ECCLESIASTES 10 - Maung a Balita Biblia (PnPV)(PnPV)

1Saray inatey ya apangat pabangeten day sambotilyan pabalingit; ontan met say daiset ya inkakulang-kulang deralen toy kakabatan tan kagalangan.

2Inkanatural na makabat a too so manggaway katonungan, tan inkanatural na makulang-kulang a too so manggaway kaogsan.

3Say inkakulang-kulang to so pakapatnagan na saray sangkailin naabet to; ipaamta to ed balang sakey a too a sikato et makulang-kulang.

4No mampasnuk ed sika so amom ag ka oneekal ed kimey mo; ta no ag ka oneseesel nayarin napirdona so anggan baleg a kasalanan mo.

5Walay sakey a kaogsan ya anengneng kod mundosay kaogsan a gagawaen na saray manoley.

6Saray makulang-kulang so nanaitday atatagey a betang, balet saray mamayaman abebebay betang da.

7Akanengneng ak na saray aripen a mangabkabayo, balet manaakar a singa saray aripen iray totoon gagalangen ed baley.

8No manggawa kay patit ya abut, diman ka nikolabut; ketketen ka na oleg ya onsorub ed binongaw mon padir.

9No managtebag ka na saray bato, nasakitan ka na bato. No managbelang ka na kiew, nasakitan ka na kiew.

10No ngelngel so wasay mo tan mangiras kan mangyobul, nepeg a pasiaen mon iwasay. Say kakabatan makatulong ed maung a kasumpalan na too.

11Anggapoy kakanaay pakapaamod oleg no paketketen mon onona.

12Pakagalangan na makabat a too so bunga na saray salita to, balet kaderalan na makulang-kulang so bunga na saray salita to.

13Manlapud gapo ya anggad samput andi-kakanaan iray salita na makulang-kulang.

14Ag ontonda a manlabir lan manlabir.

Anggapoy toon makaamta no antoy nagawad arapen, kanyan anggapoy makapangibaga ed too no antoy nagawa kayariy ipatey to.

15Say makulang-kulang maininomay a nakesawan no mankimey, ta ag to amtay anggan onsempet.

16Pangaskasiyay kipapasen na sakey a bansa no say manoley to et sakey a tobun-balo tan mampista lawas iray pangulo to.

17Balet maung so kipapasen na sakey a bansa no say manoley to et gawaen toy dilin labay to, tan makanepegan a mampista iray pangulo to, napokpokan day sikaran dili kanyan ag ira nabuwek.

18No say sakey a too et mangiras a mangipiger na atep na abung to, onterter insan nageba.

19Say pista mampagayaga tan say alak mampasayaksak, balet no anggapoy kuarta ag ka makapampista tan makainom na alak.

20Ag mo isasamba so ari anggan diad maamut, tan ag mo isasamba so mayaman anggan diad dalem na kuartom, ompan nidalem kad sikara ta nanlayag so dalin.