1Manaayam la natan si Ari David ed palasio to. Aminsan impaawit toy propita. Natan tan kuantod sikato, Wadya ak a manaayam ed abung a sidro, balet say Kaban na Sipanan na Katawan et akasinup labat ed dalem na sakey a tulda!
2Inmebat si Natan, Gawam labat so antokaman a walad kanunotan mo, ta walad sika so Dios.
3Balet diad saman a labi inkuan na Dios ed kinen Natan,
4Laka, ta ibagam ed aripen kon David a kuankod sikato, Aliwan sikay mamaalagey na timplon panayaman ko.
5Nanlapu lad impangipaway kod saray totood Israel ed Egipto ya anggad natan, ag ak balut nanayam ed dalem na timplo; diad nandoroman lugar a naknakar ko, dalem na tulday nanaayaman ko.
6Diad impipilak ed saray totood Israel ag kon balut tinepet ed siopaman a pinilik a panguloy Israel no akin et ag to ak impaalageyan na timplo a sidro.
7Kanyan ibagam ed aripen kon David a siak, say Katawan a Makapanyarin-amin, kuankod sikato, Inekal ta kad panagpastol moy karniro ed kaalogan, insan ta ka ginawan manoley ed saray totook ya Israel.
8Kaiba ta ka ed anggan iner a nilam, tan tinalok iray kalaban mo diad indogpam. Gawaen ta kan matalonggaring a singa saray sankatalonggaringan a pangulod intiron mundo.
9-10Amili ak na sakey a pasen a para saray totook ya Israel tan impanayam ko rad man ya ag la ra nasigensigen. Nanlapu lad inloob dad sayan dalin, dinodogpaan ira na maruksan totoo, balet ag la ya nagawad sikara. Isipan kon taloen ko ray amin a kalaban mo, tan parakelen ko ray kabyangay boleg mo.
11No ompatey ka tan nipompon kad kawalaan da ray lalakim, gawaen kon ari so sakey ed saray anak mo tan pabiskegen koy nanarian to.
12Sikatoy mamaalagey na sakey a timplon para siak, tan pansiansiaen ko ya anggad angga so nanarian to.
13Siak so magmaliw ya ama to tan sikatoy magmaliw ya anak ko. Ag ko ekalen so ag mangoman a panangarok ed sikato, aliwan singa ginawak ed kinen Saul.
14Ipasen kon manoley ya ando lan ando ed saray totook tan diad panarian ko. Pansiansiaen ko ya anggad angga so nanarian to.
15Imbaga nen Natan ed kinen David iray amin ya impaamtay Dios ed sikato.
Say Pisasalamat nen David(2 Sam. 7:18-29)16Si Ari David linmoob ed Tuldan Ayamay Katawan, inmirung tan nampikasi, Aliwa ak a manepeg, anggan say pamilyak, ed antokaman a ginagawam lad siak, Katawan a Dios.
17Balet natan, lalon dakel ni so gagawaen mo; nansipan kay nipaakar ed saray kabyangay pamilyak diad arapen a panaon. Sika, Katawan a Dios, et ipapasen mo ak lan singa sakey a toon matalonggaring.
18Anto niy nayarian kon ibagad sika? Kabkabat mo ak ya aripen mo, et siansian papagalangan mo ak.
19Linawam tan getmam a gawaen yan para siak tan ipaamtam ed siak so pagmaliw kon lalo nin matalonggaring.
20Katawan, anggapoy miparad sika; amta mi lawas a bukbukor mo so Dios.
21Anggapoy arum a bansa diad tapew na dalin a miparad Israel. Inyagel mod inkaaripen iray Israelita tan ginawam ira a totoom. Diad panamegley na saray ankabaleg tan makapakelaw a ginagawam para sikara, kinmayat ed intiron mundo so dayew mo. Pinataynan mo ray taga arum a bansa legan a mankukurang iray totoom.
22Ginawam ya andi-anggaan a totoom so Israel tan sika, Katawan, so nagmaliw a Dios da.
23 Katawan a Dios, sumpal mo pad amin a panaon so insipan mo nipaakar ed siak tan saray kabyangay boleg ko, tan gawam pay onung na sinalitam.
24Nitanduro ka tan lawas ikuan na saray totoo, Say Katawan a Makapanyarin-amin so Dios ed intiron Israel. Pansiansiaen moy nanarian ko.
25Matalek kon ipikasi yad sika, O Dios ko, ta impuyan mo yan amin ed siak ya aripen mo, tan imbagam ed siak a gawaen mon arari iray kabyangay boleg ko.
26O Katawan, sika so Dios, tan insipan mod siak yan maung a bengatla.
27Kerewen kod sikan bindisionan mo ray kabyangay boleg ko, tan pansiansiam yan bindision ed sikara. Sika, Katawan, so amindision ed sikara; mansiansian ando lan ando ed sikara so bindision mo.
Who We AreWhat We EelieveWhat We Do
2025 by iamachristian.org,Inc All rights reserved.
