LEVITICO 22 - Maung a Balita Biblia (PnPV)(PnPV)

Say Inkasanto na saray Bagat

1Say Katawan ingganggan toy Moises ya ikuantod

2kindi Aaron tan saray lalakin anak to, Ag yo nepeg ya ipelag ed kababaingan so masanton ngaran ko, kanyan pagalangan yo ray masanton bagat ya isasaklang ed siak na saray totood Israel. Siak so Katawan.

3No say kabyangay boleg yo a marotak onung ed ganggan et onsingger ed saray masanton bagat ya insaklang ed siak na saray totood Israel, ag lan balut makapanglingkur ed altar. Sayan totontonen et mansiansia ed anggan kapigan a panaon. Siak so Katawan.

4Siopaman a kabyangay boleg nen Aaron, a walay sakit ton kating odino walay ompapaway ed kayaryan to, et ag nayarin mangan na antokaman a masanton bagat ya anggad malinis la onung ed ganggan. Say pari et marotak no diwiten toy antokaman a marotak onung ed ganggan lapud nidiwit ed bangkay, odino no nampaterak

5odino no adiwit toy ayep o toon marotak onung ed ganggan.

6Siopamay parin magmaliw a marotak siansian marotak ya anggad labi, tan anggan no malinis la ag nin siansia makapangan na saray masanton bagat no ag ni nanames.

7Kaselek na agew sikato lay malinis, tan nayarian to lan kanen iray masanton bagat a sikaray kakanen to.

8Ag to nepeg a kanen so karni na dinan man ya ayep ya inatey a bukor odino pinatey na saray ayep ed takel; sayan karni et makarotak ed sikato. Siak so Katawan.

9Amin a pari nepeg a tombuken da ray totontonen ya inter ko. No ag da ra tombuken, mankasalanan ira tan ompatey ira, lapud sinumlang da ray masanton totontonen. Siak so Katawan a mapasantod sikara.

10Saray kabyangan labat na pamilyay pari so nayarin mangan na saray masanton bagat; anggapo lay arum a nayarin mangan ed sarayan bagatag nayari so anggan toon manaayam ed sakey a pari odino say toon uupaan ton mankimey.

11Balet saray aripen na pari a sinaliw to ra na dilin kuarta to odino nianak ira ed dilin abung to et nayarin mangan ed kakanen a nanaawat na pari.

12Say biin anak na pari ya akiasawa ed lakin aliwan pari et ag nayarin mangan na anggan dinan a masanton bagat.

13Balet say balo odino insian a bii ya anggapoy anak to tan pinmawil a manaayam ed abung na ama to a singa say gendat a kipapasen to nen marikit ni, nayarin mangan na kakanen a nanaawat na ama ton pari. Saray kabyangan labat na pamilya na pari so nayarin mangan na saray masanton bagat.

14No walay toon aliwan kabyangay pamilya na pari ya ag to ginagalay angan na antokaman a masanton bagat, nepeg a bayaran tod pari so bili na kinan to tan pasolukan to na kakalima.

15Saray papari et nepeg ya ag da dotakan iray masanton bagat;

16nepeg ya ag da iyabuloy a kanen ira na toon aliwan manepeg a mangan; saya et pakapankasalananan na toon mangan tan pakadusaan to. Siak so Katawan a mamapasanto ed saray bagat.

17Say Katawan ingganggan toy Moises

18ya iter tod kindi Aaron tan saray lalakin anak to tan diad amin ya totood Israel iray onggendan a totontonen. No say sakey ya Israelita odino sakey a sangkailin manaayam ed dalin na Israel et mangisaklang na bagat a popoolan, a panumpal tod sipan to odino sakey a bagat a pinalapud mabolus a linawa, say ayep ya ibagat to et nepeg ya anggapoy deral na laman to.

19Pian naawat so bagat to, nepeg a sakey a kalakyan ya ayep ya anggapoy deral na laman to so ibagat to.

20No mangibagat kayoy ayep a walay deral na laman to, say Katawan et ag to awaten.

21No say sakey a too et mangyakar ed Katawan na bagat a para kareenan, a panumpal tod sipan to odino pangibagat tod mabolus a linawa, say ayep ya ibagat to et nepeg ya anggapoy deral na laman to pian naawat.

22Ag kayo mangibabagat ed Katawan na ayep a bulag odino lopuy odino sugatan, odino walay mansayon giri to odino walay ambabasal to odino wala ray kegang to. Ag yo isasaklang a bagat a popoolan ed tapew na altar so onya ran ayep.

23Say bakan kalakyan odino kordiron masoluk odino kulang so imbaleg na dinan a partiy laman to et nayarin ibagat a pinalapud mabolus a linawa, balet ag nayarin isaklang a bagat diad panumpal ed sipan.

24Ag yo ibabagat ed Katawan so ayep a saray bokel na paltak to et apitpit, agerger, asugat, odino apotut. Diad dalin yo sebel ya.

25Ag yo isasaklang a bagat a kakanen so ayep a nanlapud saray sangkaili. Sayan ayep et nibilang a walay deral na laman to kanyan ag nayarin ibagat.

26-27No nianak so kilaw a baka odino kordiro odino kilaw a kanding, ag nepeg ya isian ed ina to ed loob na pitoy agew, balet kalabas na saratan ya agew nayari lan isaklang a bagat a popoolan.

28Ag yo ibabagat ed saksakey ya agew so baka tan say kilaw to odino say karniro tan say kordiro to odino say kanding tan say kilaw to.

29No mangisaklang kayoy bagat a pisasalamat ed Katawan, tombuk yo ray totontonen pian naawat kayo;

30akan yod saman lamlamang ya agew so imbagat yo tan ag kayo mangikekera na para ontombuk a kabwasan. Siak so Katawan.

31Say Katawan kuanto, Onur yo ray ganggan ko; siak so Katawan.

32Ag yo ipepelag ed kababaingan so masanton ngaran ko; amin a totood Israel nepeg a birbiren da ak a masanto. Siak so Katawan a mamapasanto ed sikayo;

33siak so angipaway ed sikayo manlapud Egipto pian magmaliw a siak so Dios yo. Siak so Katawan.