SIRAC 23 - Maung a Balita Biblia (PnPV)(PnPV)

1O Katawan, Amak tan Pangulo na bilay ko, ag mo ak pa papaolyan a pangaskasiyan lapud saray dilin salitak; ag mo pa aabuloyan a sikaray makasengeg na katumbak.

2Oy la komun a nalewet ak lapud saray kanunotan ko, pian napetek na Kakabatan so panagnunot ko. Ag ko labay a napaliisan koy dusa no alingo ak; ag ko labay a napalabas so anggan saksakey a kasalanan!

3Diad ontan, ontonda ak a mankasalanan tan ag la mantotombukan so pakalingok. Ag ak napelag ed lima da ray kalaban ko tan ag da ak napaabeba.

4O Katawan, Amak, Dios na bilay ko, ag mo pa aabuloyan a mampaatagey ak;

5iyagel mo ak pad saray maoges a pilalek.

6Ag mo pa aabuloyan a naoleyan ak na panagagom odino maoges a liket na laman; ag mo ak pa tataynan a pangaskasiyay kipapasen ed pakaoley na andi-baing a pilalek na laman.

Panagsamba

7Anak ko, dengel yoy ibagak nipaakar ed manapeg a panagsalita; gawa yoy ibabangat kod sikayo, et ag kayon balut napatitan.

8Saray makasalanan na naeral ira na saray mapaatagey tan managpabaing a salita ra.

9Ag yo papasalen so ogalin panagsamba, tan ag yo ikakana lawas so masanton ngaran na Dios.

10Ag balut naandian na saray sugat so aripen a naynay a napepekpek; ag balut naandian na kasalanan so toon mansasamba ed Masanton Ngaran.

11Mandakel so kasalanan na toon lawas mansasamba tan ag balut onawari ed pamilya to so dusa. No ag to sumpalen so sinambaan to, mankasalanan. No lingwanan toy sinambaan to, mamidway pankasalanan to. No andi-kabaliksan so impansamba to, ag napirdona tan napanoy gunigon so abung to.

Marotak a Panagsalita

12Walay panagsalita a singa patey a dilianggapo komuy Israelita a mankasalanan ed saya! Ag mantitiblak ed sayan kasalanan iray matonung, tan aarawian da yan ogali.

13Ag yo papasalen so panagsalitay mabanday tan maoges; kasalanan itan.

14Ompan nalingwanan yoy sikayon dili no kaiba yo ray totoon bibirbiren tan magmaliw kayon makulang-kulang diad pansalita yo na aliwliwa lapud ogali yo. Nudnunot yo no antoy liknaan na saray ateng yo! Isamba yoy agew na inkianak yo tan lablabayen yo lay inaatey komun.

15No napasal yo so pangikanay salitan makasakit na liknaan, ag yon balut naekal legan yon mambilay.

Saray Kasalanan Nipaakar ed Piaakdul

16Amayamay iray pakapankasalananan tan makasengeg na isabiy pasnuk na Dios, balet ampetang, manliub ya apoy ya ag bengatbengat naerep so pilalek a miakdul; naerep labat no naoput la. Say toon anggapoy arum a pilalek tod bilay no ag say panliket tod piakdul so gawaen to lan gawaen ya anggad apoolan na saman ya apoy.

17Diad satan a laki amin a bibii et pampilpilalekan, tan ag napenek ed anggan anton karakel na naala ton bibii legan ton mambilay.

18Say lakin aliwan matoor ed asawa to et nununoten tod sikaton dili, Anggapoy siopaman a makaamta. Ambilonget dia, tan anggapoy toon makanenengneng ed siak. Anggapoy pampagaan ko. Ag ya anggan nanaimano na Sankatageyan.

19Antakot labat yan too ed arum a totoo. Ag to nabibirbir a saray mata na Katawan et samplon libon maliwawa nen say agew, a nanenengneng toy amin a bengatlan gagawaen tayo, anggan iyaamut tayo.

20Amta toy amin a bengatla kasakbayan tan kasumpal ton pinalsa so mundo.

21Naerel tan nibalita ed karaklan no ag iilaloan na satan a toon makasalanan.

22Tua ya met ed biin aliwan matoor ed asawa to tan iyapay tod sikato so anak tod sananey a laki.

23Onona, sinumlang toy Ganggan na Sankatagyan. Onkumadwa, nanggawaan toy aliwa so asawa to. Tan kumatlo, impagmaliw toy sikaton dili a marotak a bii diad impikaloguran to tan impananak toy ogaw ya aliwan ilalak na asawa to.

24-25Manirap iray anak lapud kasalanan to. Ag ira birbiren na karaklan odino makapangipaalagey na pamilya. Samay bii et niarap ed tipon da ray totoo

26tan andi-anggaan a walad kababaingan. Nisambay pakanudnunotan ed sikato. Kayari na ipatey to

27nabirbir na balang sakey ya anggapo lay magmaung nen say itakot ed Katawan, anggapo lay lalon masamit nen say pangonur na saray ganggan to.