SIRAC 48 - Maung a Balita Biblia (PnPV)(PnPV)

Si Elias

1Insan linmetaw a singa apoy si propita Elias, a manliub iray salita to.

2Angyakar na eras ed saray totoo, et amayamay iray inaatey lapud seseg to.

3Nansalita ed ngaran na Katawan, et binara to so ipelag na oran, tan amitlon angipapelag na apoy.

4Elias, makapakelaw a tuloy iray milagrom! Anggapo lay arum a toon makapangikinon na onman iran gawgawa!

5Diad ngaran na Sankatageyan, pinaolim ed bilay so sakey a lakin inatey.

6Tinumbam so sakey a bantug ya ari; impansakit mo ya anggad inatey.

7Diad Sinai nadngel mon nampasnukan ka na Katawan tan imbawag toy getma ton manusad saray kalaban to.

8Nilanaan mo so sakey ya ari a sikatoy nikanad saman a dusa. Nilanaan mo met so sakey a propita ya onsalat ed sika.

9Niatagey kad tawen diad panamegley na mandarlang ya alimbusabos, sakey a karwahin ginoyur na mandarlang iran kabayo.

10Ibabagay masanton sulat ya akaparaan kan ompanengneng no niganan panaon, ta pabetelen moy pasnuk na Dios kasakbayan na ontan lan iterak to; a pampawilan mon mankasakey lamet iray ama tan saray anak, pasimbaloen moy kipapasen na saray tribu na Israel.

11Mapalar iray totoon mabilay a makanengneng na isabim, pati saray inaatey la ed aro, ta mambilay kami met.

Si Eliseo

12Nen asaniban na alimbusabos si Elias, napno na ispiritu si Eliseo. Legan na impanbilay to, ag to tinakotan iray manoley, tan ag da napanggawa na labay da.

13Anggapoy mairap ed sikaton gawaen. Anggan nen inatey la, akapanggawa na milagro so bangkay to.

14Nen wala nid bilay tan anggan nen wala lad patey, nanggawa na saray makapakelaw a milagro.

15Balet anggan onya ray agawa, ag inkaindan na saray totoo iray kasalanan da, anggad nala ran priso tan nikaykayat irad intiron mundo. Lapud saya, daiset so atilak a totoo na bansa, balet siansian inoleyan ira na saray kabyangay boleg nen David.

16Ginawa na saray arum a totoo so makapaliket ed Katawan, balet nankasalanan lan nankasalanan iray arum.

Si Ezekias

17Imparaan nen Ezekias so siudad to a panumlang ed panlakob tan inggawaan to na dipositoway danum. Diad panamegley na saray balatyang a kagawaan, nanggawa na dalan na danum ya imbotaw ed tibokel na baton-dampay tan amokotkot na saray bobun a pantiponan na danum.

18Legan na impanoley to, dinogpaan nen Senakerib so siudad tan imbaki tan manlapud Lakis so manonan opisyal to. Mapasirayew a sinagyat ton milaban so Jerusalem.

19Nakalan na biskeg na linawa iray totoo tan manggiwgiw irad takot; nanirap iran singa biin mampapasakit.

20Balet nampikasi rad mapangasin Katawan, say Masanto ed Tawen. Inebatan ton tampol iray pikakasi ra tan imbaki toy Isaias a mangilaban ed sikara.

21Kinabil na Katawan so kampo na Asiria; pinaandipat ira na anghil to.

22On, ginawa nen Ezekias so makapaliket ed Katawan tan malet ton inalig iray ginagawa na laki ton David. Sikato yay ingganggan na matalonggaring a propitan si Isaias a napanmatalkan iray pasingayew to.

23Pinasoner to so agew tan pinadokey toy bilay na ari.

24Niligliwa to ray totoon maermen ed Jerusalem. Ninmengneng ed arapen a panaon so makapanyarin ispiritu to,

25tan impasakbay toy nagawa kasakbayay pansamput na panaon, saray bengatlan ag ni agawa.