1Balet legan da ra yan nagagawa, maliwliwan silew so onsisindag ed saray masanton totoom. Nadngel na saray kalaban da so bosis da, balet ag da ra nanengneng. Makakaibeg irad maung a kapalaran na saray totoom ya ag ira maniirap.
2Akisalsalamat ira yan kalaban, lapud ag ombabawid sikara natan iray totoon nanggawaan day makapoy, kanyan kinerew dan ontaynan la ra.
3Insan mo inwanwan iray totoo legan dan binmeltang ed bansan ag da amta. Inwanwan mo rad panamegley na lusek ya apoy. Singa agew iman ya apoy tan ag to ra pinasakitan ed saman a biahin mapagalang.
4Balet saray kalaban da, ya ag ira naabuloyan a makanengneng ed samay apoy, et kanepegan day apriso ed kabilongetan, lapud impriso da ray totoom. Diad panamegley na saray totoom, say andi-anggaan a liwawa na Ganggan mo et niiter ed sankamundoan.
Say Impatey na saray Egipsion Anak a Pangulowan5Nen gagawaen na saray kalaban mo so pilalek dan mamatey ed saray masususon anak na saray masanton totoom, walay sakey ya ogaw a nikaindan balet niagel lamlamang. Insan mo dinusa iray kalaban mo diad impamatey mo na amayamay ed saray dilin anak dan ankekelag. Impalner mon amimpinsan iray amin a sondalo ra, diad mapmaples a danum.
6Balet nipasakbay a nibagad saray lalaki mi no antoy nagawad saman a labi, pian naligliwa ra tan napabiskeg so linawa ra diad inkasumpal na saray sipan mod sikara.
7Amtad saman na saray totoom ya iyagel moy matonung a bansa tan deralen mo ray kalaban da.
8Diad panamegley na saman lamlamang a ginawam, dinusam iray kalaban mi tan inter mod sikami so marlang a kagalangan na impanawag mod sikami ed sika.
9Legan na sayan panaon, saray matoor a totoon taga sayan matonung a bansa et maamut a mangisasaklang ira na saray bagat, tan nampapakna ran mangonur na ganggan na Dios tan mannanagnagan ira na saray bindision tan saray kaatapan. Kakantaen da la iray dagdaan ya imno na dayew.
10Balet nadngel ed anggan iner a pasen so pangaskasian ya akis na saray kalaban da, legan ya eermenan da ray inaatey ya anak da.
11Say dusan inter mod saray aripen et kapara na dusan inter mod saray amo; say abalang na saray karaklan et kapara na abalang na ari.
12Ag nabilang iray bangkay lapud karakel da. Kulang iray totoon nakdaan a mangipompon ed sikaran amin. Diad sakey a bekta, inaatey iray inararon anak da; saksakey a polaing so impatey dan amin.
13Ag inngalngalep na sarayan totoo so anggan dinan a pasakbay, no ag ingen nanmatalek irad saray pakayari na panagsalamangka ra. Balet nen inatey iray pangulowan ya anak dan lalaki, abirbir dad satan a say Israel et lakin anak na Dios.
14Asumpal lay kapaldua na antikey a labi, tan mapalna tan mareen so kaliber-liber,
15nen biglan agawa iray taktakot mo! Maples a nanlapud tronom ed tawen so ag natalon salita na pananintinsiam, tan tuloy-tuloy a dinmapod saman a dalin a nigana lan naderal. Sinmabin singa masebeg ya indogpa na sakey a sondalo,
16diad panusumpal toy malet a ganggan mo. Sankaawit toy makapataktakot ya armas, tan akatalindeg a walad dalin iray sali to tan ontotokdul ed tawen so olo to. Pinano to na patey so dalin.
17Diad saman a bekta, saramay totoon ngalngali la ompatey et makapaingungot iray kogip da tan bigla ran ataktakot na pinasya.
18Diad intiron dalin patey-pateyan iran mandokdokul tan impaamta ra no akin et ompapatey ira.
19Amta ra no akin et ompapatey ira, lapud imbagad sikara na saramay makapataktakot a kogip da.
Say Pikakasi nen Aaron et Inlaban tod Patey iray Israelita20Sinmabi met so patey ed saramay matonung a bansa, lapud dinalan na sakit so amayamay ed sikara nen wala rad kalawakan, balet ag nambayag so pasnuk mo.
21Walay sakey a lakin anggapoy pakabalawan ed sikato a ginmalaw a tampol a mangyagel ed sikara. Diad kipapasen ton pari ra, angyapay si Aaron na saray pikakasi tan nampool na insinso ya ikakanad pikekerew na pirdonad saray kasalanan. Diad panamegley na saray pinagkaarmas ton pikakasi tan insinso, binaat toy pasnuk mo tan pinatonda toy desyang. Diad impanggawa tod saya, pinaneknekan to a sikatoy aripen mo.
22Apatonda to may ampait a kairapan, balet aliwan lapud biskeg ton dili odino lapud biskeg na saray sondalo. Ingen, inkana toy pikakasi a pamatondad samay dusa, tan impanunot to iray sipan a sinambaan mod saray lalaki.
23Nantatabunan la ray bangkay, balet inmapireng si Aaron a patondaen toy pasnuk mo tan ag mo la padapoan na mamasakit ed saray akeraan a mabilay.
24Nansolung na andokey a kawes a naarkosan na saray tanda na sansinakuban. Diad pamagalang ed saray lalaki mi, angyan ed pagew to na apatiran dasig na saray mabmablin bato ya atatakan, tan nilaman na arkos ed turban to so dilin kagalangan mo.
25Antakot so Anghil na Patey ed sarayan bengatla, kanyan sinmuko. Melag labat imay ya impakatawag ed sanuk mo, balet magenap la.
Who We AreWhat We EelieveWhat We Do
2025 by iamachristian.org,Inc All rights reserved.
