ESTER B - Maung a Balita Biblia (PnPV)(PnPV)

Say Ganggan nen Asuero Sumpad saray Judio

14[1] Saya so kopia na samay ganggan:

Ipapatolur nen Ari Asuero a Matalonggaring yan onggendan a ganggan ed saray gobirnador na sanlasus tan duamplo tan piton luyag to, manlapud India ya anggad Sudan, tan diad saray opisyal a walad silong na pakaoley da:

15[2] Kayari na impagmaliw kon manoley na amayamay a bansa tan amo na intiron mundo, insipan kon mambilay lawas ed kareenan iray ooleyan ko. Onyay nilabay kon nagawa, aliwan lapud pangkikinon kod pakayarik, no ag ingen lapud ikakanak lawas so olok tan walay panangasi so panooley kod saray totook. Ginetmak a pasimbaloen so kareenan a pampipilalekan na balang sakey tan manggawad antokaman a nakaukolan pian maoksuy so nanarian, tan arawid kaatapan iray mambiahi ed amin a sokung na impirio.

16[3] Tinepetan ko ray sumisimbawak no panoy pakasumpal na sayan getma, et walay ebat nen Haman. Si Haman et bibirbiren lapud baleg a kakabatan to, tan impanengneng to lawas so pilalek ton manggaway pankaabigan na nanarian. Lapud ag mangoman ya inkatoor to, nagmaliw a kumadwan sankatageyan ya opisyal na impirio.

17[4] Ag ni abayag, imbagad sikami nen Haman so nipaakar ed saray totoon magolo a nikaykayat ed pegley da ray arum a totoo na impirio. Impaliwawa tod sikami a wala ray dilin ganggan na sarayan totoo, sumlang irad balang arum a bansa, tan ag da ikabkabilangan lawas iray ganggan na ari. Lapud sayan kagagawa ra, ag mi nayarian ya iletneg so pankakasakey na gobirno, a sikatoy pampilpilalekan min nagawa ed impirio.

18[5] Sumpad gobirno tayo ira yan totoo tan manggagawa ray makapataktakot a krimin a makasengeg na kakaandiay kareenan ed impirio. Totombuken day nidoma ran kaogaliyan, oonuren da ray dilin ganggan da, tan ontatalindeg iran bukor ed isusumpa ra lawas ed amin a katoowan.

19[6] Lapud saya, igaganggan min pateyen ira yan totoon totokuyen nen Haman, say kumadwan sankatageyan ya opisyal na impirio. Nepeg a napatey iran amin, pati saray bibii tan saray ogogaw; anggapoy nepeg ya ikera. Kalaban tayo ra, kanyan ag tayo ra kakasian. Nepeg a nasumpal yan ganggan diad sayan taon, no kumalabinapat ya agew na kumalabinduan bulan na Adar.

20[7] Diad saksakey ya agew, maruksay ipatey na sarayan totoo ya abayag lan manggagaway gunigon. Manlapud satan ya agew, magmaliw a mareen so gobirno tayo tan ag nasigensigen.