinen Micol ed kinen asawa to a si Paltiel ya anak nen Lais.

16Mannangnangis ya inolup nen Paltiel si asawa to ya anggad baley na Bahurim. Balet nen Pawil ka la, kuanen Abner ed Paltiel, pinmawil la.

17Linmay Abner ed saray panguloy Israel tan kuantod sikara, Abayag lan pilalek yon manariy David ed sikayo.

18Niay pankanawnawa yo natan. Nanunotan yo angangko ya inkuay Katawan, Ikanak so aripen kon David a mangyagel ed saray totook ya Israelita ed saray Filisteo tan saray arum a kalaban da!

19Akisalita met si Abner ed saray totoo ed tribu nen Benjamin, insan linmad Hebron a mangibagad kinen David no antoy insipan a gawaen na saray totood tribu nen Benjamin tan saray Israelita.

20Nen si Abner tan saray kakaiba ton duamplon lalaki et linma rad kinen David diad Hebron, nanggaway David na sakey a baleg a ponsia a para sikara.

21Insan inkuanen Abner ed kinen David, Onla ak la a mananggoyur ed saray amin a totood Israel a migampi la rad sika. Awaten da kan manari ed sikara, et nagamuran mod satan so pilalek mon manoley ed intiron bansa. Insipan nen David ed kinen Abner ya anggapoy maniwit ed sikato, insan to la pinaonla.

Pinatey nen Joab si Abner

22Ag abayag, sinmabin nanlapud laban si Joab tan saray arum ya opisyal; amayamay so awit dan asamsam da. Balet si Abner ag la kaiba nen David ed Hebron. Andi lad man, ta pinasempet la nen David kayari ton insipan ya anggapoy maniwit ed sikato.

23Nen sinmabiy Joab tan saray totoo to, nibagad sikato a linmay Abner ed kinen Ari David tan pinasempet nen David kayari ton insipan ya anggapoy maniwit ed sikato.

24Kanyan linmay Joab ed ari tan kuantod sikato, Antoy ginawam? Linmad sikay Abnerakin et onmay impangibakim ed sikato?

25Linma dian mamalikdod sika. Linma dian mangamta ed saray pasen a lalaen mo tan no anto ray gagawaen mo. Andi-duaruwan amtam ira ya!

26Kataynan tod kinen David, angibakiy pigaran totoo a mangawit ed kinen Abner. Nabot dad Bobun na Sira tan pinapawil da; balet ag amta ya nen David.

27Kasabi nen Abner ed Hebron, impaliis nen Joab ed puirta tan konwarin pitongtongan to, balet ta sinaksak tod eges. Kanyan apatey si Abner lapud pinatey toy Asael ya agi nen Joab.

28Nen nadngelan nen David so agawa inkuanto, Kabat na Katawan a saray totook tan siak et anggapoy pibabali mid sayan impamatey ed kinen Abner ya anak nen Ner.

29Pakadusaan ya komun nen Joab tan amin a kabyangay pamilya to. Diad kapag kailalakan, walan wala komuy lakin kabyangay pamilya to a mansakit na gonoriya, o kating, o say nayarian ton gawaen labat et say kimey na bii, o napatey ed bakal odino naerasan!

30Kanyan akabawi si Joab tan si agi ton Abisai ed kinen Abner lapud impamatey tod agi ran si Asael diad bakal ed Gabaon.

Nipompon si Abner

31Kanyan ingganggan nen David ed kinen Joab tan saray totoo to a pilaten day kawes da, mankawes iray sako, tan panermenan day Abner. Nen pompon, nanakar a tinmombuk si Ari David ed longun nen Abner.

32Nipompon ed Hebron si Abner, tan diad lobuk manorangal so ari tan saray amin a totoo.

33Kinanta nen David yan kantay ermen a para si Abner:

Akin et inatey a singa ambagel si Abner?

34Ag abalur iray lima to,

Ag met ataker iray sali to;

Inatey a singa toon pinatey na saray kriminal!

Insan inakisan lamet na saray totoo.

35Sanagew a tatangguyoren na saray totoo si David a mangan, balet sinambaan to, Pateyen ak komun na Dios no mangan ak na antokaman kasakbayan ya onselek so agew!

36Naimano da ya tan akaliket ira. Say katwaan to et panliketan da so antokaman a gawaen nen David.

37Amin a totoo nen David tan amin a totood Israel et akabatan da ya anggapoy pibabali nen David ed impatey nen Abner.

38Inkuan na ari ed saray opisyal to, Ag yo ta amta a diad sayan agew et inatey so sakey a matalonggaring a pangulo ed Israel?

39Anggan sakey ak ya arin pinili na Dios, makapkapoy ak ed sayan agew. Ag ko nayariay inkaruksa da ra yan lalakin anak nen Sarvia! Dusaen komun na Katawan ira yan kriminal onung ed kanepegan da!

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help