2 SARAY AWARAN 19 - Maung a Balita Biblia (PnPV)(PnPV)

Nampasnukan na sakey a Propita si Josafat

1Pinmawil ed palasio to ed Jerusalem si Ari Josafat ya anggapoy maoges ya agawad sikato.

2Si propita Jehu a lakin anak nen Hanani inabet toy ari tan kuantod sikato, Abaloan mo a maung a tulongan iray maoges a totoo, tan say migampi ed mamobusol ed Katawan? Diad impanggawam na onya, impanpasnuk mod sika so Katawan.

3Anggaman ontan, walay kamaungan mo. Inekal mon amin iray tanda na diosan Asera ya igagalang na saray totoo, tan nampilalekan moy mangonur na linaway Dios.

Saray Pasimbalon Ginagawa nen Josafat

4Nanayam ed Jerusalem si Josafat, balet ogali toy onla ed saray totoo, manlapud Beer-seba diad abalaten ya anggad samsamput na kapokdulan na Efraim diad baybay, ta tangguyoren to ray totoo ya ompawil ed Katawan a Dios da ray lalaki ra.

5Anoro na saray huis ed balang aliber na padir a siudad na Juda

6tan binibilin to ra: Api-apiger yoy panintinsia yo; aliwan too so nanlapwan na pakayari yon manintinsia no ag ingen say Katawan, tan walad sikayo so Katawan no manintinsia kayo.

7Takotan yoy Katawan tan apiger yoy antokaman a gawaen yo, lapud say Katawan a Dios tayo et ag to labay so pamikewet ed katunongan, odino say panaglabi, odino say pangawat na pasoksok.

8Diad Jerusalem, anoroy Josafat na saray Levita, papari, tan pigaran matalonggaring a totoo a sikaray manintinsia ed saray kason nipaakar ed impanumlang ed Ganggan na Katawan, odino saray nipaakar ed kolkolan na saray totood siudad.

9Saraya so bilin tod sikara: Nepeg yon gawaen iray kimey yo a katekep na takot ed Katawan; nepeg a matoor kayod sikato ed amin a gawaen yo.

10No wala ray kabansaan yon taga inerman a siudad a mangisegep ira na kason nipaakar ed impamatey, odino nipaakar ed impanumlang ed dinanman a ganggan o totontonen, nepeg yo ran bilinen a maung nipaakar ed gawaen da legay bista, pian ag ira mankasalanan ed Katawan. No ag yo ya gawaen, ondapod sikayoy pasnuk na Katawan ed sikayo tan saray kabansaan yo. Balet no gawaen yoy kanepegan yo, ag kayo mankasalanan.

11Si Amarias a Pangulon Pari so makaoley ed amin a kason nipaakar ed Katawan. Si Zebadias a lakin anak nen Ismael tan gobirnador na Juda so makaoley ed amin a kason nipaakar ed gobirno. Saray Levita so makaoley ed pakagawa na saray sintinsia na korti. Pabiskeg yoy linawa yo tan tombuk yo ra yan bilin; pilaan komun na Katawan iray matonung!